زبانحال حضرت زهرا (س)
.
.
#سبک_ساخلا_ناقه_می_کاروانیدن (بیش از 8 سبک زنجیر و سینه زنی)
.
.
محمد قربانی (وصال تبریزی)
.
آز قالور غروب ایلیه باتا
آفتاب عصمت عم اوغلی جان
گل اوتور کناریمده ایلیم
بیر نچه وصیت عم اوغلی جان
.
.
باشیم اوسته ابر بهار تک
توکمه گوز یاشون آغلاما بئله
آغلیاندا سن من دوزنمورم
نار فرقتون اوت ورور دیله
جان وئرن زمانیمده گل اوتور
اشگیوی یوزونون سیله سیله
توشه اخذ ائدیم غملی گویلومه
یاخشی بیر غنیمت عم اوغلی جان
.
.
آتش محبتده یانماقون
لذتین بیر اهل ولا بولر
بو یارالی سینمده بیر فقط
عشق مرتضادور خدا بولر
یثرب اهلی بولموله بولمسین
فاطمه سنی مقتدا بولر
مقتدای من پیشوای من
ای امام امت عم اوغلی جان
.
.
غملی عمرومون غملی دفترین
گل ائدیم سنیله ورق ورق
غصه لر یوروب مام زینبی
قالمیوبدی منده داخی رمق
هم سنه چتیندی بو آیریلیق
هم منه بوگون ای ولی حق
گل حلال ائله آخره چاتور
عمر فصل وصلت عم اوغلی جان
.
.
عمرمون بهارین نه وقتیده
گور جفا الی ایلدی خزان
من کیمی خزان دیده بیر گلی
وئرمیوب بو باغ فلک نشان
نیلورم داخی قاخموری قولوم
دستماز آلام موقع اذان
عم قیزیوی دیلدن سالوب داخی
قولداکی جراحت عم اوغلی جان
.
.
دوشدی جانیمه سایۀ مرض
درگه ولایت یانان گونی
پای کوب اولوبدی دوشوب شرر
گلشن هدایت سولان گونی
اوزگه حالته سالدی حالیمی
اختر امامت باتان گونی
اولدی گوزلریمده او گونکی گون
همچو شام ظلمت عم اوغلی جان
.
.
یاعلی منیم حالیمه اوگون
باخدی بیر نفر اولمادی یانان
سن منه باخوب یاندون آغلادون
من سنه باخوب ایلدیم فغان
کور اولیدی کاش اوندا گوزلریم
بوینوا سالان دمده ریسمان
من ئولوب دیریلدیم همان زمان
اولدی چون قیامت عم اوغلی جان
.
.
گلستان عصمتده کی اولان
گللریمی قویما سولا علی
اولما سن رضا زینبیم منیم
فرقیمده زلفون یولا علی
چوخ مواظب اول بو حسینیدن
قویما قلبی غملَن دولا علی
تاپشورور سنه دورت دانا گلون
فاطمه امانت عم اوغلی جان
.
.
وصلتون داشین آتگیلان داخی
فرقته اوزون اتصال ائله
قوی مزاره گیزلینجه یاریوی
دفع محنت و ابتهال ائله
فاطمه یوخیمیش بو دهریده
سن عم اوغلی بیله خیال ائله
من ئولوب گئدندن صورا قالار
سنله رنج و محنت عم اوغلی جان
.
.
زینبی کفیل ائتمیشم اوزوم
غم لرینده تک قویماسون سنی
قول آلوبدی مندن دئدی آنا
کربلاده تک قویمیون منی
قول وئرمیشم من گئدم اورا
وقت غارت دشمن دنی
ممکن اولسا گر سنده گل اورا
وقت قتل و غارت عم اوغلی جان
.
.
آدیوی یازوبدور عم اوغلی جان
دست حق اوزی عرش طاقینه
یوخ لیاقتی هر کسین ، سنون
آدیوی گئتیرسون دوداقینه
جدیم امتی اوندا کی گلوب
جمع اولالا محشر ایاقینه
لطف ائله «وصاله» او گونکی گون
قیل اوزون شفاعت عم اوغلی جان
.
.
.
.
#فاطمیه_شهادت
#آز_قالور_غروب_ایلیه_باتا
#وصال_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید