زبانحال امام حسین در بالین جناب علی اکبر
..
..
عینی فرد زنجانی
..
..
ای هاشمیلر جان ویروب اوغلوم حمایت ایلیون
جسمون خیامه حمل ایدون هجرینده طاقت ایلیون
..
..
باغ حیاتمدن منیم اوّل گولومدی دردیلر
پرپر ایدوبله پیکرین میدان ایچینده سردیلر
ویردیم سلامت اوغلومى ئولدوردولر قیتردیلر
حمل ایلین وقته بالام جسمینی دقّت ایلیون
..
..
بُلّم نه واردی ای منیم یارانیم آه عشقده
بیر آه چکدوم اکبریم گوردی نگاه عشقده
طاقت گتورموب اذن آلوب ئولدى بو راه عشقده
تعبیرینه تفسیرینه عشقنده حیرت ایلیون
..
..
اوّل علی اکبری ویردوم شهادت کامنه
عین عدالتدور علم وردوم عدالت بامنه
فکر ایتمسون عالم سیزی سالدوم بوجنگون دامنه
بعداً دیوم اولادیمه بطحایه رجعت ایلیون
..
..
مِن شِدَّتِ عدلینده اوز جانین قویانین اوغلیام (1)
اوّل گرک اوز اوغلومون هجرینده سینه داغلیام
بعداً گوزل انصاریمون قتلینده یالقوز آغلیام
اصل مرامیمدور منیم خلقه حکایت ایلیون
..
..
ای هاشمی لر هاشمی لر غیرتی مشهور اولوب
دین اؤسته غیرت گورسداخ قطعاً بیزه مقدور اولوب
بیر عدّه لر الده قلج نیزه داخی مأمور اولوب
بو چولده ئولدورسون بیزی اظهار قدرت ایلیون
..
..
طاها شبیهین ئولدورن معلومدور انسان دگل
زهرا بالاسین آغلادان جز آل بوسفیان دگل
قرآن الینده جنگ ایدور هیچ قائل قرآن دگل
گور بیر کیمیله روبرو اولدوم عنایت ایلیون
..
..
بو قلبنون بندین گورون بو سرنوشتیمدور منیم
اوغلوم ئولوب من آغلورام خوشحال اولوبدوردشمنیم
آلدوم قوجاقه اکبری قانه بلشدی دامنیم
نیلوم سوروشسا قزلاریم سیز شرح حالت ایلیون
..
..
اکبر دگل مه پاره دی مه پاره یوخ بیر آفتاب
قاندان سالوب رخسارینه دست شهادتلن نقاب
ئولم بالام ئولدى یقین دنیانی کاش اولسون خراب
اعضاسینی یغدوم عبایه من زیارت ایلیون
..
..
تز حمل ایدون گل پیکری چوخ انتظارین وار چکن
زینبده وار صبر علی خوی حسین حلم حسن
طاقت گتورموب مقتله قاچدی باجیم اول صبریلن
مخیمده ایندی گور نه وار گتمکده سرعت ایلیون
..
..
قورخوم بودور اولسون آناسی خیمه لرده بی قرار
من بیله احواله قالاندا ای منه انصار و یار
گر باخبر اولسام ئولوب لیلا آناسی حقی وار
پیشوازه گلسه قزلاریم مشمول رأفت ایلیون
..
..
زینب بو عینی فرده سن ویردون ایوینده آبرو
آلما الیندن حشره جک بیچاره دور دنیاده بو
هر شهریده وار صحبتی هر بزمده وار گفتگو
الله یانندا هر ایکی عالم شفاعت ایلیون
..
(۱) قُتِلَ عَلىٌّ لِشدَّت عَدالَتِهِ: علی از شدت عدالتش کشته شد.
..
..
..
نظر دهید