شهادت حضرت مسلم (ع)
..
..
مرحوم ثابت اردبیلی
..
..
عاشق گرک عالمده گچه باش و بدندن
عاشق گوتورر اللرینی ملک وطندن
..
..
..
عشق اولماسا دنیاده حقیقت اله گلمز
گلدن اوتوری بلبل خوشدل دله گلمز
پروانه قرانلوق اولونان منزله گلمز
عاشق یانا شمعون اودنا عهدینه چاتسون
عاشق یاتان عاشقلری مردانه اویاتسون
..
..
..
پروانه صفت صیف بنی هاشم اولوبدور
دنیایه اونون شأن شئوناتی دولوبدور
گل یوزلی جوانلاری غریب اولکه سولوبدور
عاشق نجه عاشق علم دینی اوجالتدی
عاشق نجه عاشق قمر شمسی سارالتدى
..
..
..
مسلم قولی چمراق ازونی صفلره وردی
بیر شیردی زنجیر صف لشگری قردی
بازاره چکوب جنگی کسوب باشلاری دوردی
عاشق اله شمشیر شرر باری آلوبدور
عاشق دل بیگانیه اودلاری سالوبدور
..
..
..
قان سو یرینه اولدی روان تیغ دمیندن
سر کرده لری بیر بیرینه وردی کمیندن
ناله اوجالار عرش خداونده زمیندن
اون دورت مین حدودینده قوشون قانه بویاندی
مسلم یوزی گوز قانلو سنان الده دایاندی
..
..
سرکرده قاچوب ابن زیادی ایدوب آگاه
تخت اوسته دوروب باشه وروب آغلادی ناگاه
عرض ایلدی تعیین ایله بیر لشگر گمراه
گلدی دله غیظیله دیدی بس هانی لشگر
سرکرده سینون هر بیری مین شخصه برابر
..
..
عرض ایلدی بقالدی چکم من یوزی اوسته
مسلمدی عقیل اوغلی بو دعواده خجسته
شمشیره چکوب لشگریمی دسته به دسته
لطف ایله کمک ور منه بیر عدۀ بارز
تا بلکه عقیل اوغلونا اولسونلا مبارز
..
..
..
امر ایلدی لشگر جمع اولوب آتلو پیاده
تعظیم ایلدی اهل عراق ابن زیاده
باشلاندی یریش کوفه ده ال تیغ بلاده
مسلم دولانور کوچه و بازاری خدایا
گتدی نظره لشگر اشراری خدایا
..
..
..
ال قبضۀ شمشیره آتوب شیر دلاور
بیر حمله ایدوب صفلری سیندیردی سراسر
یرده چوبالور باش و بدن قانیله احمر
دروازه لری سد ایلیوب گور نجه دعوا
بیر شهرله دعوا ایلیور یکّه و تنها
..
..
..
یاغدیردى کسوک باشلاری مسلم یره سای سیز
گلدی دله گوردوز منی دنیاده آدام سیز
قانیله ایدوم کوچه و بازاروزی لب ریز
شمشیر قباقنده قاچوب فرقۀ اعراب
یوز مین نفرین تیغینه مسلم ایلسون تاب
..
..
..
تشکیل وروب قانلو بدن لردن عجب تل
مسلم دیدی عباس جوان کوفیه بیر گل
شمشیریله صفلر اولونوب کوچه ده منحل
گون باتدى جماعت داغلوب دورو بریندن
قویمازدی گله بیر نفری ره گذریدن
..
..
..
گلدی دایانوب بیر قاپودا حالی پریشان
گه باخدی ساقا گاهی سولا دیده سی گریان
دعوا ایلیوب چوخ یورولوب با دل سوزان
وردی قاپونی چخدی همان خانه دن عورت
فرمایش ایدوب قلبیمی یاندیردی حرارت
..
..
..
طوعه کتوروب کوزه ده سو مسلمه وردی
نوش ایلدی آبی دایانوب گیتمدی دوردی
دیواره طرف اللری قوینوندا اوتوردی
طوعه دیدی گئت دورما قاپومدا دل سوزان
گئت به بیر طرفه ایله جوان جانوی پنهان
..
..
..
وئرّم سنی زهرایه قسم ای قدی رعنا
سن ایله دعا مسلمی ئولدورمَسون اعدا
بیر شورش غوغادو بو شهر دورما قاپومدا
گلدی دله ای مومنه من مسلم زارم
نه واردور ایووم نه آدامم جنگه دچارم
..
..
طوعه یخلوب اؤپدی ایاقین دل سوزان
عرض ایتدی آقا گل ایوه جانم سنه قربان
باخدوم تانیا بولممیشم من ایوی ویران
بیر عالی اطاقه قدمین قویدى او سرور
پاک ایتدى الینى یوزونی آنی دلاور
..
..
..
طوعه او گجه حرمت ایدوب نائب شاهه
یازدیردی آدین دفتر درگاه پناهه
قان آغلادی تپراقی سپوب زلف سیاهه
گلدی گجه نون عالمی اوغلی دیدی مادر
باشوندا کی معجر بلشوب خاکه سراسر
..
..
..
سرعتله اطاقه گیدوسن با دل سوزان
گلدی دله من ایلمیشم مسلمی مهمان
بو کوفه ده بی چاره غریب دیده سی گریان
البتده آنا لطف ایلیوب اولدى قوناقیم
مسلم قدمی دگدی فروزاندی اطاقیم
..
..
..
دوردی ایاقا گلدی اؤپوب مسلم الیندن
رد ایلدی آیا گوره سن بغضی دلندن
بیر ذرّه اونون واهمه سی یوخ اجلندن
صبح اولدی خبر گلدی وروب ابن زیاده
طوعه ایوینه اولدی روان آتلی پیاده
..
..
..
گوز قانلو عرب لر در و دیواره دولوبدور
طوعه خانمون واهمه دن رنگی سولوبدور
ال آتدی در خانه ده گیسونی یولوبدور
سسلندی آقا گلدی قوشون آل اله شمشیر
دریا کیمی روباه لره حمله ایدوب شیر
..
..
..
باشلاری بچوب توکدى حیات خانیه اول
اوندان سورا تیغیله ایدوب کوچه نی مقتل
عباس جوان باری تماشاسینه بیر گل
یالقوز ایلیور جنگ و جدل نایب سلطان
یوز مین نفره مسلم ایدوب حشری نمایان
..
..
..
بیر کوچه ده چوخ چاه لری قازدی عرب لر
مستور ایلیوب جنگی اورا سالدی سراسر
بیر حمله ده بیر چاهه دوشوب شیر دلاور
فوراً توکولوب چاهی آرایه آلوب اعراب
داش دگدی قلج دگدی ایدوب مسلمی بی تاب
..
..
..
باغلاندى مبارک قولى باشدان یارالاندى
باطنده خانم فاطمه قلبی پارالاندی
گوزدن یوزونون اوستونه آلقانی رواندی
اعدا گتوروب بزم زیاده او جوانی
بیر حالدا زیاد اوغلی گوروب شیر ژیانی
..
..
..
امر ایلدی جلاده گلوب باشنی ورسون
اذن اولمادی بیر صندلون اوستونده اوتورسون
نسگل سوزونی آخر عمرونده بویورسون
جلاد آپاروب باشنی بام اوسته کسوبدور
توز تیراقی یاغدیردی قرا یللر اسوبدور
..
..
..
واللهی دخیلم بو جوانه من ناچار
یالقوزدی آدامسیزدی اونا گوزلریم آغلار
ثابتدی آدیم قبرینی گر گورسه قوجاقلار
ـــــــــ
ـــــــــ (1)
..
..
..
(1) دو مصرع آخر در کتاب چاپ نشده بود
..
..
..
#مسلمیه #ثابت_اردبیلی #ترکی #زبدةالاشعار
نظر دهید