#ساقى_نامه
در مصائب کربلا
.
✍️ #زبدةالاشعار ✍️
.
🆔: @nohe_torki
.
مرحوم قمری
.
پیاله ویر منه ساقى ئولوم هواسى گلور
یواش یواش گوزیمون درّ پربهاسى گلور
.
بو سرّى بیلمیورم شور گوز یاشیندا نه وار
آخاندا لؤلؤ شهوار تک جلاسى گلور
.
بهار عمر گچوب یوز قویوب خزانه طرف
گورک نه مرحله ده دردیمون دواسى گلور
.
دولانمیشام نچه ایللردى کور و کورانه
هاچان بو چشم رمد دیده مون ضیاسى گلور
.
آزآز اثر گورونور نشئۀ محبّتدن
شکسته خاطریمون ایمدى مدّعاسى گلور
.
گچورتمیشم گونیمى الّلى ایل جهالتلن
بو گون طبیعته ماهیّت اقتضاسى گلور
.
دوشوبدی باشیمه سیر سیاحت گلزار
یارالى قلبیمه گلزار غم صفاسى گلور
.
قباقجا گوگلمه سرلوح دفتر غمده
مدایح شه خیبرگشا بناسى گلور
.
آچاندا بال و پرین مرغ آشیانۀ دل
ازل قباقیمه پیغمبرون عزاسى گلور
.
اولور مدینه ده اود شعله سى سمایه بلند
جناب فاطمه نون نالۀ بکاسى گلور
.
گهى بو قانه دونن داغدار خاطریمه
على باشیندا نمایان قلج یاراسى گلور
.
سالوبدی اود جانیما ماتم امام حسن
همیشه قلب ملول و حزینه یاسى گلور
.
نقدر هر طرفه سیر ایدم برابریمه
حسین تشنه لبون دشت کربلاسى گلور
.
نه کربلا دیه سن رشک کوه مِنادور
منایه هانسى خلیلون بیله فداسى گلور
.
دوشوب سوسوز سو کنارینده بیر جوان قولسوز
هنوز خیمه لره گئتمگه حیاسى گلور
.
آخار بویاندا بیابانه ماء عذب فرات
سکینه نون گینه ده العطش صداسى گلور
.
کیمون غمینده چکوم ناله قالموشام حیران
خزان یتوب گوله بلبل لرون نواسى گلور
.
چکنده نالۀ وا اکبرا خیالیمه که
ربابه نون سودامر اوخلانان بالاسى گلور
.
باخاندا عبرتیلن مد جلوۀ نظره
حسن نشانه سینون قانلو طوى لباسى گلور
.
سالوبدى باشه قرا داغ لر گورن زینب
قولاقه شیون و فریاد و آه واسى گلور
.
کباب اولوب جگریم یانمیشام مسلمانلار
بو یرده یادیمه شمرون ایدن جفاسى گلور
.
اود ایچره خیمه ده قالمیشدى سیّد سجاد
دیردى عمّه اوغول دادینه آناسى گلور
.
منى چخارد اود ایچیندن کناره یوخدى آنام
باجیم قالوب الى قوینوندا وا اخاسى گلور
.
یوزون بقیعه دوتوب سسلنوردى زینب زار
قیزون هر آینه چاتماقلیقا آناسى گلور
.
سبب ندور آناجان سالموسان منى گوزدن
بلالى باشیمه عالملرون بلاسى گلور
.
عروسى بیر طرف آغلاردى یوز دوتوب نجفه
دیردى بیر بیله ظلمه کیمون رضاسى گلور
.
اگر یتیشسه الیم مرتضى على باباما
منى قوتارماقا اول شیعه لر آقاسى گلور
.
منى بو حالیده قویماز رشید عموم عباس
الینده قانیله رنگین اولان لواسى گلور
.
بوقتلگاهیده بیر نامراد عم اوغلوم وار
یقین که چوخدور اونون غیرت وفاسى گلور
.
بو فخر بسدى عزا گلشینده «قمرینون»
قولاقه حشره کیمى واحسین صداسى گلور
.
.
.
#ساقی_نامه #قمری
#حسینیه_شهادت #عاشورا
#پیاله_ویر_منه_ساقى_ئولوم_هواسى_گلور
#ترکی
.
✍️ #زبدةالاشعار ✍️
.
🆔: @nohe_torki
نظر دهید