شب عاشورا
..
..
مرحوم شوری تبریزی
..
..
آلموشام من شمردن مهلت باجی یا زینبا
گل غنیمتدور ایداخ صحبت باجی یا زینبا
..
..
استراحت ممکن اولماز سیزلره مندن صورا
دستگیر ایلر سیزی ظلمیله بو اهل جفا
وار هله فرصت دایانما ویر خبر آل عبا
بو گجه بلکه یاتا راحت باجی یا زینبا
..
..
ویرمیشم روز ازلده وعده من جانانیمه
بو بلا دشتنده ظلمیله باتام اوز قانیمه
هر قدر گلسه قبولیمدور بلا بو جانیمه
من یزیده ایتمرم بیعت باجی یا زینبا
..
..
بیر به بیر یار و هواداریم ویرللر امتحان
من اؤزوم ویرّم بو یرده ای باجی لب تشنه جان
شمری گورسن سینم اوسته اگلشوب صبر ایت دایان
سن قبول ایتمه او دم منّت باجی یا زینبا
..
..
آخر عمریمده بو یرده من باجی قیلّام نماز
سو تاپولماز قانیمیلن اوندا آلّام دستماز
ایلرم معبودیمیله تشنه لب راز و نیاز
تا اولا اوددان رها امّت باجی یا زینبا
..
..
صبح اولاندا بو بلا دشتی اولار کوه منا
ویر خبر اوز اوغلونی گورسون دویونجا هر آنا
بیر کفن لیلای مضطر سالسون اکبر بوینونا
ایلسون اوز اوغلونا زینت باجی یا زینبا
..
..
یوز ویرر قارداشیوا هر محنت و اندوه و غم
قولارین عبّاسیمون اهل جفا ایلر قلم
اوندا که گوردون باجی مشگ اوخلانوب یاتدى علم
اول مهیّا گورماقا ذلّت باجی یا زینبا
..
..
قاسمین طوى ماجراسین من دیوم سن بولگلن
قان حناسى طوى لباسین اشقیا ایلر کفن
یاسه دونسه طوی اماندور ساچلاریوی یولما سن
نوعروسی چکمسون خجلت باجی یا زینبا
..
..
قارداشون قربانلارین بیربیر بو چولده سان ویرر
اللریم اوسته علی اصغر سوسوزدان جان ویرر
سو یرینه اصغره تیر سه شعبه قان ویرر
قان ایچن ساعت یاتار راحت باجی یا زینبا
..
..
سن منه روز ازلدن اولموسان نایب مناب
جان سنون مندن صورا جان بو عیال بوتراب
هر قدر جور و ستم گورسن باجی جان ایله تاب
چون منیلن ایتمیسن شرکت باجی یا زینبا
..
..
بول بو قدر بیر نفر قالماز سنه یار و معین
یاندورولّار خیمه و خرگاهوی بو اهل کین
اهل بیت مصطفایه تنگ اولور روی زمین
ایلینده خیمه نی غارت باجی یا زینبا
..
..
خیمه گاهون اود دوتاندا دوشسه امرون مشگله
ویر همان ساعت خبر عورت اوشاق قاچسون چوله
آت دوشونده قویما قالسون خوردا قزلار حفظ ایله
بیر دقیقه ایلمه غفلت باجی یا زینبا
..
..
باشیوین زینب بلاسین بول داخی ایتمه فغان
ال گوتورمز هر قدر ظلم ایلسه شمر و سنان
باش آچوخ بزم شرابه گر آپارسا شامیان
صبر ایله ویردوقجا یوز شدّت باجی یا زینبا
..
..
هر قَدَر شمر سیزه ظلم ایتسه ایتسون دورماسون
نور دیده مدور سکینم دئ اونی چوخ ویرماسون
بیرده تاپشور شمره سن بیماریمی یاندیرماسون
اوغلوما چوخ ویرمه سون زحمت باجی یا زینبا
..
..
«شوری» ایستر اربعینی بو گلن زوّاریلن
قبریمه اولسونلا زوّار ای باجی حضّاریلن
سن وسیله اول گله گلسونله آه و زاریلن
قالماسونلا قبریمه حسرت باجی یا زینبا
..
..
#شب_عاشورا #شوری_تبریزی #ترکی #زبدةالاشعار
نظر دهید