شهادت حضرت علی اکبر(ع)
..
..
مرحوم یحیوی اردبیلی
..
..
یتدى بو غملو خبر لیلی خونین جگره
اکبرون نعشینی سلطان گتوروب خیمه لره
..
..
بیلجگین بو خبری لرزیه دوشدی بدنی
بینوا لیلینون آرتدی اورگینده محنی
خیمه دن چیخدی گوره یوسف گل پیرهنی
گورجگین قانلو عبانی یخلوب دگدی یره
..
..
دیدی وای تازه جوانیم سینه سین ایلدی چاک
دیزلری اَسدی گوزی گورمه دی سَپدی باشا خاک
آز قالوب غصه و غمدن اولا بیچاره هلاک
نجه ئولمز آنا بو حالدا بالاسینی گوره
..
..
گلدی هولیله یتیشدی اوغولون پیکرینه
پائین پاده اوتوردی ال آتوب معجرینه
بو دیلیله دیدی گویا سوزینی اکبرینه
دور ایاقه آنوون حالی یتوبدور خطره
..
..
بو قدر لیلی بیچاریه ناز ایتمه اویان
بوندان آرتق یارالی قلبیمی سن ایلمه قان
منی بیچاریه گر یوخدو علاقون علیجان
بارى یثربده مریضه باجووی آل نظره
..
..
تک گوروب لشکر کافر منی بال و پر آچوب
اوخ ویروبدور اوخون اوستن بدنون شهپر آچوب
سینون اوسته علی اکبر نه عجب گل لر آچوب
او گله لیلی گرک اشک تریله سو ویره
..
..
گورجگین لیلی سنی دوشدی اوغول حالدان حالا
باشوون یاره سی چوخ قلبیمی یاندوردی بالا
کیم گوروب تازه جوانی ئوله بو حاله قالا
یانار البته اورگ بو غم محنت اثر
..
..
یارالی پیکریوه جنگده دگدوکجه سیوف
یاره لر سینوون اوسته یازیلوب چون خط کوف
برج عقربده یوزون آی کیمی ایلوبدو خسوف
قان سوزوب لخته لنوب پرده چکوبدور قمره
..
..
لیلینون گوزلری اکبر اولا قربان جانوا
صاف یرون یوخدو بدنده باخورام هر یانوا
بیر امیدیم سنیدون سنده بلشدون قانوا
کیم پرستار اولاجاق بس بالا بو در به دره
..
..
ایلسون لیلی نجه بو غم عظمایه دوام
قطعه قطعه ایلیوب پیکریوی قوم ظلام
آرزولر واریدی قالدی بو قلبیمده تمام
نخل امیدیم اوغول یتمدى آخر ثمره
..
..
یحیوی ثبت ایله اکبر غمینی دفتره سن
یازدیقون بیت لری توشه ایله محشره سن
وقت فرصتدو بوگون آغلا علی اکبره سن
نه بیلورسن اونی عمرون یته جکدور سحره
..
..
#اکبریه #یحیوی_اردبیلی #اکبریه_شهادت #ترکی #زبدةالاشعار
نظر دهید