گلوب او یولدا قالان قیز که کاروانه یتیشدی #راه_شام_انور_اردبیلی

راه شام
.
.
مرحوم انور ادربیلی
.
.
گلوب او یولدا قالان قیز که کاروانه یتیشدی
گوروب آتاسینی غم صوتی کهکشانه یتیشدی
.
اسیر گمشده چاتدی قطار آل عبایه
خزینه صاحبینه گوهر یگانه یتیشدی
.
غم عندلیبی قویوب پشت سرده دشت و فلاتی
ترانه ایلمگه غملی گلستانه یتیشدی
.
قویوب ادب الینی سینه سینه گلدی سلامه
گوزونده اشک تری شاه انس و جانه یتیشدی
.
اورکلنور قیز اوشاقی گورن زماندا آتاسین
اودور او خیردا قیزا صحبته بهانه یتیشدی
.
دئدی قیزین نچه ساعتدی آیریلوب اُسرادن
فغان سسی اوجالوب عرش لامکانه یتیشدی
.
جِدانون اوسته دایاندون هامی بو مطلبی بولسون
گُلون تعصّبی عالمده باغبانه یتیشدی
.
ایاق یالین تیکان اوستونده کاروانی گزوردوم
الیم نه بیر کسه چولده نه خانمانه یتیشدی
.
نه غملی قافله نون ردّین آختاروب تاپا بولدوم
نه بیر کمکچی نه سیزدن منه نشانه یتیشدی
.
یوخیدی چاره یورولدوم بابا یول اوسته اوتوردوم
قوجاقلادیم دیزیمی نالم آسمانه یتیشدی
.
سسیم باتوب او قدر عمّه عمّه سسلمیشم من
نقدری غصّه بولورسن بو خسته جانه یتیشدی
.
سیخیلدوم اوز پریمه پر شکسته یاره لی قوش تک
نه لانم اولدی او چولده نه آب و دانه یتیشدی
.
ترحّم ایلمسیدون جِداده چولده ئولردیم
بو غملی عمرومه لطفونله پشتوانه یتیشدی
.
بویوم جدایه یتوشسیدی گوزلروندن ئوپردیم
دریغ اولا باشیوین وصلی نیزه بانه یتیشدی
.
گلنده زجر لعین کاش او چولده سنده اولیدون
گوریدون اوردا نئجه ظلم لر عیانه یتیشدی
.
گورنده قمچی سینی قلبیم اَسدی دوردوم اَیاقه
اورگیم اَسدی جفا تیغی استخوانه یتیشدی
.
سلام وئردوم او شومه ترحّم ایلیه بلکه
منیم مقابلیمه لیک وحشیانه یتیشدی
.
باشینون اوسته دولاندیردی قمچی سین منی وورسون
الیم نه قاسمه نه اکبر جوانه یتیشدی
.
نه حالدا گوردی منی یولداشی ترحّمه گلدی
چتین زمانه ده امداده منصفانه یتیشدی
.
دئدی مروّت ائله قورخودان ئولوبدی گورورسن
بو ظلم و بو ستمون رخنه سی جهانه یتیشدی
.
دوداقی پارچالانوب گوزلرون یوموب باخا بولمور
اونون بو کلمه لریندن قیزون اَمانه یتیشدی
.
گورنده عاطفه دشمنده اضطرابیم آزالدی
غریق بحر غمه مژدۀ کرانه یتیشدی
.
ایاقلاریما باتوب نیش خار گوز گوز اولوبدی
نه ظلم لر باباجان گور بو ناتوانه یتیشدی
.
توجّه ایلدی عصرون امامی نوحه وه «انور»
اودور که سوزلریوه روح جاودانه یتیشدی
.
.
.
#راه_شام
#گلوب_او_یولدا_قالان_قیز_که_کاروانه_یتیشدی
#انور_اردبیلی
#پیام_عزا_انور
#ترکی
#زبدةالاشعار