ورود به مدینه
..
..
مرحوم فرهاد فکری اردبیلی
..
..
ای دل مقاله گل غم دورانیدن دانش
اهل صداقته رخ جانانیدن دانش
..
عشق اهلی نار عشقیده پروانه تک یانار
خلقت لطافتی پر سوزانیدن دانش
..
دم ویرما عشقیدن ولی آختار حقیقتی
دائم یانان او شمع شبستانیدن دانش
..
چک رشتۀ کلامی او یثرب بلادینه
قلبی یانان او جمع پریشانیدن دانش
..
شهرون جماعتی نجه دگمشدی بیر بیره
دروازۀ مدینه ده طوفانیدن دانش
..
اهل وطن گلنلری پیشواز ایدر نجه
ایندی بیانه گل غم هجرانیدن دانش
..
آخر نجه گلوب وطنه زین العابدین
اول بلبل نواگر و خوش خوانیدن دانش
..
پرپر ایدوبله فاطمه گلزارین ای عجب
هر یرده سوز دیسون بو گلستانیدن دانش
..
مردانِ پاکِ کرب و بلادن گتور دیله
سالار عشقیدن شه خوبانیدن دانش
..
چخما کناره مطلبه چوخ ویرمه حاشیه
سجّادیدن دئ زینب نالانیدن دانش
..
..
..
بیر کرسی اوسته چخدی باخوبدور جماعته
چوخ آغلیوبدی صونرا شروع ایتدی صحبته
..
..
..
ای یثرب اهلی تاریک اولوبدور جهان بیزه
الله بلور نه ظلم ایلیوب شامیان بیزه
..
حمد ایلرم خدایه بیزی ایلیوب عزیز
وئرمیش بو افتخاری خدا جاویدان بیزه
..
دوغراندی کربلاده سوسوز آل مصطفی
قان آغلادی او گون هامی کون و مکان بیزه
..
چوخ یاره ووردیلار باباما قوم اشقیا
حمله گتیردیلر نجه غارتگران بیزه
..
هر نه واریدی زیور و زر غارت ایتدیلر
گوز یاشینی روان ایلدی آسمان بیزه
..
باغلاندی قول قولا او نوامیس کبریا
چوخ ظلم ایدوبدی یولدا ولی ساربان بیزه
..
دنیاده اولمیوب بئله ظلم و بئله ستم
تا حشر اولونجا آغلیاجاق شیعیان بیزه
..
وارد اولاندا شامه ئولوم ایستدیم ولی
شام اهلی چون قیامتی ایتدی عیان بیزه
..
باشلار ویریلدی نیزه لره شهر شامیده
هر کس گوروبدی گوز یاشین ائتدی روان بیزه
..
شرم ائتمه دی اِلهیدن امّا یزیدِ دون
بیر گوشۀ خرابه نی ویردی مکان بیزه
..
..
..
ویرانسراده ایتدی رقیّه باجیم فغان
آلدی یارالی باشی قوجاقینه ویردی جان
..
..
ویرانه ده بیزه هامی خشک و تر آغلادی
بیز نالیه گلنده ولی کافر آغلادی
..
سنگ و جمادیله در و دیوار ایدوب نوا
یرلر فغان ایدوبدی بیزه گویلر آغلادی
..
لایلای چالاندا اصغرینه بی نوا آنا
دنیا گلوب طلاطمه بحر و بر آغلادی
..
گزدی خرابه نی هامنی ایلدی کباب
اللر دوشنده هی دیدی گل اصغر آغلادی
..
قزلاردا ناگهان دیدیلر لایلای اصغریم
بو غملو ماجراده هامی گوزلر آغلادی
..
اوغلی ئولن چوخیدی ولی اُول خرابه ده
سس قوشدیلار ربابه نچه مادر آغلادی
..
قاسم آناسی گلدی دیله وای جوان بالا
اکبر آناسی توکدی سرشک تر آغلادی
..
ناله یتشدی عدنیده زهرا قولاقینه
باش آچدی هر گیجه بیزه پیغمبر آغلادی
..
دریاده ماهیان، دل صحراده آهوان
گوگده پرندگان هاموسی یکسر آغلادی
..
..
..
بو ماجرالری اشیدن آغلاماز نجه
سیل سرشگینی یوزینه باغلاماز نجه
..
..
..
بیردن فغانه گلدی هامی ایلدی نوا
شهر اهلی سسلنوب اوجادان وا مُحمّدا
..
عزّتله شهره وارد ایدوبلر او حضرتی
سرتاسرِ مدینه اولوب مجلسِ عزا
..
هر گوشه دن گلردی صدای حسین حسین
هرکس گیوبدی اگنینه بیر جامۀ قرا
..
دوردیلا مسجدون قباقندا فغانیله
بیردن اورکلنوب اوجادان ائتدلر نوا
..
قبر رسولیدن اوجالوب نالۀ حزین
فرمایش ایلدی بو قدر آغلاما بالا
..
قویدی یوزین مزاره اودم زین العابدین
گوز یاشینی روان ایلیوب حجّت خدا
..
عرض ایتدی ای حبیب خداوند ذوالجلال
دوتقون سسیله قوی ایلیوم عرضیمی ادا
..
ئولدوردیلر حسینی اسیر ائتدلر بیزی
دنیانی تاریک ایتدی بیزه فرقۀ جفا
..
قول باغلی چکدیلر بیزی بازار کوفیه
ائتمزدی احترام بیزه قوم اشقیا
..
گلدی اسیرلر وطنه گوزلرینده یاش
قان ایچره قالدی جسم شهیدان کربلا
..
..
#ورود_مدینه
#ای_دل_مقاله_گل_غم_دورانیدن_دانش
#فکری_اردبیلی
#ترکی
#زبدةالاشعار
نظر دهید