ای عزیز جان زینب گیتمه قارداش دور اماندور #وداع_فرقانی

وداع حضرت امام حسین (ع)
.
.
مرحوم فرقانی تبریزی
.
.
ای عزیز جان زینب گیتمه قارداش دور اماندور
وار آنامدان بیر وصیت بیر قدم ساخلا دایان دور
.
.
صبر قیی ایله تحمّل محتضر پاکه یتوم گیت
محضر پاکونده باری عرض حالی عرض ایدوم گیت
خاک پاک پایون آخر ای برادر بیر اؤپوم گیت
دیزلریمده یوخدی طاقت گلماقا قارداش یوبان دور
.
.
ای رضاسی حق رضاسی منده دلدن چوخ رضایم
چونکه بو امره شریکیم یوخدی بیر ذرّه گلایم
گر یته دنیاجه محنت تابع أمر قضایم
ای قضای حقه راضی، هر غمه تسلیم اولان، دور
.
.
جرعۀ جام الستی سنکه ایچدون منده ایچدیم
جملۀ بو ماسوادن سنده گیچدون مندہ گیچدیم
ملک دلده صبره جامه سنده بیچئون منده بیچدیم
صبرون آلّام اختیارین صبردن آلّام عنان، دور
.
.
وقت رحلتده آنام چون ایلمشدی بیر وصیّت
تا بحال اولموردی قارداش سویلماقه موقعیّت
ویر اجازه یاخشی وقتدور بزم رازه اولدی خلوت
بیر اؤپوم سالم بوغازون وقت فرصت بو بیر آندور
.
.
اول پیاده ای عزیزم باشیوه دونّم دولانّام
سن بلورسن فرقتونده آتش هجراندا یانّام
هر بلا گلسه یولوندا جان دیوب دلدن دایانّام
لطف قیل بو بینوانی باشیوه سنده دولاندور
.
.
من دیمم شامات سیری زینبه قارداش گراندور
پاسبان یولّاردا گر چه خولی و شمر و سناندور
شام تک یتسه جهانون هر بلاسی نوش جاندور
شامیان، شامی دور، امّا بی دوا زخم زباندور
.
.
فرقت احبابه دوزماخ، دلده دریا، قوّت ایستر
گورماقا دیدار یاری بس دیار غربت ایستر
چوخ مشقّت، چوخ اذیّت، چوخ بلا و محنت ایستر
هر بلا و هر اذیّت حق یولوندا نوش جاندار
.
.
ویرموسن دلداریوہ جان گیت بوعشقه من بنازم
ویرماقا باش تشنه اما حیف اولامن بی نیازم
نار هجرانینده منده هم بسوزم هم بسازم
سوزش آرتسا، صبریم آرتار سازش فرقت یاماندور
.
.
بو دیار کربلاده یتدی هر بیر نوع مصیبت
بیر به بیر من سنله ایتدیم هر مصیبتده شراکت
آرتاجاق سندن صورا چون دمبدم چوخ درد و محنت
سهل سانّام من ولیکن شغلی لیلانون فغاندور
.
.
بلمور اطفالون قاباقدا وارحسینیم قید زنجیر
خیمه لرده گوردون اولموش غصّه دن جمله گلوگیر
گرچه بلّم من ازلده ایلمش حق بیله تقدیر
بُلسه نیللّر اوشاقلار ساربانلار پاسباندور
.
.
زحمت اولدی چوخ یوباندون یوخ بولطفین انتهاسی
حلقۀ چشمیم رکاب ایت آرتا قوى چشمیم ضیاسی
منّتین زهرا آنامه قوی برادر منتهاسی
شاد قیل جنّتده قارداش روحنی چوخ ناگراندور
.
.
چکمور ال «فرقانی» ایستور بو جهاندا بیر زیارت
آخرتده بو زیارت اولسون عنوان شفاعت
سنده نومید ایتمه قارداش لطف قیل ایله کرامت
دائما بیز اهلبیته ندبه ایلر نوحه خواندور
.
.
#وداع #فرقانی #حسینیه_وداع #ترکی #زبدةالاشعار