شهادت امام رضا – سوال و جواب
:::زبانحال حضرت امام رضا (ع)
#ویردیلر_زهر_عداوت_اولدى_باغریم_قان_اوغول_گل
.
:::زبانحال و جواب امام جواد (ع)
#ای_بابا_چوخ_حسرتیله_باخما_بو_یوللاره_گلدیم
.
✍️ زبدة الاشعار ✍️
.
🆔: @nohe_torki
.
مرحوم تائب تبریزی
.
ای بابا چوخ حسرتیله باخما بویوللاره گلدیم
گوزده گوز یاشیم سنیله طوسده دیداره گلدیم
.
.
گوشه غربتده بولدوم یار غمخوار آختارورسان
درد دل ایتماقه کشف حاله دلدار آختارورسان
درد آلوب درده یتن بیر باوفا یار آختارورسان
اولماقا غمخوار منده درد آلان غمخواره گلدیم
.
.
غملوسن سن – غملیم من سانما دردیم یوخدی دلده
درد هجرانون جواده باور ایت مین اوخدی دلده
منده سن تک دردمندم بسکه دردیم چوخدی دلده
سالماقا مرهم یاراوہ منده دلده یاره گلدیم
.
.
قیدیوه باخما قالان یوخ قیدیوه قاللام اوزوم من
ایل اوزاق یاده سالان یوخ یادیمه ساللام اوزوم من
دردیوی دلدن آلان یوخ دردیوی آللام اوزوم من
اولماقا محنت شریکی سن کیمی دلداره گلدیم
.
.
بیر بلالی باغبانسان دوشموسن آیری گلیندن
بیرغریب باغریقانسان یوخ خبر خویش و ایلیندن
من اوزوم اولام وفالی باخبر درد دلیندن
دردیوی آلماقه شهر طوس محنت باره گلدیم
.
.
باشون اوسته سانما هرگز آغلارام دویّام بلالی
قانه دونموش قلبی تیر دردیله اویّام بلالی
بوس ایدوب لعل لبوندن یوزیوزه قویّام بلالی
بو یولون اوستونده توکدوم اشگیمی رخساره گلدیم
.
.
قلبون اودلأنماز دیردون حالوه اولسا یانانون
اسکیلر دردون اورکدن دردیوی اولسا آلانون
دور باشون اوستونده آغلار نوجوان مهربانون
مهر فرزند و آتالیق ویرماقا اظهاره گلدیم
.
.
شعله شمع وفایه بال چون پروانه چالام
آتش مهره یانوب قول بوینوا رأفتله سالام
بیر اوپوب گل تک یوزوندن بیر دویونجا عطرون آلام
آلماقا عطر بهشتی بو گوزل گلزاره گلدیم
.
.
زهر کین قلب شریفون ایلیوبدور پاره پاره
آتش زهریله واردور اودلی قلبونده شراره
گوزده اشکون دلده یاره دعوتون وار بزم یاره
سن گیدرسن یاره مهمان منده دیدِ یاره گلدیم
.
.
واقفم نچه زماندور دوشموسن ایلدن کناره
درد هجرانه سورسن ایتماقا وصلیله چاره
آغلاما آغلار گوزیله باشیوی آلام کناره
ایتماقا دیداریویله درد هجره چاره گلدیم
.
.
بیر مریض عشقوم من وار دلیمده درد هجران
داغ درد هجریویله لاله تک باغریم او لورقان
بیله اودلی درد هجره وصلون ایلر یاخشی درمان
آلماقا سندن طبیبم درد هجره چاره گلدیم
.
.
آز جوانون سسله آغلا توکمه گوزدن اشک حسرت
صوت قرآنه علاقون چوخدی ای رکن شریعت
صون نفسده باشون اوسته ایلرم قرآن تلاوت
ذکر قرآنیله آچدیم لعل لب گفتاره گلدیم
.
.
سن دیمه غر بتده ئوللم حسر تیم واردی فراوان
کیم غریبه سینه داغلار کیم ایدر چاک گریبان
من دوتوب عالی عزاوی ساخلارام شام غریبان
دوتماقا شام غریبان سن کیمی بی یاره گلدیم
.
.
طوسدن بیر لاله درَّم یثریه اولام روانه
ارمغان سندن آپارام اوز الیمده یانه یانه
سویلرم مظلوم آتامدان بو گلی گتدیم نشانه
باغریقان گوردوم بابامی یاندیم آه وزاره گلدیم
.
جان ویرنده گرچه عمَّم اولمیوبدور باشون اوسته
باجیلار تک ناله ایتسون قارداشا اول زار و خسته
من وارام عمَّم یرینده ای بلالی دلشکسته
بیله ساعتده نیابت ایتدیم اول دلزاره گلدیم
.
.
در دیله معصومه عمَّم فرقنونده اولدی همدم
ایلیوب ترک مدینه سندن اوتری حالی برهم
دلده آدون شهر قمده ویردی جان مظلومه عمَّم
عمَّه مین هجرینده درده آغلادیم همواره گلدیم
.
.
نه بی بیم گلدی گوریدون ایلییدون اونلا صحبت
نه سنه اولدی زیارت ایتماقا اوز قبری قسمت
من گیدوب قیلام وفالی عمّه مین قبرین زیارت
سویلَرم عمّه سلام یاری گتدیم یاره گلدیم
.
.
گور منم معصومه عمّم جان ویرنده زار و خسته
باغرینا باسمشیدی جان تک نامه وی ای دلشکسته
قانلو بیر کوینکده عمّم زینب آلدى سینه اوسته
یاد ایکی عمَّمدن ایتدیم دردیله گفتاره گلدیم
.
.
تائبا سن واسطه سال بو آتائیله بالانی
ذات حىّ ذوالمنندن آل برات کربلانی
جمعیله گیت قیل زیارت قبر شاه نینوانی
عرض ایله چاووش اولوب بو دستۀ زواره گلدیم
.
.
#سبک_ای_ویرن_ویرانه_یرده … 3 سبک
.
.
#رضویه_شهادت
#ای_بابا_چوخ_حسرتیله_باخما_بو_یوللاره_گلدیم
#تائب_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید