حالات شهادت حضرت ابوالفضل العباس (ع)
..
..
حمید محرمی (نادم تبریزی)
..
..
چون دوشدی علم بلا چولونده فرزند ابوتراب الیندن
گویا کی باتیب خلاص اولوبلار خفاش لر آفتاب الیندن
..
..
تا پرچم دین اسردی دست سرلشکر لشکر خداده
بیرحمله ده صفلری پوزاردی چون شیرخدا اوشیرزاده
دوتموشدی سپاه کفری یکسر تشویش و هراس فوق‌العاده
میدان ده زهرچاک اولاردی سرکرده لر اضطراب الیندن
..
..
بازوسی نشان قدرت لله،بالاوبلندقدوقامت
ایلردی عقاب اوسته چون سرو الحق قدوقامتی قیامت
دریای رشادت و شجاعت،باشدان باشا هیکل شهامت
آلمیشدی شجاعت و شهامت سرمشقینی بوتراب الیندن
..
..
ایلردی هجوم دلده تکبیر غیظیله اوقوم کافر اوسته
گویا شه لافتا قویوب یوز تیغ دوسرالده خیبر اوسته
یااینکه عقاب تیز پرواز سرپنجه آچیب کبوتر اوسته
جان قورتارا کیم گوروب کبوتر هنگام شکار عقاب الیندن
..
..
سالمیشدی دل سپاه کینه بیر واهمه تیغ جانگزاسی
افلاکه سمکدن اوج ائدردی هرسمتدن الحذر صداسی
اولموشدی چوعرصه گاه محشر ناراهلینه دشت غم فضاسی
اود خرمن عمرمشرکینه گویا کی یاغار شهاب الیندن
..
..
صدحیف که چرخ سفله پرور اوزظلمون ائدیب عیان اوچولده
اول نیک سرشت وئرمییبدی تقدیرقضا امان اوچولده
اللهین ایلییب امیدین مین تیرغمه نشان اوچولده
کامه چاتا قویمییب او شیری ظلمیله فلک ذئاب الیندن
..
..
سالمیشدی ایکی قولون بدندن هرچند ستمله اهل کینه
بوباره ده ذره دردومحنت یول وئرمزیدی دل حزینه
ایلردی سپر آلاردی جان تک مین شوقیله سینیه،جبینه
هر اوخ که کمانیدن چئخاردی اول فرقه ناصواب الیندن
..
..
ظاهرائلییبدی بیررشادت میداندا اومعدن صلابت
بیرمشک سواوسته هربلانی جان و دلیله ائدیب اجابت
اوخلاره گوزون نشان وئرردی تامشکینه ائتمه سین اصابت
دیسین گوزونه تمام اوخلار تا گئتمییه مشک آب الیندن
..
..
ناگاه گلیب بیراوخ هوادن شرم ائتمه دی دگدی مشک آبه
دریای امید اهلبیتین آمالینی دوندریب سرابه
ال اولمادی حفظ ائده سومشکین آخدیقجا سومشک دن ترابه
دلدن چکیب آه حسرتیله سلب اولدی توان و تاب الیندن
..
..
اوخلاندی گوروب سومشکی،گوزده خون دلی سیل اشکه قاتدی
بولدی داها یوخ ره نجاتی، شام اهلی اوچولده کامه چاتدی
مأیوس اولوب، خیامه گئتماق فکرین اوزمان باشیندان آتدی
آگاهیدی منتظردی قیزلار سیراب اولا اول جناب الیندن
..
..
اول ساقی عشقه هرطرفدن باغلاندی تمام راه چاره
ترک ائتدی ره خیامی ناچار میدانه قویوبدی اوز دوباره
بی پنجه گوروبدولر اوشیری هر بیر یئتیشن ویریبدی یاره
دفع خطر ایلسین،مسلم سرکرده آلار جواب الیندن
..
..
حیران دولاناردی رزمگاهی آشفته خیال و دل شکسته
باشدان باشا پیکری یارالی، اوخلار سینه سینده دسته دسته
بیراوزگه جفاائدیبدی نوفل آتدان یئخیلیب یئره اوز اوسته
ال اولماسا وئرماقا قباقه اولماز بیری کامیاب الیندن
..
..
قولسوز یخیلاندا تشنه سقا ظلمیله زمین کربلایه
اخیامه باخیبدی حسرتیله قارداشینی سسلدی هرایه
عرض ایلدی سیدی اماندور گل داده دوشوب باشیم بلایه
یوخ کیمسه بوقانلی باشی آلسین اهل ستم و عذاب الیندن
..
..
بیریاره دئییب باشیمدان آخدی اشکیله قاریشدی قان گوزومده
ال یوخدی سیلم بوقانی گوزدن،تاریک اولوب جهان گوزومده
گورسن ستم سپاه شامین آثارینی قان دولان گوزومده
سیل گوزلریمی منی خلاص ائت قاندان چکیلن حجاب الیندن
..
..
نقصان یئری قویمییب جفاده بولشکربی حیاوسرکش
نقشی پوزولان باشیمدان اوتری اون یدی شقی ائدیر کشاکش
السیز باشیم اللره دوشوبدور،حاشا اولا من کیمی بلاکش
الله بولوری نه چکمیشم من بوفرقه کین مآب الیندن
..
..
سال باشیمه سایه صون نفسده ای سایه رحمت الهی
عباسیوه قویما بوندان آرتیق زحمت وئره شامیان سپاهی
تنها بودور آرزو اورکده عالملرین ای امیدگاهی
باشیم کسیله ایاقون آتدا جان قورتارا پیچ و تاب الیندن
..
..
نائل اولا قویمییب مرامه عباسیوی فرقه ضلالت
سقالیقیم اولمادی ثمربخش ای وارث خاتم رسالت
سانسیز یارالاردان ئولمسم ده آخر منی ئولدورر خجالت
بوچولده دوتانمادیم صدافسوس سن تک شه مستطاب الیندن
..
..
ادرکنی صداسی تا یئتیشدی تل اوسته او شاه تاجداره
رنگی سارالیب پوزولدی حالی آزقالدی نفس دوشه شماره
سیریندن اوماهی بولدی سالمیش ظلام الی ظلموله کناره
سرعتله گلیب خسوفه دوشموش ماهین دوتا آفتاب الیندن
..
..
سلطان سریر عشق بولمم نه حالده تاپدی سرسپاهی
نه واردی گوروب قولی بدنده نه واردی باشیندا طاس کلاهی
مه صورتینه گوزی دوشنده عرشه اوجالیب فغان و آهی
بولدی گل باغ بوترابه صدمه یئتیشیب رکاب الیندن
..
..
سردارینی قانلی قوملار اوسته تاگوردی شهنشه خجسته
ال بئلده،گوزونده اشک حسرت ایلشدی آلیب باشین دیز اوسته
اول اوخی چکدی صاق گوزوندن مین محنتیله او دل شکسته
باشدان ایاقا آلیشدی یاندی قلبینده کی التهاب الیندن
..
..
شاه شهدا وزیر جنگین قلبینده اولان مرامی بیلدی
گوزیاشلی الین آپاردی، گوزدن آهسته اولخته قانی سیلدی
قول بوینونا سالدی رأفتیله قانلی گوزونی اوپه،ائیلدی
روحی چیخا آزقالیب بدندن دردوغم بی حساب الیندن
..
..
سسلندی اماندی یاتما بیله ای پشت و پناه آل حیدر
سال چیگنیوه اوخلانان سومشکین دور خیملره گئداخ برادر
آغلار گوزوله سوجامی الده گوزلور سنی عترت پیمبر
آزقالدی هلاک اولا حرملر اخیامده اشکناب الیندن
..
..
شه ناله سی تا یئتیشدی سمع اول عاشق صاف و پاکبازه
عیسای مسیحه دم وئرندن بیر دمده آلیب دی جان تازه
آچدی گوزونی نه زحمتیله عرض ائتدی اوشاه دلنوازه
اولموربوجهان ندندی ویران بوچشم تروپرآب الیندن
..
..
من گوزلریوین فداسی مولا بیرنوکره خاطر ائتمه شیون
سیل گوزلریوی اماندی غمگین گورسه سنی شاد اولار بودشمن
عفوایله قصوریمی که خدمت شایسته به شأن ائدنمدیم من
دوتسون قدر، ائتمییب قضا امر بوساقی دلکباب الیندن
..
..
آخرنفسینده محضروندن سقای خجل ائدیر تمنا
بویاره لی جسمیمی خیامه حمل ایلمه ای عزیز زهرا
گونلر ائوی،قوملار اوسته،قالسا خوشدور منه بوداغیلمیش اعضاء
چوخ منفعلم بالالاروندان بخصوص بوگون رباب الیندن
..
..
#نادم دایان اود دوتوب آلیشدی بو خامه غم نگار الینده
الحق که گوزل یازیبدی #عاصی ایله اونی سن شعار الینده
(قارداش یارالی باشیم قالیبدور بو لشکر بیشمار الینده)
اجروز یئتیشر سیزون یقیناً محشر گونی بوتراب الیندن
..
..
..
#عباسیه #حمید_محرمی #عباسیه_شهادت #ترکی #زبدةالاشعار
نظر دهید