گل عم اوغلی تاپشیرور جان سینه سینده یاره زهرا #فاطمیه_شعاع_تبریزی

زبانحال حضرت زهرا(س)
..
..
..
..
مرحوم شعاع تبریزی
..
..
..
..
گل عم اوغلی تاپشیرور جان سینه سینده یاره زهرا
آیریلور بالالاریندان گونی بختی قاره زهرا
..
سینه داغلی دل شکسته، یوزی نیلی زار و خسته
گیدوری خمیده قامت ، محضر نگاره زهرا
..
..
..
..
آز قالور یته غروبه آفتاب برج عصمت
باشیم اوسته اگلش ایله جمعه سوره سین تلات
وار نچه سوزوم عم اوغلی ایلیوم سنه وصیّت
گتوره اورکده گزلین سوزون آشکاره زهرا
..
..
..
..
دوقّوز ایل اگر چه اولدوم گلشنونده باغبان من
بسلدیم بو گلستاندا گل ارغوان و سوسن
یاسمن گولومدی مندن صورا غمگسار گلشن
حیف اولا دوشور چمندن الی بوش کناره زهرا
..
..
..
..
ئولورم یتوبدی باشه بولورم بو عمر فانی
غسلومی وئروب کفن قیل منه سن گئجه زمانی
قوی مزاره نصف شبده قبریمی ائله نهانی
بولمسونله هاردا قویدی یوز تراب تاره زهرا
..
..
..
..
دگولم رضا عم اوغلی گله قبریم اوسته ثانی
اونا نیلمیشدیم ایتدی منه بیر بیله جفانی
اودور آل مصطفایه نه جفا اولونسا بانی
دیمه بی سبب بو نوعی دوشور اضطراره زهرا
..
..
..
..
آخموری سرشک دیدم بی جهت عذاره چون یم
دولموری عبث ملال و محنتیله غملی سینم
گوز ائوینده کربلاسی بالامون اولور مُجسّم
نگران گئدور او گوندن محضر نگاره زهرا
..
..
..
..
نجه که ستمله ثانی حقّیمی الیمدن آلدی
قلبیمه شرار غمله او شقی شراره سالدى
اوچ گون آج قالوب حسینیم گول کیمی سولوب سارالدى
نیسگیلین اونون اورکده آپارور مزاره زهرا
..
..
..
..
ظالمان دهر الینده ایله عترتیم قالالّار
زهریله بالام حسندن طاقت و توان آلالّار
زینبی جهاندا من تک دام محنته سالالّار
یری وار یانا غمینده حشره دین هماره زهرا
..
..
..
..
نجه که قاپی دالیندا منی قویدی جانی سخدی
محسنوم شهید اولاندا شیونیم سمایه چخدی
سینه مه یتیشدی صدمه صبر ائوین او یاره یخدی
دوشدی جور اشقیادن حال احتضاره زهرا
..
..
..
..
منجنیق غمده اعدا دل زینبی سخالّار
ئولدوروب حسینی عطشان دین ائوین علن یخالّار
او یارالی سینه اوسته چکمه لی یقین چخالّار
شمر الین دوتاندا زینب گلر اول دیاره زهرا
..
..
..
..
نجه ظلم اودیله یاندی قاپوم ای شه ولایت
ایله یاندرار حسینون خیمه سین وفاسیز امّت
شامیان اساس بیتین ظلمله ایدلّه غارت
ثبت ایدوب او ماجرانی دل داغداره زهرا
..
..
..
..
نجه بیعته آپاردی سنی دست بسته اشرار
ایله باغلانار طنابه کربلاده آل اطهار
غل و جامعه بویوندا گیده جاقدی شامه بیمار
دوتوب اود یانار اورکدن غم جانشکار زهرا
..
..
..
..
منی وردی یخدی قنفذ قولوم اوندا سندی ناحق
تازیانه دن وجودیم گویروبدی مثل زنبق
اولورام شهیده ایمدی باب اطهریمه ملحق
آپارور اورکده شِکوَه حیّ کردگاره زهرا
..
..
..
..
وای او وقندن که باشیز قالار عترت پیمبر
اولار اهلبیت عصمت دستگیر شمر کافر
جمله انبیانی ایلر ظلم ساربان مکدّر
خون دل الر او غمده دیده دن عذاره زهرا
..
..
..
..
نجه ثانی وردی ناحق من ناتوانه سیلی
اونا نیلمیشدیم ایتدی یوزیمی بو نوعی نیلی
وراجاقلا کربلاده ایله عترت خلیلی
گلرعدنده نوایه نی کیمی دوباره زهرا
..
..
..
..
اهل دل بلر عم اوغلی دردیمی بو بیر سوزومدن
یخلاندا رهگذرده اوزدوم ال او دم اوزومدن
اَلرم عذاره قانیاش اودی ابر تک گوزومدن
دیمرم او گونده دوشدی نجه انزجاره زهرا
..
..
..
..
گتورور منی عم اوغلی بو اسفلی قصّه داده
اورگیم یانور دوشنده ماجرای کوفه یاده
سیر ائدر عراق و شامی بالامون باشی جداده
آردیجا دوشر او باشین دشت و کوهساره زهرا
..
..
..
..
چکیلر قطار زینب بزم شربه دست بسته
او باشی که سینه سینده بسله دی بو دلشکسته
او یارالی باشی خولی قویاجاقدی کولّر اوسته
نئجه کولّر اوسته ایلر او باشا نظاره زهرا
..
..
..
..
پوزولار عم اوغلی حالی زینبین یتنده شامه
هم یزید ایدنده توهین عترت شه انامه
چوب خیزران ووراندا او لبان لعل فامه
صبر ایدر نه نوعی باخسا لب زخمداره زهرا
..
..
..
..
نجه گلمیوم فغانه من ناتوان عم اوغلی
نه روا خرابه اولسون قزیما مکان عم اوغلی
نه روا رقیّه ویرسون قوری یرده جان عم اوغلی
یوز قویوب اودی سیزلدار صون نفس جداره زهرا
..
..
..
..
غرق اولوب «شعاع» عم اوغلی بحر غمده ایله اخراج
خرمن قرار صبرین فوج غم ائدوبدی تاراج
توخونار منه گر اولسا نوکریم بو خلقه محتاج
گرک ایلسون حمایت سائل فگاره زهرا
..
..
..
..
#فاطمیه #شعاع_تبریزی
#فاطمیه_شهادت
#گل_عم_اوغلی_تاپشیرور_جان_سینه_سینده_یاره_زهرا
#ترکی
#زبدةالاشعار