در عزیمت حضرت اباعبدالله (ع)
و شهادت حضرت علی اصغر (ع)
.
.
شاهی اردبیلی
.
.
چیخوب خیمه دن بیر سوسوز شهریار
ساغیندا صلابت سولوندا وقار
ائدر حلقی افلاکه عطرین نثار
پاریلدار جبینینده تمثال یار
چالیخلار قوجاقینده بیر شیرخوار
.
.
.
او سلطان معنی آتار هر قدم
اوپر مقدمیندن وجود و عدم
اونا روحلر جان دییر دم به دم
اونا گر بشر سویلسم مرتدم
بشر مثل سیز اولماز ای هوشیار
.
.
.
مگر دورد عنصردی بو عرش جاه
که بش حسّیلن درک اولا گاه گاه
سه بعد دو عالمده سیغماز بو شاه
ملک حشرده بیر بودور بیر الاه
او گون گورسنر بوندا کی اقتدار
.
.
.
انوب روح روح القدس میدانا
باخار، اول عبا گیمیش الرّحمانا
گورر حضرتین حسنی گلمور سانا
برابردی هر کیپریگی مین جانا
دوشوب حیرته سویلر ای کردگار
.
.
.
کرامتدی حکمتدی عرفاندی بو
آیاقدان باشا جوهر و جاندی بو
سپهر اهلیدی یرده مهماندی بو
داشا دونسون اعرابی عطشاندی بو
گوروب لبلرین غنچه باغرین پارار
.
.
.
بونون تا باتیردا یولوندا توزی
سپر ژاله بش مرسلین اون گوزی
آدیلان بونون باشلاسون هر سوزی
اولار هر سوزون سبّح اسمون ئوزی
کلیم ایلییر کلموه افتخار
.
.
.
بونیلان تاپار عشق و عرفان ثبوت
بو باخسا یموته اولار لایموت
آدین ذکر ائدیب بیریول ائتسون سکوت
یتیشمز او بیر ذکره یتمیش قنوت
او بیر یدّی گنبددن ایلر گذار
.
.
.
بونون وار قوجاقینده بیر صودامر
وئروب آلتی آیدا نشان یوز هنر
دوداقی شکر دور یوزی برگ تر
عطشدن یانوب حیف اول گل شکر
آچانمور گوزین حیف اول گلعذار
.
.
.
گلویی که دارد همین طفل مست
چو نازک ترین شعر، نازک تر است
رخش گر ببینی شوی رخ پرست
لبش دید بسم الله و عهد بست
که در نقطه رازش کند استتار
.
.
.
چو مژگان نهد برهم این طفل ماه
صدا خیزد از خاک و سنگ و گیاه
که ای رود پر موج، رویت سیاه
چه بد دیدی از حلق فرزند شاه؟
که یک قطره آبش نکردی نثار
.
.
.
اولوب نیمه جان گرچه اول بانمک
او جان خیردور شعبانون نصفی تک
یاریم ایلده بیر حال تاپوب اول چیچک
یوز ایل طاعت ائتسه تاپانماز ملک
او حال آلمیش اهل سمادن قرار
.
.
.
سؤال ائتسه هر کیم ندور روح ناب
بونون صورتین گوستر آلسین جواب
یوز ایل باخسا دویماز بونا ماهتاب
نجه چکدی ال دویدی بوندان رباب
نجه ایلدی عرصیه رهسپار
.
.
.
بونا روح ریحان باخور دویمیور
بونا عرش رحمان باخور دویمیور
بونا علم و ایمان باخور دویمیور
بونا شاه عطشان باخور دویمیور
بو اما دویوب عمردن اولدی زار
.
.
.
حسین که اولوبدور احد مظهری
قدم قویسا تیترر اُحد پیکری
حسین که سالوب لرزیه محشری
باخاندا بو طفله اسر دیزلری
ائدر آهیلن قلب ائوین شعله بار
.
.
.
غرض یتدی میدانه خیرالبشر
قوجاقینده روح نماز سحر
دالیندا دوروب هم قضا هم قدر
قاباقدا ائدوب عزم اوتوز مین نفر
که ائتسون اوتوز جزو قرآنی خوار
.
.
.
او قرآن گلیب نطقه با لحن نور
دئدی گرچه سینم یانور چون تنور
اشاریله امر ائتسم ای اهل زور
توکر آلنوزا داش هوادن طیور
او هیبتلی صف لر اولار تار و مار
.
.
.
نه ایلر منیم حلقیمه تیغ کین
بو حلقی اوپر روح روح الامین
منى نفی و انکار ائدر هر لعین
اولوب منکر مالک یوم دین
دونوب فطرتیندن آلوب ننگ و عار
.
.
.
نه باکیم منیم، دشمن دونیدن
خطر یوخدی معصومه ملعونیدن
منی قورخودان خنجر و خونیدن
گونی قورخودار نون قارونیدن
گولر عقل و ادراکینه مور و مار
.
.
.
الف تا که وحی اولدی همراه لام
چتین گلدی اعرابه فهم کلام
ائدون فهم و درک ای گروه ظلام
الیمدور «الف لام» معنی بالام
بو معنی عطشان اولوب داغدار
.
.
.
بونا دشت پهناور اولموش قفس
بونون پوزدی عمرین غم زودرس
بونون پیکریندن آغیر دور نفس
نفس چکمگه بوندا یوخدور هوس
بونا قنداقین قبر ائدوب روزگار
.
.
.
آدین ای قویانلار عظام و رجال
ئوزوز غیرتوزدن ائدون بیر سؤال
روادور گورون اون مین اهل قتال
ائده بیر سوسوز صود امرنن جدال
ایشیق گوندوزین ایلیه لیلی تار
.
.
.
سوزوب گویده ناگه بیر اوخ چون شهاب
دئدی وئرّم الان بو شاهه جواب
اوچیدی هله گویده اوخ چون عقاب
که دیسگیندی ئوز خیمه سینده رباب
دئدی جان بالا، اولدی بی اختیار
.
.
.
آچوب بیر قرا یل هواده قناد
یتیشدی او پیکانه اول تندباد
دئدی مقصدوندن دون آی کج نهاد
تو را دید، زهرا و معجر گشاد
تو افکنده ای لرزه در کوهسار
.
.
.
دئدی قوشلار ای یل بالیخ مثلی اوز
و یا آچ قناد، ایلدیریم مثلی سوز
اوجا داغلاری بیر به بیر کوکدن اوز
گتیر بو اوخون خط سیرینده دوز
یولون سد ائله قویما ائتسین شکار
.
.
.
چیخوب قل هو اللهیلن جنگه اوخ
بوتون ممکناتی سالوب تنگه اوخ
بولردی توخانسیدی گر سنگه اوخ
یاخینلاشدی حلقوم خوشرنگه اوخ
دئدی السّلام آی مبارک تبار
.
.
.
نه رفتار ائدیم سنله ای دلنواز
سنه سجده ایلر بوتون اهل راز
سنی اؤپسه نوح نبی ای بوغاز
گناه ایلیوب اولسا بی دستماز
من اؤپسم سنی حشر اولار آشکار
.
.
.
وئروب رخصت اول حنجر دلنشین
که اول قان توکن اوخ قوتارسین ایشین
سما ساخلادی سیردن گردشین
هدفدار ائدوب گویده اوخ جنبشین
او جنبش ائدوب کعبه نی سوگوار
.
.
.
دگوب یاردی اوخ تا گلین حنجرین
چکیب فوری گل صاحبی خنجرین
کسوب بند قنداقینی اصغرین
دئدی راحت اول ای نکو روترین
چالوب ال ایاق عمر الیندن قوتار
.
.
.
چکوبسن گوزه سرمدی سرمه نی
بو حالیله یات ای جنان سوسنی
رها ائتدی آخر سوسوزلوق سنی
رها ائتمور اما خجالت منی
اوغول شرمسارم اوغول شرمسار
.
.
.
تیمّمده عیناً نجه بیر عمل
ائدر نظمیلن هم بو ال هم او ال
اوجور چهره مه چهره وی قوی اَوَل
سورا منده تکرار ائدیم ای گوزل
منه سن خمار اول سنه من خمار
.
.
.
ائله بوردا سرمست اولاق ای ملک
یوزوم گلمیور خیمیه عزم ائدک
بیزی گورسه هر قیز اسر چون لچک
دوشر تپراقا روح سیز کولگه تک
گویه ناز ائدن قیز اولار خاکسار
.
.
.
#اصغریه #شاهی_اردبیلی #اصغریه_شهادت #ترکی #زبدةالاشعار
نظر دهید