قادر الله گوره سن خلقت اکبر نه ایمیش #اکبریه_سیفی_اردبیلی

در مدح و شجاعت حضرت علی اکبر علیه السلام
.
.
#سیفی_اردبیلی
.
قادر الله گوره سن خلقت اکبر نه ایمیش
بَشَرٌ کَیفَ بَشر آخ بو دلاور نه ایمیش
.
.
.
نوریلن اولومش عَجین خلقتنون آب و گِلی
شاهکار یَدِ قهّارِ کمالِ ازلی
وار نه منظومه ی شمسیده بِئله نور جلی
دوغمیوب مادرِ گیتی اونا همتا گوزلی
قلم عاجزدی نه یازسون بو صنوبر نه ایمیش
.
.
.
سرو قامت یازورام صورت زیباسینی آی
عقل فوراً منه پرخاش ائلیوب سویلری های
نه یازورسان آی ئوزی بوندان آلوب حُسنیده پای
دیورم بس نه ستاره نه آی اولدی اونا تای
منده ماتم دیور عقلیم که بو پیکر نه ایمیش
.
.
.
واردی از بس که رخ شبه نبیده جَلَوات
طبع وَقّادیم اولوب دایرۀ فکریده مات
کعبۀ حُسنیده خالین قلم ائتمیش عَرَفات
بو مَلَک دور گوره سن یا نمکِ خوان حیات
غیر صانع بیلن اولماز بو ملک فر نه ایمیش
.
.
.
نَیَه تشبیه ائدورم عقل دیور یازما مَجاز
سروه اوخشاتما بویون سروده یوخ غمزه و ناز
عشق دامانینه وور صدقیله سن دست نیاز
قدرت فوق تخیل ائلسون بیر اعجاز
عاشق اول باخ یوزینه گور بو جوان هر نه ایمیش
.
.
.
هاردا گُنجیده اولار فکره بیله وَجهُ الحَسَن
نجه تشبیه ایلیوم تِللرینی سُنبله من
کیپریگ اوخدان ایتی یا گوزلری اَسوَد شَوَه دن
کیم مباهات ایلمز بیر بیله زیبا نوه دن
گور مباهاتِ دلِ حیدرِ صفدر نه ایمیش
.
.
.
قویدی میدانه قدم تا که او سیمای وقار
صحنۀ عشق خزان دیده تاپوب طبع بهار
گُلِ اندامی ائدوب هرزه سِیَر لشگری خوار
بیربیره باخدی دئدی طایفۀ کینه شعار
بو هَلَه اَشبَهِ طاهادی، پیمبر نه ایمیش
.
.
.
عجب آهو کیمی باغَمزه خرامان یریور
بوردا جان قورخوسی وار گور نجه خندان یریور
برق شمشیره باخون شیردی غران یریور
دیه سن اوستومیزه قورخولی طوفان یریور
گر بو رزمنده دی ، اَوَّلدَه گَلَنلَر نه ایمیش
.
.
.
حَبَّذا قامته ، اسرار قیامتدی گلور
دیرناقیندان باشا جان متنِ متانتدی گلور
نه فطانتلیدی چون کوه صلابتدی گلور
بیز توکن قانلارا یا عین عقوبتدی گلور
اود توکر مرکبنون نعلی بو آذر نه ایمیش
.
.
.
بیله بیر صورتی نقاشی ایدن خامیه باخ
پیچش طرۀ خَم خَمدَه سیه فامیه باخ
قدّ موزونینه خیاط بیچن جامیه باخ
باشدا دستار سَیادت یاشیل عَمّامیه باخ
اَظهَرُ الشَّمس بو سیمای مُنَوَّر نه ایمیش
.
.
.
زین مرکبده اوتورموش ایله بیل مِهر وزین
نور رخسارینه کیم باخسا دوشر آلنینا چین
نکهتیندن بوریوب عرصه گهی عنبر چین
هر مشامی که آلار اشبهِ طاها عطرین
بیر نفس تازه لیوب تئز دیَر عنبر نه ایمیش
.
.
.
آیدان آیدین یوزونه تکیه وئروب بیر قره خال
رمز خلقتده او خال نکتۀ پایان کمال
یعنی ختم اولدی یارانماز بو وَجاهتده جمال
گور بولاقیندن اگر توکسه یره اشک زلال
یرده سویلر عجبا ، زمزم و کوثر نه ایمیش
.
.
.
ائتدی میداندا وَرانداز بویون زادۀ سعد
دئدی بو صاعقۀ مرگیدی یا غرّش رعد
هیبت و حُسنینه والله نه رقم وار نه عدد
کیمی اعزام ایلیوم جنگینه وار کیمده مدد
خطر عباسیدی ای داد بو صرصر نه ایمیش
.
.
.
بکری احضار ایلیوب فوراً او مَکّار و دغل
دئدی ای تیغ شررباری اولان پیک اجل
شهپر آچ تیز پر عنقا کیمی قیل عزم جدل
وئر جوابین بو جوانین ایشی تئز حلّ ایله گَل
ایلسون قدرت پیکاریوه باور نه ایمیش
.
.
.
روبرو عرصه ده تاپدی ایکی رزمنده حضور
بیریسی مظهر ظلمت بیریسی مظهر نور
مرکب اویناتدی آتوب اکبره شمشیر او شرور
خطر مرگه ویروب باشدان علی فوری عبور
مات اولوب بکر ئوزی احسن دئدی اکبر نه ایمیش
.
.
.
ناظر صحنه عمر سعدیدی چون دقیانوس
بکر بیر چشمیه بنذردی علی اقیانوس
ایله بیل که قول آچاندا پر آچاردی طاووس
لیلیده خیمه ده سویلردی که افسوس افسوس
دست تقدیر آیروب مندن او شهپر نه ایمیش
.
.
.
گوستروب عکس العمل فوراً او پاکیزه خلف
آلیجی شیر کیمی حمله ائدوب بکره طرف
ائتدی زیر بغلین خنجر فولاده هدف
چکدی شمشیری هدفدن دئدی یا شاه نجف
نَوه وون قدرتینی گوردی بو کافر نه ایمیش
.
.
.
خرمن کفری اَلوو تک بوریوب یاندیردیم
قلب ناپاک عمر سعدی الولاندیردیم
بکره بو ضربه که من زیر بغلدن ووردیم
جُند شیطانه بو بیر کلمه سوزی آندیردیم
دست پروردۀ عبّاس دلاور نه ایمیش
.
.
.
گَتدی جولانه گئنه مرکبی اول یکّه سوار
جست و خیز ایلدی مرکب اوجالوب گرد و غبار
عرصه نی لیل دجا تک ایلدی تیره و تار
گیج اولوب بکر دغا تاپمادی بیر راه فرار
جان قوتارماق دیدی مشکلدی بو کیفر نه ایمیش
.
.
.
تیغ بُرّاسینی اویناتدی او دردانه خلف
سر بکری ایلدی اسلحۀ تیزه هدف
مزرع عشق خدادن بیچیلوب هرزه علف
شیشۀ ظلمی دئدی دوغرادی الماس شرف
ابن سعد ایندی بیلر ماده ندور نَر نه ایمیش
.
.
.
باخدی بو صحنۀ جانکاهه عمر سعد دغا
دوداقین دیشلدی حیرتله دیدی واعجبا
ئولدی روحیۀ لشگر نه قوا وار نه رَجا
لافَتا حَقّینی الحق بو فَتا قیلدی ادا
بارَکَ الله، بونون امدیگی دوشلر(صودلر) نه ایمیش
.
.
.
ائتدی تا بکری زمین گیر او فرخنده مرام
هی ووروب مرکبه سرعتله ائدوب قصد خیام
آلننون سیلدی ترین دست محبتله امام
دئدی دینجل یورولوبسان دئدی چوخ چوخ سوسوزام
ایندی بیر فکر ایله گور حالت لبلر نه ایمیش
.
.
.
نجه گلزاره سو ویرمَزلَه گولی گون قورودار
تشنه لبلر قوریان گول کیمی تاپمیشدی شیار
گوردی بو حالی حسین، عاطفه ائتدی وادار
سالدی ئوز آغزینا اکبر دیلینی معجزه وار
اودا تئز بیلدی که سوزِ دلِ رهبر نه ایمیش
.
.
.
سروریندن ایدوب اظهار تشکر او دلیر
سنه قربان دئدی ای عاشق ممتاز و کبیر
شهریارا ایلیوب شهدِ دهانون منی سیر
حیف مندنده عطشسن سن ئوزون رهبرِ پیر
دئدی بیلدون بالا قلبیمده که اخگر نه ایمیش
.
.
.
دئدی بیلدوم منی وجدان داخی قویمور دایانام
عشق فتواسیدی قوی قاره گونه قالسون آنام
واردی اخلاص رهِ دینوه جانین قویانام
گئدورم محضر جانانیده قانه بویانام
چشم گیتی گوره تا عاشق داور نه ایمیش
.
.
.
یوز قویوب گلدی دوباره گئنه میدانه علی
ظلمت کفره تاپوب سیطره انوار جلی
لشگرون قلبین هدف دوتدی او زهرا گوزلی
نجه صرصر قووولار داغ داشا چرپار خزلی
صفلری پوزدی بو شیرِ هنر آور نه ایمیش
.
.
.
پارچالار سینۀ افلاکی نجه سرخ شفق
عرصه ده غالب پیکاریدی اکبر مطلق
صاق صولا خنجر آتوب دیلده دیردی یا حق
باشلاری بیربیرینه گویده ایدردی مُلحق
لیلی احسن صودووه صودده که جوهر نه ایمیش
.
.
.
طی ایدوب شبه نبی جادۀ عشق و هدفین
روح کفاری قیلوب ذلّت عقبایه قرین
بو کشاکشده ایدوب منقذ نامرد کمین
آستینیندن اوجالدوب او دنی ظلمون الین
گوردی بیر ایش که چتین شرح اولا یکسر نه ایمیش
.
.
.
اکبره ووردی قفادن ایله ضربت او لئیم
قولی سست اولدی ایتیردی ئوزونی روح سلیم
دئدی مقرون وصالم ائدورم جان تسلیم
صبر وئر لیلیه مندن صورا یا حیّ کریم
اودا گورسون کرمِ خالقِ اکبر نه ایمیش
.
.
.
حاصل ایش بیر یره منجر اولوب ای اهل عزا
گوردی سلب اولدی قوا سسلدی گل یا مولا
گلدی بالینینه سرعتله رئیس شهدا
باخدی اون دورد گیجه لیک ماهینه سسلندی بالا
یارا باشدان اوتوروب قاشه بو خنجر نه ایمیش
.
.
.
هانسی مشاطه چکوب سرمۀ خونین گوزووه
گوز آچانمورسان اگر باری تکان وئر ئوزووه
دانیش اوغلوم منی واله ایله شیرین سوزووه
منده سورتوم سارالان صورتی قانلی یوزووه
قوی تماشاچیده گورسون دل و دلبر نه ایمیش
.
.
.
لیلی هی نقشه چکوب ترسه سینه گئتدی قضا
او دیدی ایسلادارام اکبریمه طویدا حنا
ولی اکبر بَلَدی تِللرین اوّلده قانا
او گلین فکری ائدردی بو عَبا گَتدی اونا
نه عَبا بیر پارا قان ایندی گور اکبر نه ایمیش
.
.
.
نیلیوم خامه آچیق شرح ایلمور عشق سوزون
من اشاریله دیوم سن سوزی تأویل ائت ئوزون
بیلمورم گوردی نجه لیلی اونون قانلی یوزون
آلنینا قویدی اَلین بُهت آپاروب یومدی گوزون
او چتین لحظه گورک نوحۀ مادر نه ایمیش
.
.
.
آرزو ساغریمی غم دئدی یارب جالادی
قلبیمی ظلم اَلی گول یاپراقی تک پارچالادی
مندن ئوزگه بیلن اولماز بو نه جیران بالادی
اودا که گِئتدی الیمدن یرینه اود قالادی
بو نه اوددی منه چاتدی بو مُقَدَّر نه ایمیش
.
.
.
مین کتاب اولسا یازیلماز آنانون اوخشاماسی
نه دریندور دئدی باشونده که خنجر یاراسی
قاره گوزلر دولی قان آلنون اولوب آی پاراسی
قان دولان گوزلریوون لیلیه گلسون قاداسی
آنُووی قاره گونه قویدی بو محشر نه ایمیش
.
.
.
او قَدَر صبح و مَسا آه چکوب غصّه یِدیم
او کمان قاشلاریوا بَنزَدی بو سَرو قَدیم
معجر ائتدیم ایاقون آلتدا اوغول گئتمه دئدیم
درد آلوب جانیمی الان کیمه درمانه گئدیم
طوی سوزی یاسدا دِییلدی بو مُقَرَّر نه ایمیش
.
.
.
گئتدی اسماعیل اولا حق یولونا قربانی
کسمدی باشینی خنجر که توکولسون قانی
سنون آلنوندان آخان قان بزیوب میدانی
منده که درده دوزوب خوشلامورام درمانی
ایندی گور صبر دل لیلی و هاجر نه ایمیش
.
.
.
سیل اشکین اَلَدی دامن پر مُحنتینه
هی باخوب قانلی عباده کیچیلن قامتینه
قلب محزونی تَلَسدی چاتا ئوز حسرتینه
قویدی آهسته یوزون قان بوریَن صورتینه
ئوپدی تامسیندی دوداقین دیدی شَکَّر نه ایمیش
.
.
.
طوطی طبع روان « سیفی » اولوب نغمه سرا
لیلی و اکبر حدیثین ایلیوبسن انشاء
دفتر عشق تاپوب زینت اشعار رسا
ایشیدوب تجزیه تحلیل ایلسه گر اُدَبا
دیر انصافیله الحق که بو سوزلر نه ایمیش
.
#اکبریه_مدح
#اکبریه_شجاعت
#قادر_الله_گوره_سن_خلقت_اکبر_نه_ایمیش
#ترکی
.
✍️ #زبدةالاشعار ✍️
.
🆔: @nohe_torki