اربعین
..
..
..
..
فصیحی
..
..
..
..
قوتاردی شامیده قارداش اسارت ئولمدیم گلدیم
ائدم ششگوشه لی قبرون زیارت ئولمدیم گلدیم
..
..
..
..
گلنده کربلا آدی دونردی گوزلریم ابره
توکردیم گوزیاشی وادار ائدردیم قلبیمی صبره
بحمدالله نصیب اولدی قویام اوز بو گوزل قبره
گوتور باش قبریدن ائت سنده رأفت ئولمدیم گلدیم
..
..
..
..
رضایم حقیدن قسمت اولوبدی قبر ششگوشه
نظرِ لطفی وار دایم حسینجان بو سیه پوشه
نخستین اربعینونده مزارون آلدیم آغوشه
کرم دریاسی سن ایله کرامت ئولمدیم گلدیم
..
..
..
..
او دم که ذوالجناحوندن یخلدون ای شه عطشان
یانان قلبیم اولوب شانه کیمی احوالیوه شانشان
باشیوی تشنه لب کسدی قفادن شمر بی ایمان
سوسوز ئولدوردی چوخ ائتدی جنایت ئولمدیم گلدیم
..
..
..
..
کسنده باشوی تشنه او گون شمر بن ذی الجوشن
یاپوشدوم خنجریندن مانع اولدوم ضعفیدیدون سن
کسوب بارماقلاریم خنجر کنارونده یخلدیم من
اَییلدون ضعفیدن ائتدون حمایت ئولمدیم گلدیم
..
..
..
..
او گون که بهره مند اولدون حسینجان سن شهادتدن
عیالون دستگیر اولدی بو صحراده عداوتدن
دولاندوق چوخ ولایتلر قوتاردوق تا اسارتدن
ائدک بیر بیر بلالردن حکایت ئولمدیم گلدیم
..
..
..
..
گئدنده جبریلن گئتدیم جنازون قالدی چوللرده
حرملر باجیلار قیزلار دیردی نوحه دیللرده
کومکیم اولمادی دفنه یاخام قالمیشدى اللرده
غریب ئولکه اؤزوم بیکس بیر عورت ئولمدیم گلدیم
..
..
..
..
ائلیکه کامیوه چاتدون سن ای شاه امم قارداش
سنی ئولدوردی کام آلدی او گون اهل ستم قارداش
الف قدّیم ملالوندن بوکولدی اولدی خم قارداش
یانان قلبیمی یاندیردی مصیبت ئولمدیم گلدیم
..
..
..
..
فدای دین اولوب سنلن جوانان بنی هاشم
شهادت شربتین ایچدی بو چولده آلتی قارداشیم
مصیبت یورقونی اولدوم آغاردی غصه دن باشیم
اورگیم داغلانوب اولدی جراحت ئولمدیم گلدیم
..
..
..
..
دولاندوق صبحیدن شامه او شهر شامی سرگردان
عزالیدوک بیز آغلاردوق گولردی بیزلره عدوان
ایاقلار پاره لنمیشدی آخاردی یاره لردن قان
باخوب دشمنلر ایلردی شماتت ئولمدیم گلدیم
..
..
..
..
دیلیم گلمور دییم باشدان باشیمون ماجراسیندن
نه نوع شرح ائدوم اشرارِ شامون من جفاسیندن
بدنده قمچی ردّیندن ایاقلارون یاراسیندن
ائدوم یا ضرب سیلیدن حکایت ئولمدیم گلدیم
..
..
..
..
ویریبلار حدّسیز قمچی ستمله قان توکن عدوان
بدنلر قاره دور یول یول ولی بیز ائتمیشوک پنهان
اولیدی کاش بو یر خلوت باخیدوک سن باجون قربان
گوریدون وار بدنلرده علامت ئولمدیم گلدیم
..
..
..
..
اوزون آگاهسن شامه باشیمدا قاره گئتمیشدیم
گوروب نعش شهیدانی اورکده یاره گلمیشدیم
قولومدا سلسله تا مجلس اغیاره گئتمیشدیم
ثبوت حقّه ائتدیم استقامت ئولمدیم گلدیم
..
..
..
..
ئوپنده خیزران اول لعل گوهر باریدن امّا
رقیّون خوردا قامتلن قیامت ایلدی برپا
یزیدی ائتدی قول باغلی شیرین دیللی قزون رسوا
بساط کفره ویردی چوخ خسارت ئولمدیم گلدیم
..
..
..
..
بلا بحرینده غرقم باخ گواهیم صورت زردیم
آنام زهرایه بنزردی اونی من چوخ چوخ ایستردیم
گوگرمیش قولّارین گوردوم یادیمدان چیخدی اوز دردیم
منه ده قالب اولدی ضعف حالت ئولمدیم گلدیم
..
..
..
..
یانوبدی نار هجرانه سولان گللر کیمی سولدی
سودان خالی اولوب گوز کاسه سی آلقانیله دولدی
یوزوم گلمور دییم قارداش رقیّون غصه مرگ اولدی
خرابه گوشه سین ائتدی عمارت ئولمدیم گلدیم
..
..
..
..
کناریمدن کناره سسلدی ای عمّه گل آز گئت
عزا دوتسون منه صبر ائت ازلده قبریمی قاز گئت
ئولورم گلمدی اکبر آدین سن قبریمه یاز گئت
وصیت یتدى اتمامه او ساعت ئولمدیم گلدیم
..
..
..
..
گوزل بَر وئردی اسلامه او طفلون عمر کوتاهی
اونون قبرینده ویردیم پرچم نصر من اللهی
قزون قالدی نماینده ائده شاماته آگاهی
بنا ائتدیم اونا ملک سفارت ئولمدیم گلدیم
..
..
..
..
حفاظت ایلدیم گوندوز گئجه غم کاروانوندن
آپاردیم شامه جک پوزقون عیالون گلستانوندن
باجون چوخ شرمسار اولدی شیرین دل نوحه خوانوندن
قالوب آج ئولدى من اولدوم خجالت ئولمدیم گلدیم
..
..
..
..
اورگیمده قالاندی لاله مثلی داغ داغ اوستونده
نجه شبنم یاتار صبحون زمانی یاپراق اوستونده
یاتیرتدیم من اوجور قزلاروی آج تپراق اوستونده
حرم هل أتى ائتدى قناعت ئولمدیم گلدیم
..
..
..
..
او اوچ یاشدا قزی درد فراقون یاندیروب یاخدی
یاتاندا تپراق اوستونده عذاره گوز یاشی آخدی
در ویرانه دن گاهی گلن یولاروزه باخدی
اونی سالدی ایاقدان رنج غربت ئولمدیم گلدیم
..
..
..
..
لباس قاره سین گییدیم ئولونجه سویمارام قارداش
حنا آغ زلفومه تا واردی عمریم قویمارام قارداش
او مندن دویسادا اما من اوندان دویمارام قارداش
بودور عشق عالمی حکم وراثت ئولمدیم گلدیم
..
..
..
..
گوزوم یاشین گوزومده قبریوه درّ عدن گتدیم
ایکی گوز کاسه سینده پربها مشک ختن گتدیم
سنه سوقات الیمده پاره پاره پیرهن گتدیم
ائدم تا ظلم دشمندن اشارت ئولمدیم گلدیم
..
..
..
..
مزارون اوستونه دلده اولان دنیا غمین گتدیم
قالان بو اهل بیتونله ئولنلر ماتمین گتدیم
شهید عبّاسیمون الده او قانلو پرچمین گتدیم
وئرم بو قبریوه بو نوع زینت ئولمدیم گلدیم
..
..
..
..
دخیلوندور «فصیحی» یا حسین لطف ائت بو غمناکه
توکر گوزیاشی هجرونده یوزون دائم قویار خاکه
اونی دعوت ایله گلسون بو ایل بو مرقد پاکه
یوزون قویسون دئسون ای شاه عطشان ئولمدیم گلدیم
..
..
..
..
#اربعین #فصیحی #ترکی #زبدةالاشعار
نظر دهید