خروج از مدینه
زبانحال حضرت صغری سلام الله علیها
.
#سبک_ای_ویرن_ویرانه_یرده ( بیش از 3 سبک )
.
مرحوم عاصی تبریزی
.
گل علی گئتمه عراقه رحم ائله صغرایه قارداش
بو مریضه حالیمی گور باخ حق یکتایه قارداش
ای منیم روحِ روانیم
ای منیم آرام جانیم
.
.
ای منیم روحِ روانیم قلبیمون صبر و ثباتی
نیلورم دنیاده سنسیز بیرده قارداش من حیاتی
بو مریضه عالمینده خوشدی قالماقدان مماتی
یوخدی میلیم روزگاره بو فنا دنیاده قارداش
.
.
نیلَسون بیر قیز الیندن گئتسه خویش و اقرباسی
من کیمی ناخوش خصوصاً اولمیا قارداش اناسی
باری سن سالما گوزوندن ای گوزوم نور و ضیاسی
گوندوزی دوندرمه گوزده بیر شب یلدایه قارداش
.
.
نه آنام واردور که باری حالیمه اولسون مراقب
نه قالور بیر کس ائلیمدن منله اولسون تا مصاحب
دردیمون بس شدتینده کیم اولور مندن مواظب
کیم غذا و شربتینده یار اولور صغرایه قارداش
.
.
بیر اوزون مدتدی قارداش من بو درده مبتلایم
خوش گونه بیگانیَم من درد و غمله آشنایم
گل طبیبیم قیل ترحّم منکه محتاج دوایم
ای مسیحیم مستمندم اول دمِ عیسایه قارداش
.
.
وار سنه قارداش بولورسن دلده بیر مخصوص علاقه
بو علاقیله نه نوعی صبر ائدوم درد و فراقه
گور اولور ممکن دوزوم بو محنت ما لا یُطاقه
تاب ائدوم ئوز دردیمه یا بو غم عظمایه قارداش
.
.
بی سبب آهیم شراری یاندروب دنیانی یاخماز
صفحۀ رخساره قارداش سیل تک گوز یاشی آخماز
ای گول اوزلی بیرده صغری گلشن و گلزاره باخماز
شور ساللام سنسیز آخر یثرب و بطحایه قارداش
.
.
بیر اوزون مدتدی ایلوب جانیمی بو درد خسته
سن گلینجه وار یقینیم قالمارام من دلشکسته
باری سن زحمت قبول ائت گل برادر دیزیم اوسته
تا سالار رحم غمامی قبریم اوسته سایه قارداش
.
.
من دیردیم گر من ئولسم تعزیم اولماز یقین خوار
خویش و ائل تک تک اولوللار محنت مرگیمده غمخوار
اگلشر بزم عزاده قارداشیم اکبر عزادار
گئتدی بو حسرت منیله عالم عقبایه قارداش
.
.
«عاصی» بیر مدتدی ایستر قبریوی ائتسین زیارت
قدرتندن فعله گلمور اوندا یوخدور استطاعت
سن که قادرسن بو امره سنده وار دنیاجه قدرت
بسته دور سندن فقط بیر مختصر ایمایه قارداش
.
.
#خروج_مدینه
#حضرت_صغری
#گل_علی_گئتمه_عراقه
#عاصی_تبریزی #حضرت_صغری_عاصی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید