حالات شام غریبان امام حسین (ع)
#ای_صبح_آچلما
.
.
✍️ #زبدةالاشعار ✍️
.
🆔: @nohe_torki
.
مرحوم حاج حیدر خوندل
.
یوزدن آتوبدی پرده گینه شاهد بهار
اعجاز نخل طور گتورموش درخت نار
.
دریای رحمت ازلی فیض بخش اولوب
ابر بهار گلشنه گوهر ایدور نثار
.
هر دم که زلف سنبله ایلور صبا گذر
واقعده رشک چین اولوری دشت و لاله زار
.
غنچه آلوبدی باد سحردن دم مسیح
ایلور نموّی آیت توحیدی آشکار
.
مخمور ایدوبدی هر گورنی نرگسون گوزی
حیران اولوبدی نرگسه مین نرگس خمار
.
شبنم ایله غروریله گل اوسته اگلشوب
گویا که ایلیوبدی عرق عارض نگار
.
گلشنده تا که غنچۀ سیراب آچوب دهن
پنهان ایدوبدی ناقه سینی آهوی تتار
.
عقد گھر قیروبدى یقین رعد ابردن
بی شبهه یاغدیرور چمنه درّ شاهوار
.
داده شقایقون دیمورم داغی وار ولی
رنگیله نکهتی ایلیوب ارغوانی خوار
.
بیر گلستان طراوتی وار بیر قزل گلون
اما هزار حیف اولوب همنشین خار
.
دنیا بیر اصلدندی اونون یوخ مذمّتی
باهمدی عیش و غصّه گل و خار و گنج و مار
.
شاهد ثبوت عرضیمه بو نکته دور منیم
ناچار اولام گرگ بو گلستانیدن کنار
.
بیر گلشن عطرینی آلورام کربلاده من
بلبل لرین سنوب پری آغلولّا زار زار
.
خندان ایدوبدی گللرینی صرصر جفا
قان شبنمی او گل لره مین شرح غم یازار
.
جبراً کسوب علاقه سینی عندلیب لر
زاغ و زغن گزور او گلستاندا کامکار
.
بیر گل که فخر ایدردی اونا باغبان دین
دشمن ایدوبدی پر پر اولوب قانی جویبار
.
بیر نوشکفته گل گورورم برگ برگ اولوب
بیر عندلیبی وار که ایدر ناله چون هزار
.
بیر غنچه وار که لعل لبین سوندوروب عطش
وار بیر جهان تأسّفی خاره اولوب دچار
.
بیر سرو وار سو اوسته یخوبلا جفائیله
بیر قامتنده عالمه مین رستخیز وار
.
بیر گلشنه خلاصه سموم خزان اسوب
بیرده بهار گورمز اگر اولسامین بهار
.
گلشن دگل او ذکر اولونان قتلگاهیدور
بلبل دگل اولار که ایدر خون دل نثار
.
بیر عده آشیانی یانان طایر حرم
یعنی حسین عزیزه لری خرد و هم کبار
.
فکریم بودور فجایع آل امیه نی
تشریح ایدم قلمده اگر اولسا اقتدار
.
چون کربلاده امر شهادت تمام اولوب
کام یزیده دور ایلدی چرخ کجمدار
.
ئولدی ئولن سویوندی خواتین محترم
تاراج اولوب جلال شهنشاه تاجدار
.
یاندی یانان آلندى غنائم گیدن گیدوب
تللر باتوب دوتولدی هوا قوزانوب غبار
.
بانی اولان بو مطلبه بیر شخصیدور اوزی
منسوبدور حسینه حسینیدی اشتهار
.
«اشراقیه» ویروب بو سوزون نسبتین ولی
چوخ دلنشین خبردی بو قطعا صحیح اولار
.
باخدی بتوله نایبه پژمرده قیزلارا
بیر آشیانه سیز قوشا بنزردیلر اولار
.
بیر منزلی خیال ایدوب آل پیمبره
بیر کربلا چولین دولانوب زار و دلفکار
.
بیر خیمه نیم سوخته قالموشدی گوئیا
شه بارگاهین اوندا که یاندیردی اهل نار
.
منزل معین ایتدی همین خیمه نی خانم
داخل اولوب او خیمیه هم خورد و هم کبار
.
چولدن على قیزی سویولان قیزلاری یغوب
بیر بیر گلوب اولوبلا او مجلسده سوگوار
.
خرگاه شه یاناندا قاچانلار قیتدیلر
جمع اولدیلار او خیمه ده هم خورد و هم کبار
.
زینبده بیر شهامته باخ عز و شأنی گور
بیر خدمت ایتدی ایلدی اسلامی پایدار
.
اوز نفسینی حسینه فسدا ایتدی واقعاً
ایفای عهدیده واریدی چوخ چوخ استوار
.
بیمار امامی خیمه ده بیر گوشیه سالوب
تبدن وجود اطیبی اولموشدی چوخ نزار
.
بیماره رختخواب سالولّار بو رسمدور
هم فرضدور دوا و غذا شربت گوار
.
بیر نکته وار بو یرده منیم فکریمه گلور
شرح ایلسم اونی دل زهرانی یاندیرار
.
بیماره سالدی زینب کبری نه رختخواب
نه فرش ونه چراغ و نه بیر طبیب وار
.
القصّه پر شکسته پریشان بالالاری
اطرافینه یغوب توکوب اشکین سحاب وار
.
تا گوردیگر امان او امانسیز یتیمه لر
آسوده دل انین و فغانه دل آچدیلار
.
گیچمشلرین خیاله سالوب داده گلدیلر
اولدی او دل شکسته لره محشر آشکار
.
ناله سیزیلتی اوج ایلدی چرخ اطلسه
دوتدی عزا ئولنلره آل شه فخار
.
درده دچار اولان بالالار گلدی رقته
دردین دیردی زینبه اطفال داغدار
.
بعضی دیردی عمّه بو گون چوخ یورولموشام
غارتده چوخ یوروب منی بو فرقۀ شرار
.
بعضی دیردی عمه آجام گلموری یوخوم
من شاهزادیم سنه واضحدی آشکار
.
بعضی نشان وئرردی یارالی ایاقلارین
سویلردی عمه قان ایاقمدان گینه آخار
.
بعضی الین قویاردی یارالی دوداقینه
ایلردی ناله اشکین ایدردی یوزه نثار
.
بعضی قولوندا قمچی یرین گوستروب دیدی
چوخ زحمته سالوب منی بو جسم زخمدار
.
بعضی دیردی عمه منیم یوخدی معجریم
باشیم آچوخدی زلفیم اولوب ساتر عذار
.
بعضی دیردی آلدیلا خلخالیمی بو گون
زهرا قیزین مگر آدی اسلام اولان سویار
.
زینب نلر چکوبدی اونی بیر خدا بولر
دوزدی گلن بلایه او زهرایه یادگار
.
بیر نوعیله خلاصه تسلّی ویروب خانم
گوز یاشلارین سیلردی پریشان و اشکبار
.
چوخ رأفتیله باشلارینا ال چکوب دیدی
یاندیرمیون منی اورگیم اود دوتوب یانار
.
شیرین دلیله آلدی شکسته گوگللرین
بیر بیر یاتورتدی قیزلاری اول معدن وقار
.
اصرار ایدوب زبسکه خواتین عصمته
راضی اولوب خلاصه بویوکلرده یاندیلار
.
آل رسولیدن بیر اوزی قالدى بیر قالان
کلثومیدی شکسته دل و زار و دلفگار
.
بیر بیرلرینه توصیه ایلردی یاتماقا
بو ایکی مهربان باجی پژمرده حال و زار
.
آخر یاتورتدى عجزیله کلثومیده خانم
بیر ظلمت شب اولدى قالان بیر او باوقار
.
راز و نیاز ایدوب صورا بیر آز خدائیله
دوتدی محلّ صبحه یوزین دلده آه و زار
.
بو دللریله ایتدی افق سمتنه خطاب
ای صبح آچلما ایتمه من زاری شرمسار
.
ای صبح آچلما رحم ایله بو خسته قیزلارا
غارتده چوخ یوروب بولاری فرقه شرار
.
ای صبح آچلما رحم ایله بورقون بالالارا
قوی استراحت ایلیه اطفال گل عذار
.
ای صبح آچلما لیلی محزونه رحم ایله
اکبر غمی آیلسا اونی ایلر انتهار
.
ای صبح آچلما قاسم آناسی آیلسا گر
اوغلون سالار خیالینه دنیانی یاندیرار
.
ای صبح آچلما گر آییلا بینوا رباب
آغلار علیّ اصغرینه ایلر آه و زار
.
ای صبح آچلما حالت کلثومه رحم قیل
سقّا غمی آیلسا اونی ایلر اشکبار
.
ای صبح آچلما معجری یوخ باشدا زینبون
ساتردی گورموسن یوزونه زلف مشکبار
.
ای صبح آچلما گر بو گجه ایله سن طلوع
اوضاع محشری گینه ایلرسن آشکار
.
«خوندل» سرشگ نابیله سیراب اولوب قلم
علت اودور نثار ایدوری درّ شاهوار
.
توفیق حقّدن ایسته توجّه حسینیدن
یاز صبحنی همان گجه نون ایله انتشار
.
#شام_غریبان #خوندل_تبریزی
#یوزدن_آتوبدی_پرده_گینه_شاهد_بهار
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید