زبانحال حضرت رقیه خاتون (س) در خرابه ی شام
.
.
#سبک_یارالی_جان_یارالی … 4 سبک
.
.
مرحوم ذاکر اردبیلی
.
.
گل شریک اول بو گئجه عمه منم غملریمه
سن على اکبره آغلا من علی اصغریمه
.
.
کربلاده بیزی قویمادیلا یاس ساخلاماقا
جان وئرنده بابامون گوزلرینی باغلاماقا
یاخشی خلوتدی بی بی منزلیمیز آغلاماقا
سن على اکبره آغلا من علی اصغریمه
.
.
اذن وئر قوی آچوم اوّل بو بلالی باشیمی
ائلیوم جاری او حسرتله قالان گوز یاشیمی
سنده أوخشا منیم اللرده ئولن قارداشیمی
سن على اکبره آغلا من علی اصغریمه
.
.
بلبلون چون گلی سولسا اولی گلشنده غریب
اوخشادار سیله آخان اشکینی دامنده غریب
گل توکک گوز یاشیمیز سنده غریب عنده غریب
سن على اکبره آغلا من علی اصغریمه
.
.
اوخشا اوّلجه رقیه بی بی یانسون سسیوه
تازه دن یاره لی قلبیم یارالانسون سسیوه
بو قرانلوقدا یاتانلاردا اویانسون سسیوه
سن على اکبره آغلا من علی اصغریمه
.
.
دردیوی قوی بی بی جان دردیمون اوسته بو گجه
چکرم صبحه کیمی من دل خسته بو گئجه
ایلییک ناله ایکی قلبی شکسته بو گئجه
سن على اکبره آغلا من علی اصغریمه
.
.
نالووی ناله مه قات اوخشا بو دیللر له ولی
من دیوم پارچالانان حلقووه قربانم علی
سنده دئ حرمله نون توش اولا اودلاره دیلی
سن على اکبره آغلا من علی اصغریمه
.
.
اورگیم آهی منیم بو گئجه عرشه دایانوب
نئچه قارداشیم ئولوب هر بیری قانه بویانوب
قوی دئسونلر بولارون قلبی مصیبتده یانوب
سن على اکبره آغلا من علی اصغریمه
.
.
یاندیرور اول صودامر قارداشیمون دردی منی
اوخشیوم قوی بی بی من اول صودی قانه دؤننی
اصغرون قونداقی، ظلمیله اولوبدور کفنی
سن على اکبره آغلا من علی اصغریمه
.
.
ای رقیه سنی وئرّم قسم آغلار گوزووه
کنج ویرانه ده قان یاشی آخان گل یوزووه
«ذاکره» لطف ائله اودلاندی بو نیسگیل سوزووه
سن علی اکبره آغلا من على اصغریمه
.
.
#حضرت_رقیه #ذاکر_اردبیلی #حضرت_رقیه_شهادت #ترکی #زبدةالاشعار
نظر دهید