#ای_اوخ …
زبانحال حضرت امام حسین علیه السلام به تیر سه پر در شهادت حضرت علی اصغر (ع)
(این قطعه دو مطلع دارد)
.
.
.
مرحوم هادی تبریزی
.
.
مطلع اول:
گُلَه خلقتده زینتدور گلستاندا تیکان ای اوخ
تیکانسیز غنچیه گُل اول تیکاندان مهربان ای اوخ
.
.
مطلع دوم:
گلوب قربانگه عشقه بو طفل جانفشان ای اوخ
یوبانما گل آخیت قانین ایله ترک کمان ای اوخ
.
.
قاچوب رنگی گرکمزدی گُلون رنگی سولوب قاچسون
طبیعت فطرتی طبعاً گُل ایستر غنچه دن آچسون
بونی خلقت سویوب هر گُل بوداقینه تیکان ساچسون
ساچیل سانجیل گُلَه گُل اول گُل اوستونده تیکان ای اوخ
.
.
قضایه کیم رضا اولسا قضای آسمان بولمز
نشانسیز بی نشانلیقدان صورا آیری نشان بولمز
نشانی اوخ بولر امّا کماندار و کمان بولمز
نشانون تاپ اوتور اگلش نشاندور بو نشان ای اوخ
.
.
وصالین تشنه سی دنیا بویون سو دولدورا ایچمز
گیچر جاندان ولی ئولسه وصال یاریدن گئچمز
قزل قانی یره آخسا قزل گلدن اوخی سئچمز
شهید عشقه زینتدور لباس ارغوان ای اوخ
.
.
بو بیر محو تجلّا دور تجلاّی جمالیلن
کمال عشقه دارا دور تمنّای کمالیلن
قوتار هجرانیدن تاپسون بقا شور وصالیلن
یتوبدور عاشق حقّه زمان امتحان ای اوخ
.
.
یانار اودلاردا گَل قویما سوسوز گلناریم اودلانسون
آخیت چایلار بویی قانین قانیله قوملار ایسلانسون
خوشام بو صود امر اوغلوم سوسوز لب تشنه اوخلانسون
تاپا قان قان دیین اوخدان حیات جاودان ای اوخ
.
.
فنا فی الله اولان ئولمز ئولوم مفهومینی بولمز
دوداقی جز تجلّای حقیقت گورمسه گولمز
حقیقت آختاران حقدن صورا بیر اوزگه سین گورمز
اگر چه قانینی توکسه خدنگ خونچکان ای اوخ
.
.
اسوب یل قوزانوب طوفان بولودلار قان یاغیش آغلار
یره ناحق آخان قاندان دونر قانه آغیر داغلار
حقیقت عاشقی آب حیاته بِل هاچان باغلار
ایچر قانین ولی ایچمز زلال آب روان ای اوخ
.
.
خوشام گلزار سینمده منیم بو غنچه گُل سولسون
گُلوم سولسون خزان گَلسون خزانلا گُلشنیم دولسون
گُلون یرپاقلاری آخگین قانیله ارغوان اولسون
که عشق اهلی پسند ایتمز سارالمیش گلستان ای اوخ
.
.
آغیر داغلار کیمی دورّام دوزوم سینمده چوخ چوخدور
مین اوغلوم اولسا اوخلانسا رضایم من سوزوم یوخدور
که معشوقین بیوک لطفی حقیقی عاشقه اوخدور
یتور پیغام محبوبی حبیبه بی گمان ای اوخ
.
.
بلالی چوللره دوشموش دولونموش ابر غمگینم
قانادی آلتینا آلموش بالاسین شاه و شاهینم
نه تک بو صود امر اوغلوم سنی پیشواز ایدر سینم
بیزه جانبخش سن سانما اولارسان جانستان ای اوخ
.
.
خوشام اُوپسَن بوغازیندان اورک مقصودیوه چاتسان
درین دریا گزنلر تک درین دریالره باتسان
بونون ارزشلی قانینه منیمده قانیمی قاتسان
اولام منده طریقیله بونیله همعنان ای اوخ
.
.
سراغ آل شور عشقیندن اورکده التهابیندن
بولوب گور شوق دیدارین لهیب پیچ و تابیندن
رُبابین گل قان آخدیر سن سولوب سینمیش رَبابیندن
ربابین سینه سین یاندیر ایله اخگر فشان ای اوخ
.
.
بو بیر یوسفدی که دیرلیق بونا آغوش زنداندور
یوزی کنعانه آیدان باش عزیز مصر ایماندور
بهاسین سانما چوخ ارزان که بیر اوچ شعبه پیکاندور
گل آل بو یوسف عشقی یوبانما جان آلان ای اوخ
.
.
آخوب آخگین گوزی گوزده مسیحایه مسیحا دور
دل سینای وحدتده عصای دست موسا دور
آخار قانیله یحیایه بلالی چولده یحیا دور
منیمده قول بو داقیمده گُل رنگین کمان ای اوخ
.
.
قُوولموش «هادی» مغموم بو دنیاده هامی دردن
اولوب مداح آل الله بیزی مدح ایلوری هردن
صله ایستر بو اشعاره همی مندن هم اصغردن
بیز اکرام ایلوروخ اولسون اورکدن شادمان ای اوخ
.
.
.
#اصغریه_هادی_تبریزی
#اصغریه_شهادت
#گله_خلقتده_زینتدور_گلستاندا_تیکان_ای_اوخ
#گلوب_قربانگه_عشقه_بو_طفل_جانفشان_ای_اوخ
#ترکی #ای_اوخ_هادی_تبریزی
#زبدةالاشعار
نظر دهید