اربعین
..
..
..
..
مرحوم حاج حیدر حزین خسروشاهی
..
..
..
..
ای قویان حیرتده قبری هر دل آگاهی قارداش
ایلین دنیایه ثابت سرّ ثاراللهی قارداش
..
..
..
..
وادی ایمندی بو صحرا وجود اطهروندن
نور حق ایلر تجلّی عرشه قبر انوروندن
گرچه ال چکدون بو چولده جمله یار و یاورندن
آچدون اما بیر بؤیوک اسلام دانشگاهی قارداش
..
..
..
..
ایستدی موسی جمال حضرت جانانی گورسون
رؤیت صورتله یعنی عالم معنانی گورسون
لن ترانی گلدی اولماز جسم خاکی جانی گورسون
بوردا امّا «اَرنیه» یوخ کلمۀ «لَن» راهی قارداش
..
..
..
..
سن حقیقت صحنه سینده بیر لوای همّت آچدون
دینه روح تازه ویردون خلقه باب عزّت آچدون
رادمرد انسانلارا بیر مکتب حرّیت آچدون
بیله مکتبدن آلار آزاده لر آگاهی قارداش
..
..
..
..
تا او مکتبدن آلوب الهام یتمیش مرد کامل
جمله سی بیر اولدولار تا ایلسونلر شرکی زایل
گیچدیلر شوقیله جاندان اولدولار جانانه واصل
چرخ عشقین هر بیری اولدی فروزان ماهی قارداش
..
..
..
..
بیر مقامه چاتدیلار قارداش جواروندا یاتانلار
اولدولار آزاده لیقدا اسوه تا دور جهان وار
ائتدیلر عالملره ثابت ندور معنای ایثار
تاپدیلار دارِینده فوق جلال و جاهی قارداش
..
..
..
..
بو همان یردور بو یرده ائتدی قان دریاسی طوفان
بسکه ناحق قان توکولدی توپراقا آخدی سوتک قان
ائتدى حق اولماقلارین حق قانلاری دنیایه اعلان
ایلدی رسوا بو اعلان فرقۀ گمراهی قارداش
..
..
..
..
گلشن دین گرچه بو چولده دچار صرصر اولدی
چوخلی گل لر غنچه وقتی ظلم الیله پرپر اولدی
صفحۀ تاریخه امّا هر سولان گل زیور اولدی
فى الحقیقة ائتدى ایفا نقش کوه و کاهی قارداش
..
..
..
..
کاروان عشقین اولدون تا بو صحراده امیری
عشقوون بیر عدّه دوزگون اهل عشق اولدی اسیری
مین جهان گلسه اگر عُشّاقوون گلمز نظیری
هر ائله بیر عاشقین عالَمدی خاطرخواهی قارداش
..
..
..
..
سن شهادتله هامی اهل جهانه ائتدون اعلان
باش ویرر امّا باش آیمز ظالمه آزاده انسان
ایلسون سرمشق بو رمزی گرک هر بیر مسلمان
ویرمسون تن ذلّته، ای ملک عزّت شاهی قارداش
..
..
..
..
گرچه بو نهضتده اولدون ظاهراً مغلوب دشمن
دشمنی سیندیردون امّا باطناً تا وارجهان سن
قالماسون ناقص قیامون باغلادیم محکم کمر من
وادی همّتده ووردوم خیمه و خرگاهی قارداش
..
..
..
..
گیمه سیدیم اگنیمه گر بو اسارت جامه سین من
قانیوی پامال ائدردی سوء تبلیغات دشمن
بیر اراده بو اسارتده نشان ویردیم اوزومدن
حیرته سالدیم هامی آگاه و ناآگاهی قارداش
..
..
..
..
غفلتی ایله دگیشمیشدی یزیدین وضع حالین
خارجی آدلاندیرا ایستیردی پیغمبر عیالین
حمدُالله نقش بر آب ایلدیم باطل خیالین
قویمادیم کامه یته اول ظالم خودخواهی قارداش
..
..
..
..
بو سفرده من اؤزوم اؤز فکریمی باشیمدن آتدیم
گاه زنداندا گهی ویرانه بیر منزلده یاتدیم
هر بلا گلدی دایاندیم تا یاتان خلقی اویاتدیم
دین یولوندا اولماز اولسون زینبون اکراهی قارداش
..
..
..
..
آدلاری اسلامیان ایستور یخا اسلامی گوردوم
واقعیت اوستون اؤرتن پردۀ اوهامی گوردوم
هر ندن واجب گرک اسلامه اولماق حامی گوردوم
بو حمایت ایلماقدا ائتمدیم کوتاهی قارداش
..
..
..
..
قوللاریم باغلیدی گرچه قوم بدکردار الینده
باخمادیم اما اسیرم فرقۀ اشرار الینده
یاندیروب یاخدیم یزیدی آتشین گفتار الینده
هر ایشیمده چون دایاق بولدوم فقط آللاهی قارداش
..
..
..
..
شامی تسخیر ایلدیم قول باغلی همّت سایه سینده
کاخ استبدادی یخدیم استقامت سایه سینده
ساخلادیم حیثیّت دینی امامت سایه سینده
وار کیمون من تک بو محکم لیقدا ایمنگاهی قارداش
..
..
..
..
خلقی هر فرصت اله دوشدوقجا ارشاد ایلدیم من
حقدن استمداد ائدوب اسلامه امداد ایلدیم من
اؤز آتام تک کوفه ده بیر خطبه ایراد ایلدیم من
دشمنین عرشه اوجالدی نالۀ جانکاهی قارداش
..
..
..
..
حیرته سالمیشدی گرچه دشمنی زینب وقاری
شوق دیدارون ولی آلمیشدی آرام و قراری
گلدیم آغوشه آلام بو آلتی گوشه بیر مزاری
چکمیشم بو گوندن اؤتری چوخلی گیزلین آهی قارداش
..
..
..
..
چون نماینده قویارلار بیر یری فتح ایلینده
فتح شایان ایلمیشدیم پوزمادیم بو رسمی منده
اوچ یاشیندا بیر نماینده قویوب گلدیم گلنده
خلق اوچون شاماتیده آچدیم رجا درگاهی قارداش
..
..
..
..
ای اولان درگاه پاکی عالمه باب سعادت
اولماقا خادم سنه گرچه «حزینده» یوخ لیاقت
لیک زینب دامنین دوتموش که ائتسونلر عنایت
لطفله محشر گونونده گاه باجی گاهی قارداش
..
..
..
..
#اربعین #حزین_خسروشاهی #ترکی #زبدةالاشعار
نظر دهید