صبح عاشورا و اتمام حجت حضرت سیدالشهدا
..
..
مرحوم راثی تبریزی
..
..
صفوف لشگره اول شهریار ائتدی خرام
او بیحیالره چوخ حجّت ایلدی اتمام
..
کلام حقی او شه هر چه ایلدی تقریر
او داش اورکلره بیر ذرّه ائتمدی تأثیر
..
قیتدی خیمیه اول کُلّ کایناته امید
دایاندی قلبده مانند کلمۀ توحید
..
اگر چه لشگره اتمام حجّت اولدی مراد
ولیک ایستدی تا حرّی ایله سون ارشاد
..
گرک امام اولان ئوز رعیتین تانیسین
گون ئوز شعاعینی قویماز اؤزوندن آیریلسین
..
سالوبدی جذبۀ محبوب ، حرّى افکاره
ئوزون یتوردی او دم ابن سعد غداره
..
دیدی بو آتش دعوایه اشتعال ایدوسن
مگر حسینیله آخر بو گون قتال ایدوسن
..
جواب وئردی داخی صلحه باغلانوب یوللار
بئله قتال که باشلار دوشه ، گیده قولّار
..
قیتدی ئوز یرینه حُرّ چوخ ملالیله
باشین اشاقه سالوب فکریله خیالیله
..
دوتوبدی رعشه اونی خوف انفعالیندن
ندامت ائتدی ئوزون ، ائتدیقی فعالیندن
..
ایدردی عرض الهی خسارت ایلمیشم
پیمبر اوغلونا من چوخ جسارت ایلمیشم
..
چخوبدی قوم ضلاتدن ، اول سعادتمند
سالوبدی بوینونا حبّ حسین آدیله کمند
..
یتوب حضور امامه او دمده زار و ملول
اولوندی توبه سی درگاه حقّده مقبول
..
او دمده آلدى اله ابن سعد بد بنیاد
کمان و تیر ، دیدی حکم ، حکم ابن زیاد
..
رها اولوبدی کماندان ، چکوبدی ناله خدنگ
هجوم ائتدیله باشلاندى هر طرفدن جنگ
..
یاغوب یاغیش کیمی اوخ دولدوروب هوانی چو مور
اولوب خیام حرم مثل خانۀ زنبور
..
پیاده آتلولار هر یاندان ایلیوبله هجوم
صحابه لر اولاری قیتروب ، بسان نجوم
..
تصور ایله او ساعت خانم لارین حالین
خصوص زینب غم پرورین ئوز احوالین
..
باخاردی حسرتیله گه جوانلارین یوزینه
ووراردی سینه سینه غصّه دن گھی دیزینه
..
خیامدن اوجالوردی صدای ناله و آه
بنات فاطمه فریاد ایدردی یا الله
..
توکردی اهل حرم اشک دیدۀ ترینی
قوجاقلیاردی اوشاقلار او دمده بیر بیرینی
..
ایدردی حمله قوشون جنگیله جدالیله
ووراردی هلهله اعراب قیل و قالیله
..
حسین ئوزی یخلان بیر یارالینی گوتورور
باسوبدی باغرینا نعشین خیامینه یتورور
..
گلوبدی نالیه مرّیخ آغلیوب ، زهره
او قدر ایلدیلر جنگ تاپدی تا ظهره
..
ابو تمامه ایدوب عرض ، کای سلیل امام
اجازه وئر که ائداخ تا نماز ایچون اقدام
..
بو دمده گویلومز ایستور که بیز نماز قیلاخ
سنون دالیندا دوراخ حقّه کشف راز قیلاخ
..
باخوب سمایه او سرور ، دیدی اولوبدی زوال
بو قومدن ایلیون لا محاله استقبال
..
صفوفدن او زمان آیریلوب حصین لعین
نماز آدین ائشیدوب آچدی ناسزایه دلین
..
دیدی حسین بو نمازین سنون قبول اولماز
نماز قیلماقیوا هیچ ثمر وصول اولماز
..
جواب وئردی حبیب ، اول لعین غداره
سنون نمازیوه وار اجر ، یابن خمّاره
.
مبارز اولدی که عالم سعادتین بولسون
حبیب گیتدی بهشته نمازینی قیلسون
..
نمازه دوردی او سرور ولی جماعتیله
نماز خوف قیلاردی ولی شریعتیله
..
نجه نماز وضوسین آلوبدی قانیله
لباسلر بویانوب رنگ ارغوانیله
..
نجه نماز ایدوبلر اونون بله مشقین
سالوبلا قلبه او گزلین خزینه نین عشقین
..
نجه نماز که عالمده اصفیای وفا
گتورمیوبدیله اوهامه بیله ذکر صفا
..
او بیر نمازیدی شأن و جلال و رفعتی وار
که اهل عالم آرا ایمدیده حکایتی وار
..
قوشون او دمده هامی اوخلاری کمانه قویوب
عداوتیله نماز اهلینی نشانه قویوب
..
زهیر بیرده سعید آچدیلار خزینه لرین
گلن خدنگه ایدوبلر نشانه سینه لرین
..
یتشدی بسکه سعیده خدنگ تیر و حدید
تمام اولاندا جماعت تمام اولدی سعید
..
اولوبلا فارغ عملدن ، او عالِمین صلوة
دوشوبله شوقه که تاپسونلا جاودانه حیات
..
گوروب که خیمه لره قوم دون یاخینلاشدی
داشوب او چولده بلا موجی باشدن آشدی
اولان او صاحب ناموس شرع دین اِلاه
او ازدحامه باخوب چکدی اودلی دلدن آه
..
گوروب صحابه سینین آزلیقین وئروب توقیع
که هاشمیه لر اصحابی ایلسون تشییع
..
حرمسراده او دم بانوان عزت و جاه
چکوبله ناله که ای حامیان دین اِلاه
..
پیمبر عترتینه دورمیون حمایت ایدون
قوشون گلولَّه خیامه آماندی همّت ایدون
..
او اتقیالره یوز دوتدی سویلدی او جناب
ایا جماعت توحید حاملان کتاب
..
بودور بهشت یولون آچمیشام قباقوزده
دوروبدی جدّیم آنام شوق و اشتیاقوزده
..
بودور قصور و عیون و بودور جنان العین
بودور ملائک و جنّات نهر ماء العین
..
بو قیزلاری گوروسوز یاش توکولَّه گوزلردن
قالوبلا بیکس امانتدیلر پیمبردن
..
دایانمیون که داخی یوخ دایانماقا وقت
حمیّت عالمیدور ایلیون هاموز همّت
..
او اصفیایه بیله حال ایلدی تاثیر
گلوبدی سینه لری جوشه ، جوش ایدوبله چو شیر
..
ایدوبله سوزیله گوزدن روانه یاشلارینی
وفا یولوندا سپر ایلیوبله باشلارینی
..
..
#عاشورا #راثی_تبریزی #ترکی #زبدةالاشعار
نظر دهید