زبانحال حضرت رقیه (س)
..
..
مرحوم محمد علی بلوری
..
..
کنج خرابه ده بابا قالماقا عادت ایلرم
قالسا باشون خرابه ده گونده زیارت ایلرم
..
ظلمت شبده بزمیمه قانلی باشون ویروب ضیاء
ویرسه اجل امان منه ، یاریله خلوت ایلرم
..
ایمدی که یول تاپوب گوگل دامن فیض وصلیوه
شکر وصالون ایتماقی وجهینه همّت ایلرم
..
رسمیدی قیز اؤرک سوزون فاش ایلیر آتاسینا
منده بو رسمیله سنه کشف حقیقت ایلرم
..
یوخ بو خرابه یرده بیر همنفس و انیس غم
یاد جمالویله من قلبیده صحبت ایلرم
..
گر چه غمیم آشور داشور ، نی تک اؤرک سیزیلداشور
یوخدی توان بیانینه رمزاً اشارت ایلرم
..
آیری دوشن زمانیدن سنله منِ شکسته دل
صبح و مسا بو ساعتی قلبیده حسرت ایلرم
..
سن اولاسان بیبیم اولا ، سوز آچیلا فراقدن
باشیمه هجردن گلن دردی حکایت ایلرم
..
شامیده درده دوشموشم ، جسمیم اولوبدی ناتوان
درده دوشن وجودیمی سنله طبابت ایلرم
..
سینه ده کی شرار غم منزلیمون چراغیدور
یوخدی کَسیم غریبه ام اشکیله الفت ایلرم
..
رنگ بنفشی گورمیه تا که یوزومده چشم مَه
پردۀ اشک آلیمی حایلِ صورت ایلرم
..
ضعف و فتوره ویرمرم راه وفاده یول دله
هر غمه راه عشقده شوقیله طاقت ایلرم
..
سینه وون اؤسته چوخ گجه صبحه کیمی یاتان قیزام
شامیده خشت پاریه ایمدی قناعت ایلرم
..
شه قیزونا روادی گور خاک خرابه فرش اولا؟
بختیمی من بو باره دن چوخلی ملامت ایلرم
..
صبح آچیلار یاتانمارام جانیمی توپراق اینجیدر
فرشِ تراب تیره نی بسترِ راحت ایلرم
..
فکر ایدرم نولور که گون چخمیا صبح آچیلمیا
کیم بولوری ننوعیله تابِ شماتت ایلرم
..
داد و امان بو شهرده طعنه اَلیندن ای بابا
صبریله خسته گوگلیمه فکرِ صیانت ایلرم
..
کیم بولوری کیمم ، منیم کیمدی آتام ، بابام ، آنام
کیم بولوری بو سِنّیله دینمه خدمت ایلرم
..
کیم بولوری گچر زمان ، قصرِ یزید اولار خراب
من ولی بو خرابه نی عالی عمارت ایلرم
..
سنده «بُلوری» یاز منیم محنتِ ناتمامیمی
اولما غمین جزا گونی منده شفاعت ایلرم
..
#حضرت_رقیه_شهادت
#کنج_خرابه_ده_بابا_قالماقا_عادت_ایلرم
#ترکی
#زبدةالاشعار
نظر دهید