وداع
.
#زبدةالاشعار
.
: @nohe_torki
.
مرحوم انور اردبیلی
.
بابا میدانه نه سرمست و خرامان گیدوسن
قویوسان عترتوی بی سر و سامان گیدوسن
.
فلک هجره دچار ایلوسن اولدوزلاروی
بوینی چگنینده قویورسان بالاجا قزلاروی
.
.
روزگار ایندیکه غم خانه ائدوب خیمه میزی
سارالوب ایستدیگون قزلاروون گل تک اوزی
چاره میز سندہ دی گل ایلمه بیچاره بیزی
خوشدی بلبللری پوزقون چمنه قیترہ سن
قورتاروب شمرون الیندن وطنه قیتره سن
.
.
یانوروق گرچه سوسوزدان سو سوزی قالسون هله
اصغریمدن صورا سو نیلیوروک گلسون اله
قالا قزلار هاموسی راضیدی لب تشنه ئوله
شرطی وار سن قالوب اما آقالیق ایلیه سن
کهنه کوینگ که گیوبسن چخادوب گیمیه سن
.
.
آز قالور قلب ایوی هجرونده اولا شانه کیمی
قویما حسرت منی ئوز نوروه پروانه کیمی
آیریلورسان نیه مندن بله بیگانه کیمی
دیمورم دون منه باخ گوز یاشیمون خاطرینه
ولی دیندیر صودامر قارداشیمون خاطرینه
.
.
قاچورام نیمه نفس فیض وصاله چالشام
ایکی اللى یولون اوسته اتگوندن یاپوشام
چوخ سوزم واردی اورکده نچه کلمه دانشام
اوپه سن بیر یول اوزومدن منیم ای میر حرم
عوضینده ایکی یول منده ایاقوندان اوپم
.
.
آیریلق صحبتنی عمّه مه اظهار ائلدون
آلماقا خیمه ده گوشواره می اصرار ائلدون
او نه رفتاریدی آخر منی سن خوار ائلدون
اکبرون آلدیقی گوشواره نی آلدون مندن
یوخدی بو باره ده واللهى گلایم سندن
.
.
دینمدوم آغلامادوم ساخلادوم اشک تریمی
آرزو ائتدوم او ساعتده علی اکبریمی
گل دئدیم قارداش علی گور بو قرا گونلریمی
کاش ازلدن منه گوشواره گیدوب آلمیدون
آرزوئیله قولاقیمه ئوزون سالمیدون
.
.
اولان اولدی بابا بیر سوز دئمدوم منکه سنه
قانع اولدوم نجه گوردون بو قرا پیرهنه
اکبریمدن صورا گوشواره نه لازمدی منه
قارداشی اولمیانون اشک اولی زینت یوزونه
قارداشی اولمیانون کول باشینا کول گوزونه
.
.
قارداشیم ئولدی دیدوم شکر اولا سالمدى آتام
آلار آغوشینه قویماز منی افسرده یاتام
ولی سنسیز بابا مقصودیمه هیهات چاتام
گیدوسن صبر ائله قوی راه مصیبتده دوروم
گوز یانوندا گتوروم باشیمه تپراق سووروم
.
.
مهرباندور ئوز آنامدان بیلورم عمه لریم
تاپشوروبسان اولارا سن منی واردور خبریم
مین بی بیم اولسا منیم سنده دی اما نظریم
آتانون سایه سی بیر تاج شرافتدی قزا
آتاسیز قالسا اگر هر گونی ذلتدی قزا
.
.
بالانون سوزلری گتدی آتیا بیر هیجان
دئدی گل سینمه ای دختر خوش لحن وبیان
واردی حقون اولاسان عاقبتوندن نگران
بسکه بیداریدی روحون بیلوسن هر محنی
یاندیران سوز دیوب آغلاتما آنام فاطمه نی
.
.
صابر اول درد و مصیباته ایتورمه ئوزوی
آغلاما درد دل ایله دی منه هر سوزوی
هوشه گیت سینمون اوستونده بیر آز یوم گوزوی
باشوا ال چکرم قلبوی آرام ائدرم
اویانا سان سنی راضی ائدوب اوندان گئدرم
.
.
آلدی آغوشه جگر گوشه سینی تشنه أمام
الینی تللرینه چکدی اونی ایلدى رام
گونده کی یاتدیقی یرده او بالا ائتدی مقام
دولی گوزله آتانون قیلدی نظاره یوزونه
گوردی راحتدی یری تز یوخی گلدی گوزونه
.
.
خیمه و تل آراسی اولموشیدی صحنۀ غم
آغلاشوردی او آتیلا بالیا أهل حرم
گوئیا گلدی دیله زینب مرضیه شیم
یاتدی که ایندی بالام ویر منه قارداش یولا دوش
سو دیر گوزلرین آچسا سنه قارداش یولا دوش
.
.
دیدی وئرسم باجی بو حالیله حالیم دولانار
دیسگینر نازلی بالام غم یوخوسیندان اویانار
گئتمسم خیمیه گئتمز یولون اوسته دایانار
صبر ائله قوی یوخودا درسینی تحصیل ائلسون
آناسی فاطمه دن صبرینی تکمیل ائلسون
.
.
بیر ائله وقتیده تل اوسته چخوب شمر دغا
یا حسین گل دئدی قوى ختمه یتیشسون دعوا
قزلارى الده بهانه ایلیوبسن بیجا
گلمه سون کوفه لیلر خیمیه الان توکولر
قزلارون چوللره ال باشدا هراسان توکولر
.
.
شمر دونون سوزونه یاندی شه کرب و بلا
قوجاقندا بالاسی دوردی یریندن ایاقا
من گلوردوم دیدی ای ظالم بی شرم و حیا
ایستورم قلبی سنان بیر قزیمون گوگلون آلام
اللریم اوسته گورورسن یاتوب ایستکلی بالام
.
.
.
.
.
#وداع_انور_اردبیلی
#حسینیه_وداع
#بابا_میدانه_نه_سرمست_و_خرامان_گیدوسن
#ترکی
.
#زبدةالاشعار
.
: @nohe_torki
نظر دهید