حالات هجرت امام حسین (ع) از مدینه
#مجلس_ولید
از مدینه تا کربلا
.
✍️ #زبدةالاشعار✍️
.
🆔: @nohe_torki
.
مرحوم خوندل تبریزی
.
دگیشدی رنگینی دورینده چرخ زنگاری
عمل معاوییه جایگاه ایدوب ناری
.
یزید ایستدی تثبیت ایده حکومتینی
اولوبدی عقلینه غائب غرور سرشاری
.
بو امره دورت نفرین بیعتین بولوب لازم
اولار او دورد نفرین امری شرح تکراری
.
بیری او دورت نفرین شهریار حِلّ و حَرم
حسین فاطمه میدان عشق سرداری
.
خیال ایدوب آلا جبراً حسیندن بیعت
بو فکر ایلدی مشغول او شوم غدّاری
.
او گیر و دارده یازدی ولیده بیر نامه
او نامه تون ایکی امره واریدی اشعاری
.
بیری بوئیدی که آلسون حسیندن بیعت
و یا شهادته منجر ایده سر و کاری
.
بلی یزید کیمی حاکمه اولان عمال
امام قتلیدی آخرده کار و کرداری
.
خلاصه نامه یتیشدی ولید اولوب حیران
نه نوع ایلیه آسان بو امر دشواری
.
بو فکره دوشدی که مروانی ایلسون احضار
بو امره بولدی برازنده اول ستمکاری
.
گلوب تبادل ایدوب اول ایکی جنایتکار
ولیده آخری مروانین اولدی اصراری
.
دیدی مدینه نی ترک ائتمه موش حسینی چاغور
اوخی او نامه نی آل بیعتی قوتار کاری
.
امام گلدی او مجلسده گیر و دار اولدی
سرایت ائتدی او بزمین کناره اخباری
.
کمک نه یاخشیدی عالمده ای خدای جلیل
سسی اوجالدی حسینون ایشیتدی انصاری
.
قلجلار الده گلوب مجلسه بنی هاشم
قاباقدا شاه شهیدین رشید علمداری
.
نهیب ووردی ولیده او شیر زاد على
حسینیمون بیله فکر أئتمه یوخدی غمخواری
.
کیمون نه قدرتی وار ایلسون جسارت اونا
هنوز واردی کنارینده یاور و یاری
.
پوزولدی طرح همان نقشه اولدی نقش بر آب
ولید سالدى یولا تا او شاه ابراری
.
کمک لریله قاییتدی امام منزلینه
حسینی حفظ ایلدی شرّدن نگهداری
.
امام باخدی ابوالفضله بیر محبّتیله
گوروب جمالی حیادن اولوبدی گُلناری
.
بویوردی بیر گونوم عباس اولماسون سنسیز
امام عصر دعا ائتدی اول وفاداری
.
نظام حاکم شهر مدینه قصد ترور
على الخصوص ولیدین او شوم احضاری
.
یزید نامه سی مروان جسارتی بیر بیر
وئرو بله ال اله سالدی فشاره اخیاری
.
او هتک حرمت او برخورد سخت و سوء ادب
او نانجیبون علاوه او تند گفتاری
.
دیدی که قویما حسینی گیده بو مجلسدن
ایله شهادته تهدید بیعت آل باری
.
اولوب مقدمه فرمان رحیله ویردی امام
بویوردی اولمادی بو قوم ننگدن عاری
.
گرک مدینه میزی ترک ایدوب عراقه گیداخ
أو یرده چون آچاجاق گل بهشت ازھاری
.
وداع اید وب آناسین جدّین اختصاریله
بهشته ساخلادی فیض لقای دلداری
.
ایگیرمی یدّی ماه رجبده چخدی امام
کمال یأسیله ترک ائتدی دار دلداری
.
اولوبلا سوّم شعباندا مکّیه وارد
اولوب قریب به دورد آی وقوف اجباری
.
#خروج_مکه
.
او وقت اولوب حرمی ترک ایده امیر حرم
قویا خیالینه حسرت او قوم جباری
.
گلوبله خدمتینه آشنا و احبابی
بولوبله وار حرکت صحبتی بو مقداری
.
امامه ائتدیله خواهش گلور مراسم حج
دگول بو قصد بو گون بیت حق سزاواری
.
نه وقت کوچ دی ای پورزاد بیت الله
امام اشگینی رخساره ایلدی جاری
.
بویوردی من گورورم وضع بیتی چوخ نا امن
بسیج ایدویله منیم قتلیمه بو أشراری
.
بلا ایدر منی تعقیب من بلانی بلی
گیدر دیار بلایه بلا خریداری
.
بنی امیه منیم قتلیمه دوتوب تصمیم
علاوه وار اولارین چون بو امره اصراری
.
قلج حمایل ایدوبلر عبانین آلتیندان
گلوبله صورت ظاهرده حجّه ناچاری
.
یازیلمیوب منه مقتل ولی حوالی بیت
خبر ویروب منه جدّیم ئوزی بو اسراری
.
بولار بو یرده منی قصد ایدوب شهید ائتسون
او ئولماقیم أیده بولمز عقیده مه یاری
.
گرگ گیدم او بیابان گرم و سوزاندا
شهید اولام که اولام دینیمون هواداری
.
علاوه دینیمه بیر آبرو وئره قانیم
مزاریمون اولا هر ماه و سال زواری
.
یتیشدی هشتم ذی حجه سال شصت قمر
امام ترک ایلدی حج بیت داداری
.
گوتوردی اهل و عیالون عراقه ائتدی، سفر
بو قصدیله حرم ائتسون حریم اخیاری
.
محرّمین ایکی سی صبح پنجشنبه امام
بویوردی قافله سالارینه آچون باری
.
بو یر بو ناقه لرین سر بسر یاتان یریدور
گوزلدی «ذهنی» مرحومون اولسا اشعاری
.
امام ائتدی او میعادگاه عشقی مقام
بویوردی بیر گون اولار گل آچار اونون خاری
.
او ارزش و او جلالت او احترام اولماز
تمام عالم امکانون اولسا اقطاری
.
أمام اولوبدی او صحراده یدّی گون مهمان
أو یدّی گون سالوب آرتوق بلایه أحراری
.
#دگیشدی_رنگینی_دورینده_چرخ_زنگاری
#ترکی
.
✍️ #زبدةالاشعار✍️
.
🆔: @nohe_torki
نظر دهید