ای ویرن مزاری زینت دشت کربلایه قارداش #اربعین_شعاع_تبریزی

اربعین
زبانحال حضرت زینب (ع)
..
..
..
..
مرحوم شعاع تبریزی
..
..
..
..
..
ای ویرن مزاری زینت دشت کربلایه قارداش
وار شباهتی بو قبرین عرش کبریایه قارداش
..
..
یرده عرش ذوالمن اولماز آلتی گوشه مدفن اولماز
کربلا یری سزادی فخر ایده سمایه قارداش
..
..
..
..
آتش غمونده یاندیم من بو مدتی حسین جان
جانیوه قسم غمونده باغریم اولدى لاله تک قان
ایمدی یار اولوب سعادت منه ای شه لب عطشان
زائر اولموشام بو قبره شکر اولا خدایه قارداش
..
..
..
..
سندن آیریلالی گوزدن یوزه خون دل توکردیم
گورماقا او مه جمالون گوز جدالره تیکردیم
روز و شب بو آلتی گوشه قبرین حسرتین چکردیم
تا فراغتیله مشغول اولام انزوایه قارداش
..
..
..
..
کاش ئولوب حسین قالیدیم بو جوار رحمتونده
داخی بیرده یانمیدیم آتش فراقتونده
اولماسام بوفیضه نایل آغلارام مصیبتونده
جسم دن جان آیرلنجا دوزرم جفایه قارداش
..
..
..
..
گرمنی فلک دوباره آیری سالسا بو چمندن
عطرون آلماقا واریمدور بیر گوزل نشانه سندن
آلّام عطریوی حسینیم من بو قانلو پیرهندن
جان مشامنی گتورسون رایحاً صفایه قارداش
..
..
..
..
ایتموسن مثال چرخ فلک ارض کربلانی
آلموسان کناره چون مه نجم طارق و سهانی
قویموسان یارالی حیران ساکنان نه سمانی
رشک آپارسا طور سینا وار یری بو جایه قارداش
..
..
..
..
دوشوب آیری حیف سندن مه برج آل هاشیم
او خسوف ایدندن اولدی قوری یر منیم فراشیم
عزّتیم گونی باتاندان دوشدی چوخ بلایه باشیم
سالدی ابر ظلمت آخر باشیم اوسته سایه قارداش
..
..
..
..
اورگیمده تیر محنت یر ایدوب چو نجم ثاقب
اولموشام غمونده مجنون یابن مظهر العجائب
اخذ ایدر بو مدفوندن حشره دین ضیا کواکب
ای اولان دلیل خلقت کلّ ماسوایه قارداش
..
..
..
..
گورمیوب جهاندا بیر گوز بیله غمفرا گلستان
غنچه سی گلی ستمله ایچه سو یرینه آلقان
هانسی باجنون سنون تک قارداشی ویروب سوسوزجان
یانّام آغلارام ئولنجه من بو ماجرایه قارداش
..
..
..
..
نیسگلون ائدر اورکده غمیمی دمادم افزون
سوسوز ئولماقون چوخ ایلور من بینوانی محزون
شمر بیحیا کسنده دالیدان سوسوز بوغازون
اولمادی او گونده کیمسه بیر یته هرایه قارداش
..
..
..
..
ای اولان ستاره لر تک پیکرینده چوخ یاراسی
دیمه زینب حزینین اورگینده یوخ یاراسی
نجه دی بویور گوروم من قلبیوین او اوخ یاراسی
اشکیمیله سالمادیم حیف مرهم اول یارایه قارداش
..
..
..
..
غم اودی چکر شراره باجوون یانان دلینده
بو او یردی گلدی زهرا بو یره الی بیلینده
گوزل اللرون او گونکه قالدی ساربان الینده
باخوب آغلادی او جور ظلم ناروایه قارداش
..
..
..
..
سینه دن ئولونجه گتمز بومحن یقین برادر
بجدل ایلین جفا چوخ منی ایلدی مکدّر
کسدی بیر اوزوکدن اؤتری خوردا بارماقون او کافر
چکدی داغ کینه قلب ختم الانبیایه قارداش
..
..
..
..
دوشدی زینبین بو چولده ماه طالعی محاقه
اولدی دستگیر عیالون جمله فرقۀ نفاقه
یول اوزاق گون ایستی راکب ناتوان برهنه ناقه
اولدی وحشی ناقه مرکب آل مصطفایه قارداش
..
..
..
..
گر قان آغلاسام سزادور من اوحالته مه و سال
اوتورانمیوب دوشردی یره ناقه اوستن اطفال
غیضله یتوب ووراردی تازیانه ایله جمّال
نه کبیره رحم ایدردی نه صغیر بالایه قارداش
..
..
..
..
نه چکوب او یولدا زینب بوله سن بو حالتیندن
اور گیم دونوبدی قانه دشمنین شمادتیندن
قولّارایمدا بیرده باخسان قمچی لر علامتیندن
گوره سن نلر ویروب یوز منِ بینوایه قارداش
..
..
..
..
قلبیمی شرارۀ غم اریدوب چو بوطۀ زر
چکه جاق شراره دلدن حشره دین بو سونمز آذر
کوفه ده گورنده باشون منخسف هلاله بنذر
اوندا کی اوخوردی قرآن باشون آیه آیه قارداش
..
..
..
..
مونسیم ئولنجه مطلق گوزده کی بو قانیاش اولدی
منه هر غموندن اما بو مصیبتون باش اولدی
بیلیمی بوکن جداده آلنوا دگن دش اولدی
تازه دن آخاندا آلقان رخ حقنمایه قارداش
..
..
..
..
ناگهان گورنده کلثوم یوخ جداده رأس عباس
ایله سولدی غصّه سیندن سولماز ایله نر گس و یاس
باشلارا باخوب دیردی هارداسان ای اشجع ناس
گل یامان گونومدی قویما چوخ گلم نوایه قارداش
..
..
..
..
گه باخوب یاناردی لیلا رأس اکبره جداده
عارضه توکردی اشگین نی کیمی گلردی داده
یاخشی ایلدون دیردی غمیمی اوغول زیاده
یوخیدی ویرن تسلّی او گونی قرایه قارداش
..
..
..
..
اصغرین رباب ایدنده قانلو باشنا نظاره
گوردی تللرین وورار یل گه یمین و گه یساره
غم شراره سی گوگلده چکدی تازه دن شراره
سویلدی آنان فدا اول زلف مشگسایه قارداش
..
..
..
..
کیم بلور نه چکمیشم من آغلیان زمان سریّه
یا رباب و یا سکینه عاتکه و یا صفیّه
باغریمی کباب ایدردی نازنین قزون رقیّه
ویردی باد غم بهار صبریمی فنایه قاراش
..
..
..
..
اهل کوفه نون یتیشمز ظلمی شرحله تمامه
کوفه دن چکیلدی محنت کاروانی شهر شامه
دوندی شامیده ایشیق گون گوز ایوینده تیره شامه
اولدی بیر خرابه منزل آل هل اتایه قارداش
..
..
..
..
او خرابه ده رقیّه قوی دیوم نه حاله قالدى
جور خاریدن جمالی گل کیمی سولوب سارالدی
شمر او مضطرین ستمله اختیارین الدن آلدى
بسکه ووردی سیلی قمچی دخت مرتضایه قارداش
..
..
..
..
او قزین غمی گتوردی دل کایناتی درده
گلدی نالیه نجوم فلک شرف او یرده
اوندا که ئولوم غباری چکدی عارضینه پرده
آلدى یاسلیلار او طفلین نعشینی آرایه قارداش
..
..
..
..
فخر ساجدینده طاقت یوخیدی قازا مزارین
غل جامعه ز بس سلب ایلمیشدی اختیارین
قازدی یانه یانه زینب قبرینی او گلعذارین
باجوین یتشدی آخر ایشی گور هارایه قارداش
..
..
..
..
بو (شعاع) حسین یولیندا اولدی غملر آشناسی
روزوشب حسین حسیندی ورد ذکری یوخ ریاسی
دردی وار توجه ایله چون مریضدور آناسی
ای گوزل آدی ترابی آدلانان دوایه قارداش
..
..
..
#اربعین #شعاع_تبریزی #ترکی #زبدةالاشعار