یارب تمام عالم و آدم سنونکیدی – #حسینیه_رجایی_تبریزی

عرض حال و مناجات حضرت اباعبدالله الحسین (ع) در قتلگاه
.
زبدة الاشعار

?: @nohe_torki
.
مرحوم سید محسن رجائی (مجنون)
.
یارب تمام عالم و آدم سنونکیدی
کرسیّ و عرش و فرش و دو عالم سنونکیدی
.
خُلد برین و کوثر و تسنیم و سلسبیل
حور و قصور و نار جهنّم سنونکیدی
.
ذرّات کایناتیده بو نظم و انتظام
اَجرامیده بو سرّ منظّم سنونکیدی
.
سن واجب الوجود سن ای ذات لایزال
هر ممکن الوجود اولا اَز دَم سنونکیدی
.
چون بسته دور بو عزّت و ذلّت مشیّته
جان پریش و خاطر خرّم سنونکیدی
.
مین بیر آدیله آدلانان ای باریُ البَدیع
سنسن یقین اسامی اعظم سنونکیدی
.
هر نغمه ای که اوج ائده بو ساز دهریدن
خوش نغمه دور که زیر سنون بم سنونکیدی
.
اِعجاز محکم ید بیضای موسوی
انفاس قدس عیسی مریم سنونکیدی
.
الهام و وحی و معجزۀ کلّ انبیاء
نوح و خلیل و حضرت آدم سنونکیدی
.
منده سنون علیده سنون مجتبی سنون
زهرا سنون پیمبر اکرم سنونکیدی
.
حاشا دیله بو مرحله ده لفظ “مَن” گله
من بیر نیِ شکسته ولی دم سنونکیدی
.
حزن و طرب مقام محبّتده بیر گلر
کُنج دلیمده عشق سنون غم سنونکیدی
.
عشقون چکوب بو قافله نی نینوایه چون
قلبیمده کی بو شور دمادم سنونکیدی
.
من عاملم بو صحنه نی انجام ائدم ولی
عاشور و کربلا و محرّم سنونکیدی
.
من ساتموشام سن آلموسان ای قانه مشتری
بیع و شرادی بیش سنون کم سنونکیدی
.
سنگ صبور اهل حرم زینب حزین
عمرونجه هر مصیبته همدم سنونکیدی
.
لیلا سنون، رباب سنون، شاهد اُول اوزون
گُل تک سولان او تشنه رقیّم سنونکیدی
.
افتاده سرو گلشن دین اکبریم دگُل
جسمیمده کی بو روح مجسّم سنونکیدی
.
سقّا کنار نهریده گر تشنه جان وئروب
سن سُووموسن فراتیله علقم سنونکیدی
.
اصغر دگُل که قان دوزولوب روی زردینه
برگ گُل اوسته قطرۀ شبنم سنونکیدی
.
شمر و سَنان نه جرئت ائدر باشیمی کسه
شمشیر و تیر و نیزه مُسَلَّم سنونکیدی
.
نی تک اگر سیزیلدیه سینمده یاره لر
من شاکرم که زخمیله مرهم سنونکیدی
.
بَجدل روا دگل که بو گون نااُمید اولا
بیر یرده که نگینیله خاتم سنونکیدی
.
گر خیمه لر شراره چکه عابدیم یانا
من راضیم شراره و مخیم سنونکیدی
.
عشق اولسون عشقوه سنون ای آبروی عشق
عشق عالمینده نام معلّم سنونکیدی
.
بیزدن سلام اولا سنه ای شاه مستضام
یاندون اگر چه دجله و زمزم سنونکیدی
.
باخ قانوین بهاسینه تا سیر ائدر جهان
هر گوشه ده مجالس ماتم سنونکیدی
.
هانسی شهون جهاندا سنون تک جلالی وار
هر یرده کی اسر قره پرچم سنونکیدی
.
محزون آدون گلنده اؤرکلر صفا تاپار
بس دلنشین دی تا غم مدغم سنونکیدی
.
تا ریسمان عشقیوه بیز چنگ ویرمیشوق
آسوده یوق که عُروۀ محکم سنونکیدی
.
#مجنون خوشا سعادتیوه شکر قیل مدام
بزم عزاده دیدۀ پُر نم سنونکیدی
.

#حسینیه_شهادت
#قتلگاه
#یا_رب_تمام_عالم_و_آدم_سنونکیدی
#سیدمحسن_رجائی
#ترکی
.
#زبدةالاشعار

?: @nohe_torki