یتیشدی ناقه زینب کنار مینایه #اربعین_یحیوی_اردبیلی

اربعین
..
..
..
..
مرحوم یحیوی اردبیلی
..
..
..
..
یتیشدی ناقۀ زینب کنار مینایه
صدای ناله بلند اولدی عرش اعلایه
..
خبر وئریلدی او دم جابرابن عبدالله
صحابه سیله چکیلسون بیر آیری مأوایه
..
که اهل بیت حسین شامدن دوتوب احرام
طواف کعبۀ محبوب حیّ یکتایه
..
گوزوز ساتاشماسون اول محمل سیه پوشه
پیمبر عترتی دور محرمی دگل سایه
..
اگرچه شامه گیدوب سر برهنه قولدا طناب
دچار اولوبلا جفای گروه اعدایه
..
یهود و گبر و نصارا و اهل شام خراب
چیخوبلا غرفه و بام اوستونه تماشایه
..
دمشق ذکری دگل مقصدیم بودور غرضیم
نه فایده باخا کور آفتاب کبرایه
..
ایدنده درک بو فرمانی جابر انصار
قویوبدو امر امام زمانی اجرایه
..
قطاریلن دایانوب اشتران محمل بار
اوجالدی زنگ شتر بانگی چرخ بالایه
..
اچیلدی پردۀ محمل گوروندی وادی طور
او وقت اولوب یته آثار عشق موسایه
..
گزارشات نزولی نئنجه چکوم قلمه
نه فکره قدرت پیمانه عقل ایچون پایه
..
اوشاق بیوک هامی بیردن توکولدی محملدن
داغیلدی هر بیری بیر سمته بیر تمنّایه
..
بیری دییردی یانوب خیمه گاهیمیز بوردا
الولانوب یتیشوب توسدیسی ثریّایه
..
بیری دییردی بو یئرده منی سویوب خولی
باشیمدا قویمادی معجر بدنده پیرایه
..
بیری دییردی بورا طوى اطاقیمون یئریدور
که بیرجه گون من نالانه قیلمادی وایه
..
بیری دییردی بودور اصغرون بشیگ یریسی
وئروب سودینی یاتورداردی بینوا دایه
..
بیری دییردی عدو یخدی نوجوان بالامی
بو یئرده ائیلدی آغشته خون حمرایه
..
بو یئرده دوغرادیلار نامراد قاسمی ده
بَلَه دیلر قانینی زلف عنبر آسایه
..
بیری دییردی بو علقم کناریدور بوردا
گروه کوفه و شام ائتدی حمله سقّایه
..
بو یئرده دوشدی قولی یاتدی بیدقی بوردا
بو یئرده یاره دگوب اول وجود رعنایه
..
بیری فراته باخوب یاغدیراردی گوزدن یاش
دیردی اُف بیله دنیایه هم بو دریایه
..
آخاردی اؤز باشینا کوهسار و درّه لره
که استفاده وئرردی تمام دنیایه
..
نصیب اولمادی کرب و بلا فدالرینه
ندور عداوتی بو نهرون آل طاهایه
..
آتامون اوغلى سوسوز ئولدی سو کنارینده
سویون تعلّقی واردور آناسی زهرایه
..
گوزوم باخا باخا بو یئرده شمر بی ایمان
حسینیمون آخیدوب قانینی مصلّایه
..
سلام اولا او پیمبر اؤپن کسوک بوغازا
سلام اولا یارالی قطعه قطعه اعضایه
..
سلام او خورداجا بارماقه که کسوب بجدل
سلام اولا او کسیلمیش یَدان عظمایه
..
نه زادون اسکیلو گر «یحیوینی» یا مولا
بیر اربعین قوناق ائتسون او باب والایه
..
..
..
#اربعین #یحیوی_اردبیلی #ترکی #زبدةالاشعار