در وصف امام حسن مجتبی(ع)
گریز به شهادت آن بزرگوار
.
✍️زبدةالاشعار✍️
.
🆔: @nohe_torki
.
.
محمد رضا بیگلی(رضوی زنجانی)
.
گنه ده مرغ دلیم مهر و وفادن دانیشور (1)
شهر یثربده اولان ماه لقادن دانیشور
فاطمه سویگلی انوار خدادن دانیشور
سینه سینده او گُلی بسلدی زهرای بتول
لب یاقوتین اوپوب دویمازیدی حقّه رسول
.
.
نیمۀ ماه صیامیده سالوب عالمه نور
مهر رخشان کیمی بو دهریده که ایتدی ظهور
منزل فاطمه اولدی ایله بیل سینۀ طور
دهری حیرتده قویوب حُسن کمالی حَسنون
مثل اوندورد گئجه لیک آیدی جمالی حَسنون
.
.
بویوروبدی بو سوزی ختم نبی شاه زمن
سرور اهل جناندور بو حسینیله حَسن
بولاّریلا تاپاجاق زینت او رضوان عدن
دل گنجینه ی زهراده گُهر کیمدی؟حسن
نخل ایمانیله تقواده ثمر کیمدی؟حسن
.
.
حضرت ختم نبینون گوزل ارشد نوه سی
صبر دریاسی کراماتیدن سرمد نوه سی
حُسن صورتده او مولادی زبانزد نوه سی
عرصه ی صبریده که وُردی قدم کیمدی؟حسن
نقشه ظلمه چیکن نقش عدم کیمدی؟حسن
.
.
برگ گُللّرده خدا بیر نچه مویرگ یارادوب
قدرت لم یزلی گُللّری گویچک یارادوب
دشت نقّاش ازل بو حَسنی تک یارادوب
جانشین شه والامیز علی کیمدی؟حسن
مرتضادن صورا عالمده ولی کیمدی؟حسن
.
.
هانسی گُل عطری چاتار دهریده بو یاسمنه
یتشر هانسی گُلون وجهی او وجه الحسنه
حُسنیده یوسف مصریده یتشمز حَسنه
زینت عرش هدای ازلی کیمدی؟حسن
ایکّی عالمده گوزللّر گوزلی کیمدی؟حَسن
.
.
ناتوان خامه نجه یازسون علی پوریندن
یا که شرح ایلسون اول عاشق پُر شوربندن
نور آلار گویدن کی گون،آیدا حَسن نوریندن
حجّت روی زمینیله زمان کیمدی؟حَسن
سرور کلّ جوانان جنّان کیمدی؟حَسن
.
.
شیره ی جان علی شیر خدادی آقامیز
دردمنده آدی عالمده دوادی آقامیز
چارمین مفخر ارباب کسادی آقامیز
مشعل دینی فروزان ایلین کیمدی؟حَسن
معاویه جانینی لرزان ایلین کیمدی؟حَسن
.
.
قلّه ی صلح و صفاده آقا پرچم وُردی
نقشه ی معاویه نی دهریده بر هم وُردی
آل سفیانه حَسن سیلی محکم وُردی
صلحی عالملری حیران ایلین کیمدی؟حَسن
ظالمین کاخینی ویران ایلین کیمدی؟حَسن
.
.
حاتمی که اونی عالم تانیور اهل سخا
خوان احسان حَسنده همین حاتمدی گدا
اهل بیت حاتمینه شیعه لرون جانی فدا
فقرایه او که ایلردی کرم کیمدی؟حسن
کرمین یازماقا عاجزدی قلم کیمدی؟حسن
.
.
یوسفی که ویروب الله اونا رخسار حَسن
حَسنی گورسه اولار خادم دربار حَسن
اونی سرگشته ایدر زلف سمن بار حَسن
فاطمه یوسفی سلطان جهان کیمدی؟حَسن
شیعیانه اولاجاق کهف الامان کیمدی؟حَسن
.
.
عمرینون گلشنینه حیف اولا تیئز اَسدی خزان
گوگروب ظلمین الیله لب یاقوت نشان
دوزولوب لبلرینه دانه مرجان کیمی قان
باد محنتله سولان یاسمنه حیف اولسون
فاطمه دلبری مولا حَسنه حیف اولسون
.
.
جَعده نین ظلمی بوکوب قامت طاهانی بو گون
ماتمه غرق ایلیوب عالم والانی بو گون
دیده گریان ایلیوب حضرت زهرانی بو گون
کوزه یه زهر توکوب ایتدی خیانت حَسنه
جگری پارچالانوب اولدی جسارت حَسنه
.
.
اود کیمی سوزش زهر ایلدی فوراً اثرین
سالدی اولدمده خسوفه داخی زهرا قمرین
قطعه قطعه ایدوب السّاعه امامین جگرین
فاطمه سویگلی خونین دهنه حیف اولسون
جگری ظلمیله طشته گلنه حیف اولسون
.
.
رنگ رخساری سولوب اولدی پریشان حَسن
دیدی معناده خانم فاطمه ده جان حَسن
لبلرینده دایانان قانیوه قربان حَسن
سن کیمی یعنی غریب وطنه حیف اولسون
ئوز ائوینده بیله مظلوم ئولنه حیف اولسون
.
.
سسلنوب زینب غمدیده نی اول شاه زمن
دیدی ای تاج سریم خواهر من زینب من
دءی حسینیله ابوالفضله ئولور یعنی حَسن
باخما دقّتله دوداقیمدا دوران قانه باجی
فوری بیر طشت ایله حاضر بو پریشانه باجی
.
.
زینبین آخدی او دم صورته اشک بصری
اوخشادی قارداشینی کنز عفافین گُهری
گتدیلر طشت حَسنون طشته توکولدی جگری
ال آتوب معجره زینب دیدی ای وای حَسنیم
عرشیده فاطمه ده سسلدی لای لای حَسنیم
.
(1) (با تغییراتی در بندها توسط شاعر)
متن دیگر مشابه در هشتک زیر
#گنه_ده_مرغ_دلیم_مهر_و_وفادن_دانیشور
.
.
.
#حسنیه_مدح
#حسنیه_شهادت
#گنه_ده_مرغ_دلیم_مهر_و_وفادن_دانشور
#ترکی
.
✍️ #زبدةالاشعار✍️
.
🆔: @nohe_torki
نظر دهید