زبانحال امام (ع) در سر نعش علمدار کربلا (ع)
.
.
مرحوم سعدی زمان
.
.
گلمیشم آچ گوزلرون سرلشگریم قارداش اویان
ای علمدار سپاهیم یاوریم قارداش اویان
.
.
تا سسون گلدی خیامه ای یوزی بدر تمام
عترتیم باش آچدی ایتدی عالم محشر قیام
وا ابوالفضلا سسیندن سربه سر دولدی خیام
اولدی بو چولده هویدا محشریم قارداش اویان
.
.
ای آتام اوغلی امیدیم قوّت بازو منه
وی اولان هر جبهه ده فرمانده نیرو منه
ال تاپار سنسیز بو قوم کافر و بدخو منه
ای هامی دعواده محکم سنگریم قارداش اویان
.
.
من پناه ماسوایم سن منه امّا پناه
ای پناهیم وی کمکسیز پادشاهه سر سپاه
سنده گیتدون وای کمکسیز جانیم ایوای آه آه
ایمدی وار نه دادرس نه لشگریم قارداش اویان
.
.
گیتمسیدون سن الیمدن ای منه حصن حصین
ال تاپانمازدی قشون اولسیدی گر روی زمین
سسلرم ایمدی ایوون آباد آنا امّ البنین
بسلیوب نه یاخشی قارداش مادریم قارداش اویان
.
.
سن دگلدون صاحب سرپنجه ای شیر ژیان
بس اوزون قولّاریوا نه گلدی ای سرو روان
قدّیمی ایتدی بو آلنوندان دگن پیکان کمان
ای رشادتده غضنفر مظهریم قارداش اویان
.
.
عّده به عدّه بو گون گوردوقجا هنگ دشمنی
مرتضی گوزده گورردیم اؤز قباقیمده سنی
سن شهید اولدون داخی یالقوزلار اهل کین منی
ای قلج وورماقدا ثانی حیدریم قارداش اویان
.
.
آلموشام آغلار گوزیله من دیزیم اوسته باشون
اوز الیمله سیلّم آخدوقجا گوزوندن قان یاشون
سالموسان دور گور نه حاله بو اوغولسوز قارداشون
خون دل ایلور روانه گوزلریم قارداش اویان
.
.
ایتدیلر بیر گلستان چیده سوسوز یاورلریم
سو کیمی قان ایچدی رنگارنگ آچلدی گللریم
بو گلستانون گل صد برگی جسم اکبریم
لاله سی قاسمدی غنچه اصغریم قارداش اویان
.
.
یوخ بو گلشنده ولی خندان اولان گل سن کیمی
گورمیوب گورمز جهان شوریده بلبل من کیمی
تازیانه زینبی سنسیز ایدر سوسن کیمی
قیزلاریم قولّاریدور نیلوفریم قارداش اویان
.
.
سنسیز الدن دوشدی شمشیریم منه یوز ویردی غم
بیر کسیم یوخدور قالوبدور یرده بی صاحب علم
نه دیوم آلسا سنی مندن خبر اهل حرم
دور گیداخ گوزلور یولووی خواهریم قارداش اویان
.
.
نعشون اوسته قویسالار بیر عمر گللم شیونه
نیلیوم قویمور دویونجا آغلیوم دشمن سنه
ایلییم نوحه بو چولده اولمادی ممکن منه
نوحه نی ایلر «حسینی» نوکریم قارداش اویان
.
.
#عباسیه #سعدی_زمان #عباسیه_شهادت #ترکی #زبدةالاشعار
نظر دهید