گوزیم یاشی دونور گوز کاسه سینده قانه یا زهرا #حسینیه_ذاکر_مراغه_ای

قتلگاه
.
#زبدةالاشعار
.
: @nohe_torki
.
ذاکر مراغه ای
.
گوزیم یاشی دونور گوز کاسه سینده قانه یا زهرا
همیشه ساخلارام ماتم شه عطشانه یازهرا
.
گلیدون کاش او گون که یخدیلار آتدان او مظلومی
ائدوبدی زلزله بو گنبد نُه گانه یازهرا
.
یقین گلدون او ساعتده حسینی قویمادون یالقوز
اودم که امری ایستردی یته پایانه یا زهرا
.
گلوب بیرده پیمبر نه ردا نه باشدا عمامه
نه نعلینی ایاقدا چون یانوب هجرانه یا زهرا
.
آتاسی هم نجفدن گلدی دلده شور و واویلا
باخوب یاندی اوغول قلبینده کی پیکانه یازهرا
.
ولی زینبده گلدی خیمه لردن الده بیر دسمال
یتیشدی باخدی بیر اول شاه مظلومانه یازهرا
.
یتنده مقتله زینب گوروب شمر جفاگستر
وئرور صیقل الینده خنجر برّانه یازهرا
.
دوتوب قان گؤزلرین الدن وئروب دنیانی عقبانی
چیخوبدور الده خنجر سینهٔ سلطانه یازهرا
.
یارالی سینیه چیخدی ایاقینده آغیر چکمه
توجه ائتمدی اول سینهٔ سوزانه یازهرا
.
پیمبر آچدی باشین ،گوزلرین یومدی نجف شاهی
دوشوب غش ایلمیشدون سنده بی تابانه یازهرا
.
دلیم یانسین دئسم واضح نه ظلم ائتدی او بداختر
ولیکن زینبون گوگلی دونوب القانه یازهرا
.
ال آتدی دوتدی خنجردن ز بس زور ایلدی قاتل
دئسم دوغراندی بارماقلار دگول افسانه یازهرا
.
دیدی ظالم امان وئر گوزلرینی باغلیوم باری
یارالی قارداشیم جان بذل ائدور جانانه یازهرا
.
نه زینب ال چکوب خنجردن ای صدیقهٔ کبری
نه شمرین رحمی گلدی اول شه عطشانه یازهرا
.
آچوب بو کشمکشده گوزلرین سلطان مظلومان
باخوب بیر حسرتیله زینب نالانه یازهرا
.
بویوردی زینبا گئت خیمه گاهه ال گوتور مندن
بساط صبریمی وئرمه دئدی تالانه یازهرا
.
قیتدی خیمیه اما نئجه،؟ الله عالمدور
اطاعت ایلدی امر شه عطشانه یازهرا
.
گئدوردی گه دونوب گاهی باخاردی سمت میدانه
گوزینده قانلی یاش دونموشدی چون مرجانه یازهرا
.
دونوب بیرده باخاندا گوردی بیر باش نیزه باشیندا
اولوب غالب تجلّاسی مه تابانه یازهرا
.
قاپوندا نوکرم دائم ایشیم ذکر مصیبتدور
همیشه «ذاکرم» ذکریم یتوب شایانه یازهرا
.
منی روز جزاده بی نصیب ائتمه شفاعتدن
رضا اولما یانام من آتش نیرانه یازهرا
.
.
.
#قتلگاه
#حسینیه_ذاکر_مراغه_ای
#حسینیه_شهادت
#گوزیم_یاشی_دونور_گوز_کاسه_سینده_قانه_یا_زهرا
#ترکی
.
#زبدةالاشعار
.
: @nohe_torki