زبانحال حضرت زهرا سلام الله علیها
..
..
#سبک_ساخلا_ناقه_می_کاروانیدن … 8 سبک
مشابه
..
..
مرحوم حاج سید محمود سید شوری
..
..
گل بو وقته بیر درد دل ایداخ
شاه انس و جان ای عم اوغلی جان
بو اورکده که سوزلری ایدوم
بیر به بیر بیان ای عم اوغلی جان
..
سنده دور گوزوم واردی چوخ سوزوم
عرض ایدوم بو آن ای عم اوغلی جان
..
..
عرض ایدوم نچه سوز بیری بودور
گر بو فاطمه انجیدوب سنی
صاحب کرمسن رؤفسن
عفو قیل حلال ایله سن منی
آز قالوب حسنلن حسینمون
عرشه اوج ایده داد و شیونی
زینبیم یاخندور باشین آچوب
ایلیه فغان ای عم اوغلی جان
..
..
سنله بو فنا روزگارده
دوقوز ایل منیم اولدى الفتیم
گر قصوریم اولسا گذشت ایله
گر چه چوخ اولوبدور اذیتیم
خانمانون آباد اولا سنون
قورتولوب داخی آزدی زحمتیم
بو حیاتدن قالموری مگر
مختصر زمان ای عم اوغلی جان
..
..
صبر قیل منیم فرقتیمده سن
ناله ایلیوب سینه داغلاما
قلبون اودلانوب اشگ آلوی
سیل تک او رخساره باغلاما
من دیمم که اصلا سن آغلاما
اغلاسان از آغلا چوخ آغلاما
آغلاسان یوزه منده ایلرم
اشگیمی روان ای عم اوغلی جان
..
..
خواهش ایلورم غسلمی منیم
ویر گجه گجیله ایله کفن
گرچه چوخ چتیندور بو سوز سنه
جسمیمی گجه قوی مزاره سن
ایتگین ایتگلن قبر پاکیمی
بولدوروم جهانه بو ظلمی من
من رضا بو امّتدن اولمادیم
باغریم اولدی قان ای عم اوغلی جان
..
..
اوندا که قاپوم یاندی ظلمیله
اود دوتوب دلیم منده یاتمشام
قویمادیم آچلسین قاپی او دم
من قاپی دالندا دایانمشام
هم جنینیمی سقط ایدوبدلر
هم اوزیمده قانه بویانمشام
ئولماقیما باعث منیم یقین
بول اولوب او قان ای عم اوغلی جان
..
..
بول او کسلری که عم اوغلی جان
ایتدیلر منه ظلم برملا
سالدیلار منی گور بو حالته
حقیمی آلوب ایتدیلر جفا
یا جنازه تشییعنه گله
یا قیلا نماز اولمارام رضا
ثانی ئولدوروب گوندرور منى
قبره نوجوان ای عم اوغلی جان
..
..
بیرده بو حسن اوغلومی اؤزوم
ایلرم سپرده بو گون سنه
من نجه دوزوم بو بالام اولور
دستگیر بی رحم دشمنه
اوندا که بالام زهر کین ایچر
چوخ چتین او ساعت گلور منه
زهر ایدر ایله جسمینه اثر
اودلانار او آن ای عم اوغلی جان
..
..
بیرده عورت آلسان اَمامَنی
اختیار ایدرسن عم اوغلی جان
قزلاریما ایلر مواظبت
مهربان اولور هم اورک یانان
اوزگه عورت اولسا یقین بالام
زینبون اولور باغری لخته قان
خوش اولو آنانین یرینده کی
اولسا مهربان ای عم اوغلی جان
..
..
سویله بیر دویونجه گله گوره
زینبیله کلثوم آناسنی
یادیمه سالوم منده زینبون
کربلاده کی ماجراسنی
بیر نفر تاپولماز او دشتده
باغلاسون عم اوغلى یاراسنی
یا که رحم ایدوب دادینه یتن
بیر اورک یانان ای عم اوغلی جان
..
..
عمده دور منیم بو وصیتیم
تاپشوروم سنه نور عینیمی
بیر دقیقه قویما ملول اولا
آغلاسون مبادا حسینیمی
آغلاسا منیم حالیمی پوزار
آرتورور منیم شور شینیمی
ایمدیدن بالامون غمی ایدوب
قدیمی کمان ای عم اوغلی جان
..
..
کربلاده بولّم حسینیمون
تشنه لب کسر شمر دون باشین
اهل کوفه قویماز ولی گله
زینبیم گوره بلکه قارداشین
قبلیه طرف دوندره یوزون
یا سیله قزیم قانلی گوز یاشین
یا گوره نجه قارداشین ویرور
قان ایچنده جان ای عم اوغلی جان
..
..
شوریا سنون فاطمه آنان
مهرباندی چوخ عرض قیل آنا
سن بالالاریوی چوخ ایسته سن
سن منیم آنام من سنه بالا
بیر نجفده جدّیم مزارینی
قیل بو ایل منه لطفیلن عطا
عرض ایدوم دیلونجه سنون آنا
باغریم اولدی قان ای عم اوغلی جان
..
..
..
#فاطمیه #شوری_تبریزی #فاطمیه_شهادت #ترکی #زبدةالاشعار
نظر دهید