اربعین
زبانحال حضرت زینب (س)
.
#زبدةالاشعار
.
: @nohe_torki
.
#سبک_کربلا_منتظر_ماست … #سبک_شهریاریمسن_آقا … #سبک_یارالی_جان_یارالی
.
میرزا علی عظیمی
.
کربلا گُلشنینون ای چمن آراسی حسین
گُلشن دینون اولان لالۀ حمراسی حسین
.
.
گلمیشم قبروین اوسته بو یانان دللریله
یوللارین خسته سی بیر عدّه قرا معجریله
سنده خوش گلدین ائله ذبح اولونان حنجریله
چون کی یوخ مجلسمون بلبل شیداسی حسین
.
.
عترتون دشت غمه سینه سی سوزان یتیشوب
هاموسی دیده سی گریان و پریشان یتیشوب
زینبون قدّی کمان دردی دو چندان یتیشوب
قالمیوب یاره لَنَن قلبیده یاراسی حسین
.
.
من گئدنده یارالی جسموی عریان گوردوم
اوزی اوستونده دوشوب قانینه غلطان گوردوم
قلبوه بوسه ووروب زهریلی پیکان گوردوم
هئچ یارا اولماز او بیر زخموین همتاسی حسین
.
.
قطعه قطعه اولونوب قانه باتان پیکریلن
بوریایه بوکولوبسن بدنِ بی سریلن
بیر مزار ایچره یاتوبسان سن علی اکبریلن
لیک مجنون بیابانیدی لیلاسی حسین
.
.
دوز یاریم گونده محندن قوجالان زینبوَم
خصم حقّون جانینا لرزه سالان زینبوَم
قوللاری باغلی گئدوب شامی آلان زینبوَم
منده وار فاطمه نون غیرت و احساسی حسین
.
.
ایندی سن کامه یئتور ای شه احرار منی
اذن وئر تا کی سرافراز ائده سردار منی
پیشواز ایلسون عبّاسِ وفادار منی
بوندان آرتوق باجوین یوخدی تمنّاسی حسین
.
.
سوئی آز اولسادا یوخ عیبی اوشاقلار آزالوب
چوخی یوللاردا ئولوبدی بیری شام ایچره قالوب
باخمیشام عَلقَمَه نالم گینه عرشه اوجالوب
خیردا گوردوم نئجه کی مرقد عبّاسی حسین
.
.
خوش سنین حالیوه اقبالوه ای شاه حجیز
خصم قرآنیلن ائتدون عَلَنی جنگ و ستیز
کربلا تُپراقینی قانون آخوب ائتدی عزیز
کیمیادن باش اولوب تربت اعلاسی حسین
.
.
گلمیشم قبروین اوستونده سینه داغلاماقا
دردوی یاده سالوب نوحه دیوب آغلاماقا
زینبون حاضر اولوبدی یاراوی باغلاماقا
واردی بیلدون سوزومون آیری بیر ایماسی حسین
.
.
بو سنیق قلبیمی قارداش گتوریدون اَلَه سن
کسیلن حلقیدن ایندی گله سن بیر دیلَه سن
گلمیوب نازلی قیزون ایلمه مندن گِلَه سن
شدّت ایلر بیلوسن قلبیمون آماسی حسین
.
.
بلبلوم دوشدی نفسدن منی تئز سالدی یولا
جانبوندن او قالوب شامه نماینده اولا
ملک طاغوتیده تا پرچم اسلام اوجالا
شامیده بیر گون اولار گنبد زیباسی حسین
.
.
سنون عشقونده وجودین خطره سالدی بالون
شیشۀ عشرتینی سنگ غمه چالدی بالون
کنج ویرانه ده قلبی یارالی قالدی بالون
قالمادی تنده اونون قوّت و یاراسی حسین
.
.
آهِ زینب یئری وار فرشیدن عرشه اوجالا
یوخ وفاسی بو جهانون باشینا کوللر اولا
زینبون قلبینه چوخ داغلاری چکدی بو بالا
جان وئرن وقته اولوب محنت عظماسی حسین
.
.
جان عالم سنه قربان اولا ای تشنه فدا
تربت پاکی وئرن گیزلین اولان درده دوا
زینبون خاطرینه باخ منِ مسکینه شها
تا «عظیمینون» اولا روحیلی انشاسی حسین
.
.
.
.
#اربعین_میرزاعلی_عظیمی
#کربلا_گلشنینون_ای_چمن_آراسی_حسین
#ترکی
.
#زبدةالاشعار
.
: @nohe_torki
نظر دهید