جریان و کیفیت منزل حرّان
.
✍️زبدةالاشعار✍️
.
?: @nohe_torki
.
مرحوم انور اردبیلی
.
پیش گفتار یازور خامه بو محکم خبری
مطلبه دقت ائله قلبوه اولسون اثری
کوفه دن دوشدی ردیفه اسرانون سفری
نه سفر دفتر عالمده بیر عالم سؤزی وار
دوزه‌بیلمز سؤزونه‌هرکیمون آغلار گوزی وار
.
.
نه سفر گوندوزی زهرا قیزینا لیل دُجی
مرکبی ناقۀ عریاندی یولی آلچاق اوجا
دوه اوسته اوتورانلار قیز اوشاقی بالاجا
میلۀ غصه قرا گوزلرینی سُرمَلیوب
مشگبو طرّه لرین تارینی تپراق بَلیوب
.
.
سؤزومون منظره سی داش اولا هردل یارالار
ناقه لر تند گئدور اگلشه بیلمور بالالار
دیل دوداقلار قوریوب یورقون ایاقدا یارالار
تیتریور هربالا قیز که ائشیدور زجرین آدین
سیندیروبدی او ستمگر چوخونون قول قنادین
.
.
وئردی بیر دسته گلی چرخ دنی خار الینه
دین و دل اهلی دچار اولدی دل آزار الینه
تازیانه وئریلوب زجر ستمکار الینه
شامه جک وردی او ظالم دینَنی دینمیَنی
دولادی قمچی سینه اصغره لایلای دییَنی
.
.
هر نویسنده سؤزوم یوخ سوزی هریانه آتوب
کیم بیلور آل علی شامه نه حالیله چاتوب
هانسی منزلده او بیچاره لر آسوده یاتوب
یازمارام هرسوزی قلبون آلیشا یازهرا
اُسرا منزل حرّانیده ائتدی مأوا
.
.
خبرون متنی کتابتده وئرور بیله نشان
کوفه نون فاصله ده شامه یاخیندی حرّان
یورولان قیزلار اَنوبلر دوه اوسته نگران
ملر آهولری صیّادلر آلدی آریا
دئدیلر ساکت اولون کیمسه گرک آغلامیا
.
.
اهل حرّانی تماشایه چکوب بو جریان
نیزه بانلاری گلوب دوره لدی پیر و جوان
توپلاشوبلار اسرانون باشینا فوج زنان
دئدیلر بیربیرینه اهل شریعتدی بولار
بنذمور خارجیه صاحب عفّتدی بولار
.
.
وئرسه رخصت قاباقا قویسا نگهبانلار اگر
اُسرائیله دانیشسوق اله منظور گلر
قویمیولّار دانیشاق جرمیدی صحبتده مگر
طرز صحبت لری منطقلری گیرادی عجب
اوتوروب بیر بالا قیز اورتادا زیبادی عجب
.
.
او اوجا بویلی خانم که گوروسوز چوخ قوجالوب
غرق دریای بلادور باشینا قاره سالوب
ئوله نی چوخدی یقیناً اودی بو حاله قالوب
هی باخور قانلی باشا دادرسی گوزیاشیدور
بو اونون‌باجیسی‌حتماً او بونون قارداشیدور
.
.
واریدی منزل حرّانیده بیر تلّ نُما
اوردا بیر مرد یهودی ائلمیشدی سُکنا
آدی یحیی ئوزی توراته بصیر و بینا
طرز اندیشه سی مثبت اورک آئینه سی صاف
تیز فهمیدی عدالت روش و ذرّه شکاف
.
.
سالدی سرنیزه ده که باشلارا بیربیر نظرین
تاپدی عشق عالمینون سرور شوریده سرین
روحی درک ائتدی او روحانی طبیبون اثرین
روبرو اولدی حسین باشینه اول پاک ضمیر
دئدی ای باش گورورم سنده وار اسرار کبیر
.
.
اولموسان موسی عمران کیمی سن معجزه گر
زنده لر تک باخوسان زنده سن ای شاه مگر
لبلرون بیربیره دگدوقجه سنون ذکر دییر
دینوون خاطرینه ایلمه مبهوت منی
ذکریوه طول وئروب روشن ائله مسئله نی
.
.
شاه دین مرد یهودینی گورنده نگران
آیت حق اوخودی آیۀ حقّی اوجادان
قلب یحیایه حسینون سسی گتدی هیجان
قالدی حیرتده گوروب منظره بُهت آوردی
دئدی حتماً بو باشون صاحبی پیغمبردی
.
.
اولیادندی و یا اینکه بئله قدرتی وار
گوره سن هانسی گوزل سلسلیه نسبتی وار
حیف اولا پارچالانوب آلنی عجب صورتی وار
سوروشوب آدینی بیلسم تانیسام سلسله سین
کول دولان گوزلرینون اشگیله سیلَّم گیله سین
.
.
نیزه داره دئدی کیمدور بو باشون جدّ و اَبی
آدینی ایله بیان شرح ائله اولسا لقبی
دئدی ئوز آدی حسین دور باباسی ختم نبی
آتاسی شاه ولادور آناسی خیر نسا ٕ
هاشمی دور نسبی خامس ارباب کسا ٕ
.
.
شام سلطانینه باش اگمدی خوار ایلمیشوک
باشینی ذبح ائلیوب نیزه سوار ایلمیشوک
حرم آهولرینه گوندوزی تار ایلمیشوک
هاشمی نسلینی شمشیره چکوب صاق گئدوروک
قصر خضرای یزیده یوزوموز آق گئدوروک
.
.
ائشیدوب بو سوزی یحیی ائلدی فکر عمیق
دوشونور مطلبی هرکیم اولا خوش بین و دقیق
خبره صرّاف بیلور هانسی دی یاقوت و عقیق
دئدی تصدیق ائدورم دین رسول اللهی
نه دیوب ختم پیمبر دوزوموش واللهی
.
.
اِقرأ بسمیله قویوب تاج قبول ایلیورم
قدسیان نطقینه محتاج قبول ایلیورم
ایلیوب گویلره معراج قبول ایلیورم
تُفلحوا کلمه سین السّاعه خیاله سالورام
ئوزونی گورمدیم عطرین نوه سیندن آلورام
.
.
قید توراتی آتوب تابع قرآن اولدی
ذکر ائدوب کلمۀ توحیدی مسلمان اولدی
گوزی دوشدی اسرایه جگری قان اولدی
دئدی بیر باشکه جدا اوسته منه رهبر اولا
قویمارام من بالاجا قیزلاری بی معجر اولا
.
.
باشدا عمّامۀ مصری واریدی جنسی کتان
نچه قطعه ائدوب عمّامه سین اول پاک روان
باش آچیق قیزلارا تقدیم ائله دی ناله کنان
سیّد ساجده اثبات ائلدی خدمتینی
چیگنینه سالدی اونون جُبّۀ پرقیمتینی
.
.
بیرده مین درهم اولان نقدین او پاکیزه تبار
یتوروب زین العباده بئله ائتدی گفتار
آل دئدی بو پولی یولّاردا آقا لازم اولار
چوخ حساب ایله بو آز تحفه نی ای کان کرم
قَییدن ده بورا گلسون سنی پیشواز ائدرم
.
.
بو صمیمیّتی یحیاده گوروب اهل جفا
گئت کناره دئدیلر ایلمه ایجاد خطا
گئتمه سون باشوی تندن ائدروک فوری جدا
نیه ای پیر خطاکرده خطا یول گئدوسن
شام سلطانینه توهین و خیانت ائدوسن
.
.
دئدی یحیا اولارا عار اولا ملّیّتوزه
سکّۀ زر ائلیوبدور غلبه غیرتوزه
خبروز یوخدی نه لطمه یتوب حیثیّتوزه
یخموسوز خانۀ ایمانی یروز نار اولسون
دینینون غیرتینی چکمینی خوار اولسون
.
.
کسموسوز رهبروزون باشینی ظلمیله سوسوز
سالموسوز عترتینی قید فشاره شب و روز
کیم طرفدار اولا تهدید ائدوسوز قورخودوسوز
آرزو ایلورم الساعه یاتان بخت اویانا
گوره محبوبیم حسین قانه جمالیم بویانا
.
.
شام سرکرده لرین ائتدی بو صحبت نگران
قتل یحیایه او ظالملر اولوب هم پیمان
ال آتوب قبضۀ شمشیرینه شمشیر زنان
باخدی یحیا قشونا گوردی مجسّم اجلین
دئدی تکبیر آتوب قبضۀ شمشیره الین
.
.
جنگ اودی شعله چکوب نایره سی اولدی شدید
زحمت یاره نی بیلمز اولا کیم یاره مُرید
بش نفر قتله یتوردی ئوزیده اولدی شهید
یخیلاندا شهدا ایچره دئدی سان وئرورم
گورسدون نیزه ده کی باشی منه جان وئرورم
.
.
هرکیم عاشقدی گرک عشق صفاسین گورسون
آلمیون دوره می سلطان، فداسین گورسون
یاره لی پیکریمون نقش و نماسین گورسون
گوز یومان وقته دیوم عشقوه مدیونم آقا
بو نجه عشقیدی موساده گلوب آغلاماقا
.
.
گوردی اول تازه مسلمانی وئرن وقتیده جان
باشینون اوسته گلوب آغلیور اهل حرّان
آغلیورسوز دئدی بیجا منه ای پیر و جوان
واردی قلبوزده علاقه بیلورم گوزیاشینا
آغلیون فاطمه نین اوغلی حسینون باشینا
.
.
ذکر یالَیتَنی کُنّا مَعَک اولسون هدفوز
گیینون قاره اوجالسون گوگه صوت اَسَفوز
قلبیدن خالص حسینچی اولون آرتسون شرفوز
ایسته سوز شیعه لیک حقّین ائده سوز یاخشی ادا
سیزی تاری بیر حسینیّه دوزلدون بوردا
.
.
ای قلم زنده دی هرکیم اولا اسلامه فدا
سندیم آیۀ قرآنیدی فرمان خدا
نیزه ده ایلدی اعجاز شه کرب و بلا
گاهی حرّانیده یحیانی مسلمان ائلدی
پیر ترسانی گهی تابع قرآن ائلدی
.
.
طاهر شامی ائدور نقل همین عنوانی
اولدی ویرانه سراده اسرا زندانی
فاطمه قیزلارینون چیخدی گوگه افغانی
قصر خضراده جلالیله مقام ائتدی یزید
مست و مخمور اولوب گوندوزی شام ائتدی یزید
.
.
من نَدیمیدوم او بد فطرت و جانی بشره
گون به گون حالتی آشفته گلوردی نظره
قویموشیدی شه دینون باشینی طشت زره
خواب ائدن وقتیده بالینینه ایستردی منی
ائشیدوب قصّۀ شیرین یاتاردی او دنی
.
.
طبق معمول گینه بیر گجه مست میِ ناب
کچدی ئوز بستر دیباسینه اُول خانه خراب
قولاق آسدی سوزومه یومدی گوزین ایلدی خواب
ناگهان منزل ویرانه نی شیون بورودی
ملر آهودی دییردون ملشن بیر سورودی
.
.
اموی قصرینه نزدیکیدی دارالاُسرا
اوجالان ناله لره قوشدی سسین باد هوا
گجه نون نصفی یزیدون اُطاقین دوتدی صدا
طشت زرده اسرانون سسینی آلدی امام
ترک ائدوب طشتی هواده اوجالوب ائتدی مقام
.
.
روبرو ائتدی او باش منزل ویرانه ئوزین
دولدوروب قانی سرشگیله ایکی قانلی گوزین
آغلیاندان صورا دوندردی سماواته یوزین
یریلن گوی آراسیندا او سر باعظمت
خیزران پارچالیان لبلره وئردی حرکت
.
.
دئدی ای موهبتی نامُتناهی الله
قدرتی گوندوز ائدن لیل سیاهی الله
آتاسیز قیزلاریمون پشت و پناهی الله
گجه وقتی سنه روشندی ملال و محنیم
او قوری یرده یاتانلار بالالاریمدی منیم
.
.
صورا ویرانیه شاه شهدا دوتدی یوزین
باجیسی زینبه بو طرزیله آندیردی سوزین
باجی آل سینوین اوسته بالام ئولدوردی ئوزین
خیزران خسته سیَم یاره لنوبدور دوداقیم
بوگجه ساخلا سحردن اولاجاق ئوز قوناقیم
.
.
یری وار زینب مظلومه دئسون بو سخنی
بالوین دردی کباب ائتدی آنام اوغلی منی
منتظردور ائده ویرانه ده دیدار سنی
آتا عشقین اورگیندن آتا بیلمز بو بالا
قویماسا یوز یوزه سنلن یاتا بیلمز بو بالا
.
#راه_شام
#پیش_گفتار_یازور_خامه_بو_محکم_خبری
#انور_اردبیلی
#قیام_زینب_انور
#ترکی
.
✍️ #زبدةالاشعار✍️
.
?: @nohe_torki
نظر دهید