شهادت حضرت زهرا (س)
..
..
مرحوم صافی تبریزی
..
..
یارالی فاطمه بیر گل کیمی شکفته لنوب
دوباره سولدی خزان تپراقی باشا النوب
..
شهادتینی دیردی باخاردی باش اوسته
ئولوم تری او دیدوقجا انردی قاش اوسته
..
او گلشن ادبون نَرجسی گوزون یومدی
یوما یوما گوزونی بحر رحمته جومدی
..
گوزونی باغلادی اوّل او قبلۀ ایمان
یوزونی قبلۀ اسلامه دوندروب او زمان
..
قطیفه چکدی یوزینه که گورمه سون یوزونی
وصیّته عمل ایتسون ایتیرمه سون ئوزونی
..
قویوبدی سینه سی اوسته امام قرآنین
ووروبدی معنی قرآن بلینه دامانین
..
قاباقدان حاضریدی صحن خانه ده اصحاب
صحابه آدلاری بیر دسته با وفا احباب
..
همینکه ناله صداسی اوجالدی آنلادیلار
لزوم اولمادی قیلسون امام استنصار
..
سو قزدیروب ویروب اول شاهه گتدیلر تابوت
ایدردی غبطه بو اوضاعه عالم ملكوت
..
ویروبدی غسلینی ترتیبیله امام مبین
حنوط قیلدی او خاتونه ایلدی تکفین
..
گلوب کنارده قویدی یوزونی دیواره
ایدردی ناله آخاردی سرشگی رخساره
..
روایت ایلر امامین او حالینی وَرَقه
دیر که ناظریدیم بو أسفلى مَا التَّفَقَه
..
ادبله عرض ایلدیم ای کَنَندۀ خیبر
ندور سبب که توکورسن بو نوع اشگ بصر
..
مگر ایدوبدی سنى فقد فاطمه محزون
پوزوبدی رنگ رخون روزگار بوقلمون
..
جواب ویردی منی آغلادان نه هجراندوز
نه بو محندی نه بو غصّۀ فراواندور
..
ویرنده غسلینی زهرای اطهرین یاندیم
دوزوب دایاندیم اگر چه اورکدن اودلاندیم
..
گوزوم ساتاشدی او آفت یتن گل ترینه
قولوندا دگدی الیم تازیانه لر یرینه
..
وارام نقدر ایده م ناله بو اودوم سونمز
ئولونجه گلشن و باغه طرف یوزوم دونمز
..
همین بو حالده یتدى حسینیله حسنی
که یعنی فاطمه نون هر ایکی گل چمنی
..
گلوردیلر او ایاق روضۀ پمبرون
بو سوز یتشمیشیدی مَرقَدِ مُطَهَّردَن
..
آچون یولی گلوری فاطمه یتیم لری
دگولدی لازمه هر کس ویره ئولوم خبری
..
نه گوردولر که کفن پوش اولوب آنا بدنی
کنار ایلدیلر بزم ماتمه گله نی
..
سالوبلار ئوزلرینی نعشی اوسته آغلاریلار
بو شیونیله هامی کایناتی داغلادیلار
..
دیردیلر بیزی گر ساقلیقون کیمی آناجان
کناره آلمیه سن ایلروق ئولونجه فغان
..
کنار اولوب کفن آچدی آنا هر ایکی قولون
حمایل ایتدی بیرینه صاقین بیرینه صولون
..
یتوردی لطفیله ناگه آنا بالا یارادان
آتا آیردی او ساعت بالالاری آنادان
..
گجیله گوتدوله زهرا جنازه سین یردن
صحابه صاحبی اصحابیله حسین و حسن
..
بقیعه یتدیلر آماده گورودولر بیر گور
او گوره غبطه ایدر نفخ صور اولونجا قبور
..
امام ایستدى قبره قویا او گل بدنی
مشاهده ایلدی ناگهان او منظره نی
..
کنار اولوب ایکی ال آلدی نعش زهرانی
او حال حیرته سالدی تمام دنیانی
..
اولان او اللره مالک رسول رحمتیدی
آلان امانتی نی صاحب امانتیدی
..
یری واریدی گلیدی بوسس او صاحبدن
مصاحبه سین آلاندا او خوش مصاحبدن
..
ویرنده من بو امانت صحیح و سالمیدی
سلامت اولماقینا اهل یثرب عالمیدی
..
بوله بوله بو رسول خدا امانتیدی
ایکی قولوندا یوزونده بو نه علامتیدی
..
تُراب تیره اولوب گرچه خوابگاه بتول
قالوب قیامته دین گویده دود آه بتول
..
روادی کیم عَلَنی حقّی غصب اولان زهرا
نهان خزینه کیمی ایلیه قبول خفا
..
امام قبرینی بیر علّتیله گزلتدی
او باره ده حسنینی ئوزونی دینجتیدی
..
ایدوب حسین ئوزی «صافی» بو طبعوی سرشار
یازوبدی کیم بله کیفیت «خزان و بهار»
..
قبول اولونا اگر توشۀ قیامت اولور
الونده حشرده سرمایۀ سعادت اولور
..
..
..
..
#فاطمیه #صافی_تبریزی #فاطمیه_شهادت #ترکی #زبدةالاشعار
نظر دهید