کفر اهلی بیزیم دلده کی ایمانی آلانماز #وطن_دلپاک

وطنم ، ایران
..
..
..
..
رضا غلامپور(دلپاک)
..
..
..
..
کفر اهلی بیزیم دلده کی ایمانی آلانماز
بیزدن نقدر سعی ائده وجدانی آلانماز
..
بیز صاحب میدان وفایوخ اودی بیزدن
جوریله جفا اهلی بو میدانی آلانماز
..
بیز بارقهٔ قدرتِ سلطانِ جهانوخ
باللّه کی گدا قدرت سلطانی آلانماز
..
هرچند تیکان گولّی گلستانه بلادور
اما نه ائده عطر گلستانی آلانماز
..
ظلمت غضبیله چوخ آتار اَل گویه، گویدن
بیر لحظه ولی شمس درخشانی آلانماز
..
پیمانهٔ جان وقفیدی پیمانه که دشمن
پیمانه میزی آلسادا پیمانی آلانماز
..
آشفته اولان درک ائدر آشفته ملالین
بی رنج، خبر حال پریشانی آلانماز
..
بازار محبّتده نه قیمت کی بولوندی
هر کیمسه گلیب یوسف کنعانی آلانماز
..
بیهوده تیکیب گوز هامی بیگانه بو‌ ملکه
اهریمن دون، ملک سلیمانی آلانماز
..
بی غیرت اولان شخصه کی انسان دئماق اولماز
هئچ واقعه چون غیرت انسانی آلانماز
..
قانه لبِ خندانیله عشق اوسته بویانّوخ
بیزدن هئچ ئولومده لب خندانی آلانماز
..
دریا کیمی طوفاندی منیم الده سلاحیم
دریانین الیندن بیری طوفانی آلانماز
..
جانیله علمدارِ بو ملکوخ کی اجانب
بیزدن علمِ کشورِ ایرانی آلانماز
..
جان بذلیدی جانانه کی هر جانیِ جان سخت
بیزدن هدف حضرت جانانی آلانماز
..
احساندی خدادن بیزه «دلپاک» شرافت
بیزدن اودی هئچ کیمسه بو‌ احسانی آلانماز