تعریف حضرت رقیّه (س)
و گریز به خرابه شام
..
..
..
بهزاد قاسمی اردبیلی
..
..
..
سرمایۀ بازار تولادى رقیّه
اسرار حسینیته معنادی رقیّه
..
اول قلمیم ایستدی یازسون کرمیندن
گوردوم کی کرم قطره دی، دریادی رقیّه
..
بیر واژه گزوردوم کی دئیم پاک دمیندن
سس گلدی کی اوچ یاشلی مسیحادی رقیّه
..
مجنون کیمی گزدیم بو قیزین کوچۀ عشقین
گوردوم قره کوینکلره لیلادی رقیّه
..
دوردوم ایاقا بیر گجه باخدیم گویه ساری
تاکی دئیم اولدوز کیمی زیبادی رقیّه
..
گوردوم یازیلوب نوریله سرتاسر عرشه
اولدوز نه دی آیداندا دل آرادی رقیّه
..
عقلیم بو سوزی رد ائله دی اولمادی قانع
دوزدور دئدی خوش صورته دارادی رقیّه
..
اما او گوزل صورتی آیدان گوزل اولماز
هر چند عزیز شه بطحادی رقیّه
..
گوی تیتره دی ناگه او زمان آی دیله گلدی
سسلندی گوزلّیکلره معنادی رقیّه
..
آی کیمدی بو نازلی بالا گوندنده گوزلدی
نور رخ نه طاق ثریادی رقیّه
..
مبهوت ائله دی گوی منی دوندوم یره باخدیم
تا یرده ده گوی تک گورم اعلادی رقیّه
..
گلشن لری بو دفعه دولاندیم گجه گوندوز
تا ثابت ائدم گل کیمی رعنادی رقیّه
..
گه لالیه اوخشاندیم اونی که گل یاسه
گاهی دئدیم آلالۀ صحرادی رقیّه
..
سس گلدی سمادن ئوزوی زحمته سالما
آختارما گلستانلاری یکتادی رقیّه
..
جنتده ده والله بو گوزلیکده گل اولماز
دنیا هله هیچ زینت عُقبادی رقیّه
..
مأیوس اولوب عرض ائلدیم پس نه یازوم من
یاللعجب آخر نه معمّادی رقیّه
..
فریاده گلوب هاتف عشقیم دئدی صبر ائت
تا فاش ائلیم من کیمه همتادی رقیّه
..
گلشن نه دی گل کیمدی قسم ذات خدایه
عطر نفس حضرت زهرادی رقیّه
..
..
..
..
بو عطر همان عطریدی مست ایله دی یاری
قانلی باشی ویرانیه گتدی گجه یاری
..
..
..
..
سس دوشدی گلون بی کفن ارباب گلوبدی
اولدوزلارینی گورمگه مهتاب گلوبدی
..
آی منزل ویرانه ده مقصوده چاتانلار
آی صبحه کیمین کهنه حصیر اوسته یاتانلار
..
آی شاه لب عطشانی گوروب معجر آچانلار
آی کرب و بلاده تیکان اوستونده قاچانلار
..
پیشوازه چیخون کی قوتاروب درد فراقوز
بسدور بو قدر آغلامیون گلدی قوناقوز
..
دوشمز بئله فرصت اله همت ائلیون سیز
بیر بیر گئدون اول باشی زیارت ائلیون سیز
..
خوش حالوزه نورانی اولوب غملی اطاقوز
چوخ وئرمیون الدن اله یورقوندى قوناقوز
..
ئوپسوز ئوپون آهسته اونون گل یاناقیندان
زهرایه گوره ئوپمیون اما دوداقیندان
..
چونکه بو دوداق قامت احساسی اگوبدی
قرآن اوخیاندا اونا چوخ یاره دگوبدی
..
علت اودی کی نغمه سی عرشه اوجالانمور
بو قانلی دوداقین قانی الآندا دایانمور
..
القصّه او باشدان هاموسی کام دل آلدی
بیر یولدا حسین وای سسی افلاکه اوجالدی
..
ناگه او هیاهوده ئورکلر غمه باتدی
شمعین باشی چون خیرداجا پروانیه چاتدی
..
آلدی او باشی سینیه پروانۀ گریان
عرض ایله دی ایستکلى رقیّون سنه قربان
..
گلدون نه یامان گونده بو ویرانیه بابا
باش چکدون عجب وقتیده پروانیه بابا
..
هجرونده بابا برگ خزان مثلی اسردیم
شاهددی بیبیم گورمگیوه چوخ تلسردیم
..
گلزار محبّتده گول ماتم اَکَردیم
هرگون اوتوروب ئوز ئوزومه نقشه چکردیم
ویرانه ده من هر گجه غم بزمی قوراردیم
آخشاملار اولاندا قاپی آغزیندا دوراردیم
..
اولدوز کیمی عرش غم و ماتمده آخاردیم
قرآن اوخیوب یوللارا حسرتله باخاردیم
..
اللهه گینه شکر اولا تار غمی هوردوم
از بسکی دعا ایله دیم آخر سنی گوردوم
..
گلدون بیلورم کی بو گجه سن منه خاطر
قربان ائدرم جانیمی منده سنه خاطر
..
..
..
#حضرت_رقیه #بهزاد_قاسمی #حضرت_رقیه_مدح #حضرت_رقیه_شهادت #ترکی #زبدةالاشعار
نظر دهید