زبانحال حضرت زهرا (س)
..
..
#سبک_قارداش_یارالی_باشیم_قالوبدور
..
..
مرحوم حاج شفیع تفاخری اردبیلی
..
..
گل فضّه منیم یامان گونوم دور
باخ حالیمه بات عزایه آغلا
آل بیر دیزووه آنام یئرینه
بو باشیمی گل نوایه آغلا
..
..
سسلوردیله مرتضانی، گلدیم
دینمزله دئدیم عزالییام من
اوچ گوندی بابام گئدوب الیمدن
هم یاسلییام ، هم قرالییام من
آگه قاپونون دالیندا اولدوم
بیلدیم کی نئجه بلالییام من
گوز یاشوری توک عذاره فضّه
باشیمه گلن بلایه آغلا
..
..
دشمن له بفوری کوچه دولدی
اود ویردیلا درگهیم آلیشدی
هیچ فکریمه گلمیین ایش اولدی
اود ویردیلا درگهیم آلیشدی
وحدت باغی بو جهاندا سولدی
اود ویردیلا درگهیم آلیشدی
دینین یولون اگدیلر بو گوندن
سن زحمت مصطفایه آغلا
..
..
ثانی دئدیگین اوزوم ائشیدیم
سسلندی گرک یانا بو درگه
صدّیقه هامی ائدیبدی بیعت
اولماز چکیله یانا بو درگه
چون گوشه نشین اولوبدی حیدر
لازمدی کی اودلانا بو درگه
باب على بیعت اوسته یاندی
سن شعلۀ غم فزایه آغلا
..
..
من کی قاپونون دالیندا قالدیم
سقط اولدى بالام سنیب قابورقام
بیر بستره واردور احتیاجیم
تا راحت اولام سنیب قابورقام
بوندان صورا چوخ چتیندی زنده
دنیاده قالام سنیب قابورقام
گل محسنیمون غمینده داده
بیرده شرف النّسایه آغلا
..
..
..
بو شهریده من مگر یادام یوخ
سن کی بیلوسن آدامسیزام من
درد دلیمی دییم آتام یوخ
سن کی بیلوسن آدامسیزام من
هم باجی و قارداشیم، آنام یوخ
سن کی بیلوسن آدامسیزام من
غم غصّه مه بارى سن شریک اول
بو بختی گونی قرایه آغلا
..
..
تک سقط جنین اولیدی دردیم
شاید گینه ده شفا تاپیدیم
پهلو غمینی چکوب دوزوردوم
شاید گینه ده شفا تاپیدیم
زحمت له یواش یواش گزردیم
شاید گینه ده شفا تاپیدیم
سینمدن ائله کئچوبدی مسمار
ئولسم من او ماجرایه آغلا
..
..
اوز دردیمی بیر به بیر دئدیم من
قوى بیر دانیشاق على غمیندن
هر شخص اولار ائوینده ایمن
قوى بیر دانیشاق على غمیندن
کاشانه سینه توکولدی دشمن
قوى بیر دانیشاق على غمیندن
نه غصّه لی سرگذشتی واردور
درد سر مرتضایه آغلا
..
..
بوندان دا مگر چتین ستم وار
جاهل چکوب عالِمی آپارسون
نامرد کی دوز دگول نژادی
ایستور بنی هاشمی آپارسون
دوشدوک نه گونه آتام ئولندن
گور کیمدی گلوب کیمی آپارسون
بو منظره نی چیخارتما یاددان
ثانی ائلیین جفایه آغلا
..
..
باغلانسا قولی آماندی فضّه
گیر قولتوقوما دوروم ایاقه
لازمدی امام عصره خدمت
بو حالدا گینه قاچوم قباقه
بلکه آلا بیلدیم اللریندن
تاب ایلمرم غم فراقه
دگسه قولوما غلاف شمشیر
سن صحنیده گل صدایه آغلا
..
..
من غش ائلسم ، آپارسا دشمن
همتلى عم اوغلومی بو ائودن
سالسا یولا ذلّتیله فضّه
عزتلی عم اوغلومی بو ائودن
قویما باش آچوخ گئده اماندور
غیرتلى غم اوغلومی بو ائودن
تئز باشینه قوی عمامه سینی
سن معنى هل اتایه آغلا
..
..
اوندان صورا گل بیر آزجا سو سپ
من هوشه گلوم آچوم گوزومی
صاق صول دا حسن حسینمیله
مسجد ده گئدیم دئیوم سوزومی
یا آللام علینى من گتیررم
یا وئررم اونا فدا اؤزومی
اگلش سن ائوینده رو به قبله
قالخیز الیوى دعایه آغلا
..
..
کلثومیله زینبی دانیشدیر
دوت بیر دیله قیزلاری امان دور
بعضی سوزی پرده سیز دانیشما
سن رام ائله قیزلاری امان دور
احوال على نی بیلسه دوزمز
اول مشکله قیزلاری آمان دور
سا خلا ایکی غم کشی یانوندا
دائم ایکی بینوایه آغلا
..
..
#فاطمیه #تفاخری_اردبیلی #فاطمیه_شهادت #ترکی #زبدةالاشعار
نظر دهید