حالات حضرت زهرا (س)
#گریز به #شام_غریبان و #تنور_خولی
این متن در دو بخش ارسال میشود:
( با مصرع اول و هشتکهای):
#دوشنده_یاده_غم_بیشماری_زهرانون
#گنه_همان_گئجه_نون_حالی_یادیمه_دوشدی
.
.
مرحوم عاصی تبریزی
.
.
دوشنده یاده غم بیشماری زهرانون
اولور بو غملو گوئل بی قراری زهرانون
.
یازوبلا عمرونی اون سگز ایل بو عالمده
نه زحمتیله گئچوب روزگاری زهرانون
.
چکوب آز عمریله چوخ محنت و مصیبت و غم
نهایته یتشوب اصطباری زهرانون
.
همیشه شادیدی جدی اولان زماننده
واریدی عزت و شأن و وقاری زهرانون
.
گئدوب آتاسی الیندن اولوبدی مظلومه
اولوب انیسی جفا، ظلم یاری زهرانون
.
وروبدی ظلم اودی یاندوردی درگهین ثانی
گلوبدی درده دل داغداری زهرانون
.
سینوب قابورقالاری محسنی شهید اولدی
فنایه گئتدی اوگون اختیاری زهرانون
.
ائدوبله صاحبینی ظلم الیله خانه نشین
بیر آز زماندا چوخ اولدی فشاری زهرانون
.
سالوب ایاقدان اونی عاقبت غم و محنت
تالاندى صبری گئدوب اقتداری زهرانون
.
او قدر فرقۀ اشراریدن گوروب آزار
دولوب ملالیله قلب نگاری زهرانون
.
دیردی بار خدا دویموشام حیاتیمدن
تئز ائت وفاتیمی ای کردگاری زهرانون
.
دعاسی محضر جانانیده اولوب مقبول
گلوب عنایته پروردگاری زهرانون
.
مریض اولوب سارالوب سولدی گون بگون گل تگ
ستمله دوندی خزانه بهاری زهرانون
.
زمان موت یتوب راست قبلییه اوزانوب
فزون اولوب ألم و انکساری زهرانون
.
گلوبدی قبلۀ اصلی علی باشی اوسته
بتولی گوردی پریشان نگاری زهرانون
.
نه حالیدیدی اونی بولمورم او دم حالی
علینی پوزدی او حال نزاری زهرانون
.
آلوب دیز اوستونه باشین فسرده حال و ملول
بویوردی گوزلرون آچ شهریاری زهرانون
.
مثال شبنم او گل صورته توکوب اشگین
گوروب آچلدی او چشم خماری زهرانون
.
گوز آچدی گوردی باشی اوسته دور، لسان الله
فغانله دیدی ای تاجداری زهرانون
.
یتوبدی موسم هجران عم اوغلی جان ئولورم
یاخونلاشوبدی دم احتضاری زهرانون
.
واریمدی بیر نچه عرضیم اجازه وئرسن اگر
سنه گرکدور اولا اختباری زهرانون
.
اگرچه دلده سوزوم چوخدی لیک وقت آزدور
اولار عرایضنه اختصاری زهرانون
.
بیری بودور که اگر قلبون اینجیسه مندن
حلال ائله منی ای شهسواری زهرانون
.
عم اوغلی بیرده یقینمدی من بوگون ئوللم
گلر نوایه هامی اهل داری زهرانون
.
گئجیله غسلمی وئر قیل منه گئجیله کفن
یتور مزاره که وار انتظاری زهرانون
.
منافقین تانوسا قبریمی رضا دگولم
عم اوغلی قوی قالا گیزلین مزاری زهرانون
.
همیشه ایله نوازش حسینله حسنه
اولاردی صبر دل بی قراری زهرانون
.
حَسندن اینجیسه قلبون حسینه ایله گذشت
بولاردی غنچه گل لاله زاری زهرانون
.
اوزون بلورسن حسین جدّیمون امانتی دور
که تاپشوروب اونی باب کباری زهرانون
.
حسینیم آغلاسا من آغلارام مزار ایچره
عم اوغلی عرشه چخار آه و زاری زهرانون
.
#گریز #شام_غریبان
#آمدن_حضرت_زهرا_بقتلگاه
.
نه حاله قالدی خدا لیلة الغریب حسین
که دوشدی قتلگه ایچره گذاری زهرانون
.
تاپوب حسینی قوم اوستونده بیر چوخور یرده
بریلدی بند دل داغداری زهرانون
.
آلوب کناره حسینون یارالی پیکرینی
نچون حسینیدی زینب کناری زهرانون
.
باخوب یارالارینا بیربه بیر سؤال ائلدی
دیدی منه دئ گوروم «کَیفَ حال یا وَلَدی»
.
شل اولسون اللری کیم وردی بیر بئله یاره
سالوبلا گل جَسَدون قوملار اوسته صد پاره
.
اولوبدی خاکیله یکسان بو گل وجودون اوغول
سوموکرون داغلوب بیر قالوب نمودون اوغول
.
دوتور وجودیمی آتش باخاندا پیکریوه
اوغول منه دئ گوروم بس نه گلدى اللریوه
.
بوقدری یاره دِیَن اولمادی سنه بسدی
او خوردا بارماقوی هانسی بی حیا کسدی
.
بو اوخ یاراسیدی قلبونده یا اوغول داغی
محالدور که اورکدن گئده اوغول داغی
.
اگر بو اهل جفا دویدولار جفادن اوغول
باشون سوسوز نیه بس کسدیلر قفادن اوغول
.
غبار محنت قلبین دیمه سیلیندیردی
جواب گلمدی اوغلون نقدر دیندردی
.
ز بس شراره غم قلبنی کباب ائلدی
یوزین پیمبره دوتدی بیله خطاب ائلدی
.
.
.
#زبانحال_حضرت_زهرا_خطاب_بحضرت_رسول
.
گور بیر نه ظلم ائدوب بابا امّت حسینیمه
نقدری گور ووروبلا جراحت حسینیمه
.
باخما که هر نه دیندیرورم بیر دانشموری
باشین کسن وئروب چوخ اذیت حسینیمه
.
گوردون کسن زماندا باشین شمر بیحیا
خنجر دمنده وئردی نه زحمت حسینیمه
.
بیر تک یارالی سینه سنه دوت مین اوخ دگوب
بو یاره لر دگولدی کفایت حسینیمه
.
خنجر قلج یاراسی چخوب حد و حصریدن
گور بیر ندوبدی اهل عداوت حسینیمه
.
کسدیله باشنی لب دریاده تشنه لب
بیر شربه آب اولمادی قسمت حسینیمه
.
از بسکه یاندیرور منی نسگللری بابا
قان آغلارام ئولونجه قیامت حسینیمه
.
یوخ احتیاجی من سنه بی پرده عرض ائدوم
بو گون یتوب نه قدر مصیبت حسینیمه
.
.
#شام_غریبان_حضرت_حسین_در_قتلگاه
.
.
یاناردی حال حسینه باخاردی آغلاردی
یوزینه زلفنه قانین یاخاردی آغلاردی
.
ز بسکه ناله و فریاده فاطمه گلدی
همان یارالی بدن بیر تلاطمه گلدی
.
او دوغرانان بدنه باخدی جدی پیغمبر
توکوب عذارینه گوز یاشینی چو درّ و گهر
.
فغانله گوزی یاشلی او برگزیدۀ حق
حسیننون باشین ائتدی وجودینه ملحق
.
آناسی فاطمه نون محنتی علاوه لنوب
گوروب او قانلو باشی توپراقا کوله بلنوب
.
چوخ ایسترم دیم هاردیدی بو یارالی باشی
دوشوب ندن بدنیندن جدا بلالی باشی
.
ولیک ایستمرم مطلبیم گئده الدن
اورکده شام غریباندی مقصد اوّلدن
.
#روضه_خوانی_حضرت_حسین_در_قتلگاه
.
توجه ائتسه اوزی گر او شهریار غریب
همان قضیه نی آخرده ایلرم تعقیب
.
ایکی دیز اوسته او دم شاه اولیا وَلدی
دوروب اوتوردی ازل جدّینه سلام ائلدی
.
گوروب آناسی دوتوب قتلگاهده یاسین
گلوب نوایه ائدر ناله حضرت یاسین
.
توکور جمالنه سو تک آتاسی گوز باشی
دوشوبدی دلدن او قدر آغلیوبدی قارداشی
.
گوروب که محفل غم قتلگهده برپادور
او جمعین هر بیرینون ذکرى واحسینادور
.
قوروبدولار او چوخور یرده محفل ماتم
چنین گوره بئله ماتم بو دیدۂ عالم
.
او بزم غمده حبیب خدا ملازمدور
بلی او مجلسه بیر روضه خواندا لازمدور
.
گلوبدی رقّته قلبی ملالیله دولدی
او بی کفن اوزی اول جَمعه روضه خوان اولدی
.
دیدی حسینووه ائیله نظاره یاجَدّا
نه ظلم ائدوبدی گور أمّت بو زاره یاجَدّا
.
ووروبلا سینمه گور بیر نقدر اوخ یاراسی
محالدور گله یاره م شماره یاجَدّا
.
سویوب لباسیمی یکسر بو اشقیا قویموب
قالا او پیرهن پاره پاره یاجَدّا
.
پوزوبدی سُمّ ستوران وجودیمون نقشین
نظاره قیل ستم ناگواره یاجَدّا
.
جفای شمر لعینیله جور خولیله
دوشوب باشیم بدنیمدن کناره یاجَدّا
.
حجاز شاه حسینی مخالفین عراق
سالوب بو دشت نواده حصاره یاجَدّا
.
دوشوبدی باشیمه بیر نوعیله همایون شور
گندر او شوریله بزم قماره یاجَدّا
.
جفائیله بوگون ئلدوردیلر کومکلریمی
ال اوسته اوخلادیلار شیرخواره اصغریمی
.
یتوردی ظلمونی بیر پاییه بو قوم شرار
علی اکبریمی قطعه قطعه دوغرادیلار
.
گوزوم باخاباخا جانیم عزیزی جان وئردی
باشی دیزیمده بابا، جان او نوجوان وئردی
.
ئولنده اکبریم ال اوزدوم اوز حیاتیمدن
داخی امیدیمی کسدیم بابا نجاتیمدن
.
بدنده روحیمدی چون عزیز جانیمدی
دیزیمده قوّتیدی طاقت و توانیمدی
.
بوغم منه بسیدی اکبریم جوان ئولدی
شماتت ائتدی منه امّتون باخوب گولدی
.
یوزیمه باغلادیلار اهل کینه سو یولونی
سو اوسته سالدیلار عباسّمون ایکی قولونی
.
صغاره ائتدی اثر سوزش عطش یاندی
کُبارون اولدی بابا جلدی مُنکمش یاندی
.
بوگون سوسوزلوق اودی بیر نهایته یتدی
صغیر اوشاقلاریمون بعضی سین هلاک ائتدی
.
سنه بو امّت الیندن شکایتیم چوخدور
بغشله گتمه لییم الده فرصتیم یوخدور
.
بنای عشق و محبتده تشنه قربانم
بو گئجه خولیه مطبخ سراده مهمانم
.
بوقدر ظلم و ستم گور روادی بیر باشه
یتشمیوب باشمون محنتی هله باشه
.
یارالی باشیمه هر نه بلا گله دوزرم
یاننجا زینبیمون، چوللری دوشوب گزرم
.
ادامه در :
گنه همان گئجه نون حالی یادیمه دوشدی #تنورخولی_عاصی_تبریزی
.
.
#فاطمیه_عاصی_تبریزی
#فاطمیه_شهادت
#ترکی
#زبدةالاشعار
نظر دهید