چخدی گون یاسه باتوبدی عالم عاشورا گونی

#عاشورا_گونی
.
✍️ زبدة الاشعار ✍️
?: @nohe_torki
.
علیرضا عباسی (احسان تبریزی)
.
چخدی گون یاسه باتوبدی عالم عاشورا گونی
غمدن اولدی قامت دنیا خم عاشورا گونی
.

صبح عاشورا اولوب اهل حجابات آغلاشوب
یئرده کی ظلمه گوره یکسر سماوات آغلاشوب
بی گنه قانلار توکولدوقجه جمادات آغلاشوب
کائنات آز قالدی اولسون برهم عاشورا گونی
.

کربلاده حقیله باطل اولوبدور روبرو
باطلین نیروسی چوخ افراد پست و کینه جو
سالکان راه حقین دیللرینده ذکر هو
وئردیلر جان حق یولوندا باهم عاشورا گونی
.

بیر وقایع یوز وئر یب یوخدی نظیری دهریده
گورسنوب اعجازی اول گون هر دهات و شهریده
آسمان قان آغلادی دریا و خشکی نهریده
یاندی کوثر. سلسبیل. هم زمزم عاشورا گونی
.

ناجوانمردان تاریخ ایلدی ظلم مزید
باغلادی راه فرات وعلقمی قوم پلید
کوفه اهلی ظلم ائدیب کامه چاتا فاسق یزید
گور نه ایش گوردی طلا ودرهم عاشورا گونی
.

بیر نبرد نابرابردور حقیقت له مجاز
لشگرین دوردی قباقینده او گون شاه حجاز
اوخلارین چونکه قباقینده ادا ائتدی نماز
پایه سی اولدی نمازین محکم عاشورا گونی
.

قانه باتدی یاوران شاه دین میدانیده
مست اولوب لار جام وحدتدن ره جانانیده
آفرین اول راد مردانه دم بحرانیده
زخم عشقه قویدولار چون ملحم عاشورا گونی
.

قانه باتدی مسلم وابن وهب حر وحبیب
هم زهیر وشوذبیله عابس اول ابن شبیب
نافع وجون وبریر جمله مردان نجیب
قانلارین دینه بیلیبلر ملزم عاشورا گونی
.

یان یانا یاتدی قان ایچره جمله یاران قلیل
نوش ائدیب لر نوک خنجردن می ناب واصیل
فی سبیل الله اولوب پیر و جوان یکسر قتیل
گویده گون ظهری کچیردی کم کم عاشورا گونی
.

نوبت دعوا یتشدی تا که آل اطهره
اذن میدان آلماقا بیر بیر گلیب لر محضره
شاه دین اول اجازه صادر ائتدی اکبره
اکبر ئولدی دوتدی عالم ماتم عاشورا گونی
.

اکبر وقاسم گئدیب عباس مه پیکر قالوب
چوخلارین شیر خدا اوغلی اوگون آتدان سالوب
بیر بیره نظم سپاهی ووردی تا نهری آلوب
آدلانوب سردار نهر علقم عاشورا گونی
.

لشگر کفاراو نام آور قولون ائتدی قلم
دوشدی مرکبدن اولوبدی سرنگون تاکی علم
فاطمه اوغلی قالوب تنها او چولده دیلده غم
قالمادی اول شاهه یارو همدم عاشورا گونی
.

آخرین سربازی اصغر دی اونی آلدی آله
لشگر ه گورستدی عطشان غنچه سین باخ نسگیله
دلسیز آهونی نشان تیر ائدیب دی حرمله
توکدی گوز یاشی یوزه چون شبنم عاشورا گونی
.

ال ایاق چالدی بالاسی سینده ایوای دئدی
عالم معناده ده زهرا حسینیم وای دئدی
شاه مظلومان اودم مظلوم بالام لای لای دئدی
قتلگاه اولدی سنه بو سینم عاشورا گونی
.

آخرساعات عاشورا ده شاه کربلا
اولدی میدانه روان اول معدن صبر و رضا
صولتین اشرار پسته بیلدیره شاه هدا
عازم میداندی میر اعلم عاشورا گونی
.

یکتنه ووردی سپاهی بیر بیره حیدر کیمی
وحشته اعدانی سالدی فاتح خیبر کیمی
لشگر ین نظمین پوزوبدی حمزه وجعفر کیمی
مرحبا اوغلوم دیوب دی خاتم عاشورا گونی
.

لبلری عطشاندی خسته حجت پروردگار
تیغ اتشباریله اعدانی ائتدی تارومار
یوز قویوب دی کوفیه ساری ائدیب لشگر فرار
سسلییر اَینَ تفرون اولدم عاشورا گونی
.

جنگیدن فارغ اولوب ایستوردی دینجلسین بیر آز
یاره لیدی هم سوسوز یالقیز اوسلطان حجاز
بانگ ووردی شمر دون دورین آلیب اهل مجاز
آتدیلار داش هرطرفدن محکم عاشورا گونی
.

سجده گاهین بیر ستمگر داشینه قیلدی نشان
آخدی ثارالله جما له آغلادی چشم زمان
قوزادی دامانینی قانی سیله میرجنان
باشنا ووردی خلیل وآدم عاشورا گونی
.

حرمله ائتدی کمان اوسته اودم تیرین سوار
زهریلیدی هم سه شعبه یدی اوتیر جانشکار
قلب شاه دینه ووردی اولدی عالم تیر وتار
قانه غرق اولدی ذبیح اعظم عاشورا گونی
.

قانی آخدی دینیدن رفع حوائج ائلدی
درده دوشموش دی قانی دینه معالج ایلدی
بیلمیرم دالدان نه نوعی تیری خارج ایلدی
جان حسین سسلیب رسول اکرم عاشورا گونی
.

کوفه نین روبه لری شیری گوروبلر ناتوان
جراته گلدی یاخین لاشدی اونا سرکرده گان
هربیری بیر یاره ووردی ناله ائتدی قدسیان
آز قالوب اولسون عوالم برهم عاشورا گونی
.

قورتار احسان ،بو سوزی قورتارماز عاشورا سوزی
ایلیب احسان سنه چوخ زاده ی زهرا اوزی
بو سوزی تکرار ائدیب قان یاش توکر مهدی گوزی
غمدن اولدی قامت زهرا خم عاشورا گونی
.

#عاشورا
#چخدی_گون_یاسه_باتوبدی_عالم_عاشورا_گونی
#علیرضا_عباسی
#ترکی
.
✍️ #زبدةالاشعار ✍️
?: @nohe_torki