شهادت امام موسی بن جعفر (ع)
..
..
سبک #سبک_یارالی_جان_یارالی … 4 سبک #سبک_شهریاریمسن_آقا … #سبک_کربلا_منتظر_ماست …
..
..
مرحوم کریمی مراغه ای
..
..
گورورم گول یوزیوی هر گیجه رویاده رضا
نولی سنده سالاسان بیر آتاوی یاده رضا
..
..
دیمورم آخر عمریمدی اوغول یانیمه گل
دیمورم چکماقا باش قورخولی زندانیمه گل
دیمورم جان ویرورم شام غریبانیمه گل
قویما قالسین بدنیم محبس اعداده رضا
..
..
نه روادی بو قدر آتش محنتده یانام
طاقتیم یوخدی بدنده اوتورام یا دایانام
کاش زنجیریمی دشمن آچا راحت اوزانام
حسرتیم یاتماقا آسوده بو مأواده رضا
..
..
اون بیر ایلدی اوره گیم حسرت غربتده یانوب
گوزومون یاشینه بو توزلی محاسن بویانوب
کُنده ازبسکه سیخوب قان جریاندان دایانوب
حرکت قالمادی ساقین ده هم پاده رضا
..
..
کاش بیر دم آچیلا دردیمه درمان قاپوسی
یتمیشم وصله داخی باغلانا هجران قاپوسی
اون بیر ایلدی یوزومه باغلیدی زندان قاپوسی
نه ملاقاته گلن واردی نه امداده رضا
..
..
سِند بیر ظلم ایلدی باخمادی گریان گوزومه
تیره تار اولدی منیم عالم امکان گوزومه
ووردی بیر سیلی یوزومدن که دولوب قان گوزومه
الینون نقشه سی شاهدی بو سیماده رضا
..
..
نه گناهه ویروب اعدا منه زندان ابد
راضیم عمریمی تئز قورتارا خلّاق ابد
بو سیه چالیدن آخر منه راحتدی لحد
یالقوزام چاره سیزم خسته و افتاده رضا
..
..
راضیم گونده وورا سیلی منه سِند دنی
لیک گوندرمیه زندانیمه مکشوفه زنی
من حیا معدنیم ایتمیه شرمنده منی
نه مناسب بو مکانه زن آزاده رضا
..
..
اولموشام حکم مشیتله بو تقدیره مجاب
آیرلا محرم و نامحرم اولا حفظ حجاب
خام فکریله چکور نقشه منه خانه خراب
شیر حق اوغلونی رسوا ایده دنیاده رضا
..
..
کاش اجلدن من زاره او قدر مهلت اولا
غملی گوگلوم آچیلا بیرده وطن قسمت اولا
اهل بیتیم یغیشا دوریمه بیر قسمت اولا
اؤزومی گورم بیرده یثرب و بطحاده رضا
..
..
کاش بیر صبح نسیمی دگه بو خسته تنه
کاش گون بیر سالا نورین بو یورولمش بدنه
کاش بیر قاصد اولا نامه یازیدیم وطنه
حالیمی شرح ویریدیم سنه طغراده رضا
..
..
منی مسموم ایلیندن صورا هارون دنی
رفع تهمتدن اوتور چیده ایدوب انجمنی
آپاروب خلعت ممتازیله درباره منی
صدر مجلسده سالوب بستر دیباده رضا
..
..
دیدی آرامیمی بو شایعه لر الدن آلوب
دیوری خلق خلیفه بونی زندانه سالوب
بو عم اوغلومدی منیم سنّی گیچوبدی قوجالوب
اوزی بو سلطنته اولمادی دنیاده رضا
..
..
باخمیون فتنه گر اشخاصین عبث صحبتینه
بیر باخون بسترینه خلعتینه عزّتینه
ئولوری ایمدی باخون بو سارالان صورتینه
متهم اولماقا من اولمارام اثناده رضا
..
..
گوردوم ایستور گینه اغفال ایلیه شیعه لری
آلا امضا هامودان گیزلده بو شور و شری
گلدی دکتر گویرن آجوما دوشجک نظری
گوردی زهرین اثرین بو ید بیضاده رضا
..
..
دیدی مسموم ایلیوبلر بونی ای کان جفا
اولدی رسوا او شقی باشینی سالدی اشاقا
ایله که مجلسین اهلین او شقی سالدی یولا
قمچینی آلدی اله سِند زنا زاده رضا
..
..
دیمورم نیلدی اما بودی فکریم گله سن
نعشیمه غسل ویرنده گورسن تا بوله سن
یاناجاقسان بولورم هر گیجه بو نسگیله سن
تازیانه یری مشگل گله تعداده رضا
..
..
نصف شب گتدی او ظالم گینه زندانه منی
تازه دن گردنیمه سالدی غل و جامعه نی
ئولورم گل بالا بغداده گوروم بیرده سنی
قالماسون حسرت وصلون دل شیداده رضا
..
..
گورمیوب بیر بئله زندانی اوغول دور زمن
اون بیر ایلدی که ملاقاتیم اولوبدور قدغن
نه بولن وار یریمی بیر نه گلن وار نه گدن
قانه دوندی اورگیم بو غم عظماده رضا
..
..
من «کریمی» یری وار طبعیمه بالیده لنم
خالقیم لطف ایلیوب شهرۀ هر انجمنم
راضیم ویردیقی نعمت لره شکر ایلیه نم
منی مولا ائده جک هر ایکی دنیاده رضا
..
..
#کاظمیه #کریمی_مراغه_ای #کاظمیه_شهادت #ترکی #زبدةالاشعار
نظر دهید