زبدةالاشعار

چوخ طالب اولما عزته دنیانین عزتی #قاسمیه_حقیر_خویی

در بی اعتباری دنیا و اشاره به احوالات حضرت قاسم(ع)
.
✍️ زبدة الاشعار ✍️

?: @nohe_torki
.
مرحوم میرزا عبدالوهاب حقیر خویی
.
چوخ طالب اولما عزته دنیانین عزتی
ذلّتدی یوخدی عزّتینین استقامتی
.
عاقل اولان بعیدیدی کیم اختیاریله
اؤز نفسینه قبول ائلسون ننگ ذلّتی
.
ممد و حدور نقدر آز اولدوقجا حرص و آز
امّا نقدر چوخ اولا چوخدور مذمّتی
.
محرومیدور حریص بو مطلب عمومیدور
وار چون خبرده کلِّ حریصٌ عبارتی
.
هر یرده کلّ افاده ی قید عموم ائدر
مطلق بو کلمه نین هامویا وار دلالتی
.
اخبار وار روات کثیره بو بابیده
حدّ تواتره یتیشوب یوخ نهایتی
.
حاصل ائدوبله تجربتاً اهل تجربه
دولت سرای فقریده گنج قناعتی
.
یول گوستروبدیلر سنه اؤز رهنمالرون
واضح نشان وئروبله سبیل هدایتی
.
الفقر فخری چون بویوروب فخر کاینات
اثبات اولور بو فخریله فقرین شرافتی
.
حکمتدی قولی فعلی طبیب نفوسیدور
درج ایلیوب کلام شریفینده حکمتی
.
رحمتدی عالمینه وجود مبارکی
مفتوح ائدوب بو بابیدن ابواب رحمتی
.
دنیادی رأس کلّ خطیه ی که چوخلاری
عمده سالان بلایه دی دنیا محبتی
.
نصّ صریح مخبر صادق وئروب خبر
مأثوردور خبرده بیانین صراحتی
.
دنیایه جیفه طالب دنیایه هم گلاب
تأویل ائدوب طریق مثلدن شباهتی
.
تشبیه ائدوب عجوزیه دنیانی گورموسن
آیا خطاب شاه سریر ولایتی
.
دنیا علیدن اؤزگه سینی تاب فریب وئرر
یوخدور یولون منه اؤزوه وئرمه زینتی
.
مطلق حرام سن منه من وئرمیشم سنه
اوچ مرتبه طلاق مؤیدّی حرمتی
.
عمرینده اولمادی نظیرینده او سرورین
دنیا بقدر پَرّ مگس قدر و قیمتی
.
عمده سبب بو اولدی که اوّلدن آخره
اولدی نظرده آل علینین عداوتی
.
انکار حقی ائتماقا اوّلده ثانیه
بیر نوع وئردی جلویه حبّ ریاستی
.
دنیایه تابع اولدولا دنیا پرستیلر
غصب ائتدیلر فدک کیمی ناحق خلافتی
.
چون یر یوزونده قویدولا ظلمین بناسینی
کرب و بلاده گلدی ظهوره علامتی
.
ظلمت احاطه ایلدی آفاقه گون کیمی
اولدی یزید ظلمینین عالمده شهرتی
.
گوردی یاتور لوای شریعت ولیّ دین
آچدی او عرصه گهده بساط شهادتی
.
ظلمت مقابلینده ائدوب جلوه نور حق
نوریله رفع قیلدی حجابات ظلمتی
.
تسلیم اولوب شهادت قتلی قبول ائدوب
برپا قیلوب دوباره لوای شریعتی
.
ظلمت مقابلینده ائدوب جلوه نور حق
نوریله رفع قیلدی حجابات ظلمتی
.
تسلیم اولوب شهادت قتلی قبول ائدوب
برپا قیلوب دوباره لوای شریعتی
.
دوتدی چو ابر تیره سواد سپاه کفر
پرگار وار دوره ی شمس امامتی
.
عریان ائدوب قلجلاری کلاً غلافیدن
سبط پیمبر اوستونه پیغمبر امّتی
.
فرد و وحید نقطه ی توحید تک امام
اول کثرت ایچره کشف ائلیوب سرّ وحدتی
.
بیر یاندان اوج عرشه چیخوب بانگ العطش
بیر یاندان اهل کوفه و شامین شرارتی
.
بیر یاندا پاره پاره باتوب قانه اکبری
بیر یاندا سرو تک دوشوب عباس قامتی
.
وئردوقجا کوی عشقیده قربان جوانلارین
آرتوردی وجد شوق سرور و بشاشتی
.
داماد ائتدی شوق تمامیله قاسمی
گوردی یتیشدی بزم شهادتده نوبتی
.
گرم نظاره خیمه ده دامادیله عروس
بیر لحظه حاصل ایله میش استراحتی
.
نه وار سواله تاب تکلّم عروسیده
نه بیر جواب وئرماقا داماد قدرتی
.
داماد اوزینه حسرتیله گوز تیکوب عروس
باخدوقجا گوزلریندن آخور اشگ حسرتی
.
هل من معین صداسی امام زمانیدن
وئردی او نوجوانه شهادت بشارتی
.
چکدی الین عروس الیندن قیام ائدوب
گوردی عروس اؤزگه دی داماد حالتی
.
لرزه دوتوب وجودی بدن اضطرابیده
تیترور بسان گل قیزاروب رنگ صورتی
.
عرض ایلدی عم اوغلی خیالون ندور مگر
ایله بیان اورکده کی مقصود و نیّتی
.
آماده سن شهادته شوق وصال حور
الدن آلوب قراروی هم صبر و طاقتی
.
رحم ایله من غریبم اماندور بو لشگرین
نه شرم وار یوزونده نه رحم و مروّتی
.
یوخ طاقتیم علاج ائله درد فراقوه
بسدور منه جوان ئولن اکبر مصیبتی
.
وورما شراره خرمن صبر و قراریمه
آرتورما دردیم اوسته غم درد فرقتی
.
وئردی جواب عمو قیزی هجران زمانیدور
یتدی وصال گونلری پایانه مدّتی
.
صبر ایله چوخدا آغلاما یاندیرما قلبیمی
یاخشی یاندوندا ساخلا ائشیت بو وصیّتی
.
ناله ائدنده قارداشیوا یاده سال منی
ترک ائتمه رسم مهر و قرار محبتی
.
قسمت بئله گتوردی ندور چاره قاسمین
ناکاملیق زمانه ده گلموشدی قسمتی
.
گلدی دوباره نالیه عرض ائتدی یابن عمّ
قطع ایلسن بو نوعیله تئز مندن الفتی
.
هاردا گوروم بویور سنی من بیر داخی دئدی
دیداریمیز قیامته قالدی حقیقتی
.
داماد نامراده«حقیر»آغلا صبح و شام
یاندیردی عالمی بو جوانین مصیبتی
.
#پندیات
#قاسمیه_شهادت
#حقیر_خویی
#چوخ_طالب_اولما_عزته_دنیانین_عزتی
#ترکی
.
✍️ #زبدةالاشعار ✍️

متن پیشنهادی:  باخ بیر اسیر عیالیوه ای میر قافله #راه_شام_ذلیل_تبریزی

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی