وقایع مجلس یزید علیه اللعنه و وقایع بعد از آن ( نادم شدن یزید ، اعلان عزا در شام ، رد اثاث غارت ، کوچ از شام )
.
.
مرحوم سعدی زمان
.
.
آه یا صاحب زمان از دست کفار عنید
در دیار شام کردند آنچنان ظلمی پدید
کز شرارش سوزش دلهای سوزان شد مزید
گرچه شد بی پرده زینب داخل بزم یزید
من نمیگویم ولی بی پرده این افسانه را
.
.
.
او بزمده که منیله نگار همدمیدی
تمام مقصدی کشف رموز مبهمیدی
.
دولاندروب منه یوز سویلدی او پاک نژاد
هزار شکر واریمدور سنونکیمی استاد
.
ائدوبدی لطفیله خلّاق حیّ بی همتا
سنی علومه مسلّط خبرلره دارا
.
دیّوله بعضی محدّثلر، آل پیغمبر
او گونکه گئتدیله بزم یزیده بی معجر
.
تمام قول قولا باغلی مخدّرات حرم
نظامیله دوزولوب دور و برده نامحرم
.
او بزمه گلمیشیدی گورماقا اسیرلری
جلالیله دُوَل خارجه سفیر لری
.
بولار نه سوزدی دیّولر که بیر نفر شامی
اسیر گوردی خواتین دین اسلامی
.
دئدی یزیده که ای تخت سلطنتده عزیز
بیرینی بو اسرادن منه بغشله کنیز
.
یزید وئردی اجازه که هر بیرین سووسن
گوتور آپار ائوووه اختیار وئردیم من
.
دوتوب عروس قولوندان او بی حیای دنی
دئدی امیر بغشله منه بو جاریه نی
.
صحیح دور دئ گوروم یا ضعیف دور بو خبر
سالوب خیاله منی بو قضیه شام و سحر
.
یتوردی تا بو یره مطلبی او پاک سیر
عذاریمه جریان ائتدی گوزدن اشک بصر
.
قرار و صبریمی الدن بو ماجرا آلدی
پوزولدی حالتیم آهیم دله شرر سالدی
.
گوزیمده اولدی مجسّم او بزم شور انگیز
همان حکایت شامی و ماجرای کنیز
.
دئدیم امان منه وئرسه بو اشک دیدۀ تر
سنه بیان ائدرم بیل ندور صحیح خبر
.
.
✔️ کنیز خواستن شامی دختر امام حسین (ع) را از یزید طبق خبر از منتهی الآمال
.
یزید مجلسینه واردی مختلف اقوال
ولی صحیحینه کاشفدی منتهی الآمال
.
اونون مؤلفی بیر شیخ دور جلیل القدر
سمیّ حضرت عبّاس چرخ علمده بدر
.
او عالم متبحّر یازار که آل رسول
تمام تخت دالندِیدیلر ولی مغلول
.
کنیز ایسته دی شامی بیرین حرملردن
اجازه حاصل اولاندا یزید کافردن
.
اشاره ائتدی الین شاه کربلا قزینا
که یعنی فاطمه ناموس کبریا قزینا
.
دئدی امیر منی لطفویله ایله عزیز
نجیبه دور بو قزی سن منه بغیشله کنیز
.
ائشیتدی تا بو سوزی دختر شه دوران
یوزین مدینیه دوندردی باشلادی افغان
.
توکوب سرشک بصر چکدی نالۀ جانکاه
یانا یانا خانم عرض ائتدی یا رسول الله
.
بو بس دگل که سنون قزلارون اسیر اولدی
یزید کافر و بیرحمه دستگیر اولدی
.
یتوردی جرأتینی گور هارا بو بد اختر
گتوردی قزلارووی بزم شربه بی معجر
.
جسارتینده نشان خالقه ستیز وئرور
بو شامین اهلینه زهرا قزین کنیز وئرور
.
دیوب بو سوزلری اشکیله گوزلری دولدی
دولاندی زینب کبرایه ملتجی اولدی
.
دئدی ای عمه اماندور منه علاج ایله
بو بس دگل که دونوب گوزده گوز یاشیم سیله
.
محالدور که امان چشم اشکریز وئره
یزید اگر منی بو شامییه کنیز وئره
.
یزده گر چه اسیرم فتاده ام عمه
ولیک سن بولوسن شاهزاده ام عمه
.
عزیز آل عبایم شه جلی قزیام
اسیر اولاندا نولور مرتضی علی قزیام
.
اولان مروّج احکام دین آتامدی منیم
محمّد عربی مصطفی بابامدی منیم
.
بویوردی زینب کبری قزیم دایان قورخما
ایتورمه اؤز اؤزووی ایلمه فغان قورخما
.
یتورمیوب بو زنازاده جرأتین او یره
محمد عربی قزلارین کنیز وئره
.
یزید سویلدی زینب گر ایستسم وئرّم
من اؤز جسارتیمی فعلیمیله بولدورّم
.
خانم بویوردی بو امره ائدنمسن اقدام
اؤزون نقدر بولورسن خلیفۀ اسلام
.
نجه کنیز اولی ظالم پیمبر اولادی؟
خلاف شرعیدی وئرماق کنیز آزادی
.
او دم بو امری ائدرسن که دین ائوین یخاسان
دانوب شریعتی قانون شرعیدن چخاسان
.
عجب دگل که جگرخواره هند دنیاده
قویا یرینده سنون تک اوغول زنازاده
.
بو سوز گران گلوب اول مرتد جفا کاره
او لال اولان دلین آچدی بو نوعی گفتاره
.
حصار مذهبی زینب آتان علی یخدی
نه من بو دیندن اؤز قارداشون حسین چخدی
.
جواب وئردی خانم ای لعین کفر انجام
منیم آتام قلجیله بنا اولوب اسلام
.
اونون الینده گر اولمازدی تیغ آتشبار
شهادتینه کیم ایلردی دهرده اقرار
.
مروّج عالم اسلامه اولماسیدی او شاه
تاپولمازیدی دیَن لا اله الا الله
.
بو سوزلری ائشیدنده یزید اولدی مُجاب
دلینده اولمادی قدرت وئره دوباره جواب
.
او دمده باشلادی شامی دوباره دن گفتار
کنیز ایستماقین ایلدی گینه تکرار
.
یزید سویلدی قیل بزمدن کنار اؤزووی
قوتار بو صحبتی تکرار ایلمه سوزووی
.
.
✔️ ندامت شامی
.
.
گلوب تکلمه شامی یزیده ائتدی خطاب
الیمدن آلدی منیم بو قضیّه طاقت و تاب
.
ندور بو قصه و بو ماجرا بولار کیمدی؟
دئ بیر گوروم منه ای بیحیا بولار کیمدی؟
.
اسیرده بو جسارت بو اقتدار اولماز
سوزوین بو طرزیله ائتسون ادا بولار کیمدی؟
.
.
او عورتیکه سنیله دانشدی آدی ندور؟
کَاَنّهُ دانشور مرتضی بولار کیمدی؟
.
ز بس سوزونده اثر وار قراریمی آلوری
وورور تکلّمی قلبه یارا بولار کیمدی؟
.
سنه قواعد اسلامیله دلیل دیور
دگل اسیر حبش یا ختا بولار کیمدی؟
.
بولاردا گورسنوری چوخ نجابت آثاری
سوزون حقیقیتین ائت برملا بولار کیمدی؟
.
آچوخدی باشلاری وار دور و برده نامحرم
شکسته دلدن ائدولّر نوا بولار کیمدی؟
.
بیری سالوب یوزه زلفین بیری دوتوب ینگین
ائدولّه یوزلرینی اختفا بولار کیمدی؟
.
بئله گمان ائدورم خارجی دگولّه بولار
سن ائتموسن بولار چوخ جفا بولار کیمدی؟
.
محمّدیله بو قومین نه نسبتی واردور
چکولّه نالۀ وامصطفی بولار کیمدی؟
.
یزید سویلدی آل علیدی بو اسرا
بولارا جدّیدی طاها و جدّه دور زهرا
.
او عورتیکه فصاحتده چوخ مؤدّب دور
حسین باجیسی زهرا عزیزی زینب دور
.
یزیددن ائشیدنده بو سوزلری شامی
پوزولدی حالی اؤرکدن کسیلدی آرامی
.
.
✔️ شهادت شامی
.
مخاطب ائتدی یزیدی ایا زنازاده
نه دین دور که دوتوبسان بو دار دنیاده
.
قویوبسان عترت اطهاره خارجی ادی
نه ایلیوب سنه ظالم پیمبر اولادی؟
.
ندور گناهی بو جمعین اسیر ایلمسن؟
جفا و ذلّتیله دستگیر ایلمسن
.
گلوب او حالیده غیظه یزید بد افعال
گوروب ریاسته آز قالدی یتسون اضمحلال
.
دولاندروب یوزونی سویلدی هانی جلاد
گلوب بو شورشه باعث اولاندان آلسون داد
.
گیروبدی مجلسه جلاد الده تیغ اجل
گوروبدی شامی بیچاره وقت عذره محل
.
دولاندروب یوزونی سالدی اهل بیته نظر
بغشلیون منی عرض ائتدی ای مخدّره لر
.
تانیمادیم سیزی ای عترت رسول خدا
دئدیم کنیز سیزه ایلدیم ازلده خطا
.
دوباره وئردی اجازه گوزونده گوز یاشنا
دولاندروب یوزینی شاه کربلا باشنا
.
دئدی یولوندا سنون ترک باش و جان ائدورم
منی بغشله حسین جدّیوه قوناق گئدورم
.
قیامتین گونی اول جدّیوون یانندا گواه
بو لفظه اشهد ان لا اله الا الله
.
شهادتینی دیوب خوش سعادته یتدی
اجل پیاله سی جلّاد الینده نوش ائتدی
.
بو بیر خبردی «حسینی» یازیلدی سرتاسر
که ذکر اولاندا حسینی لر آه و ناله ائدر
.
.
✔️ احوالات مجلس یزید بعد از شهادت شامی ، به نقل از جلاءالعیون مرحوم مجلسی
.
ولی بیر آیری خبر وار گرک بیان اولسون
سرشک چشمیله اهل عزا گوزی دولسون
.
اولنجا حشر حسینون عزاسی قورتولماز
یزید مجلسنون ماجراسی قورتولماز
.
آخار یوزه گوزومون صبح و شام اشک تری
دوشنده یادیمه مرحوم مجلسی خبری
.
یازار جلاءالعیونینده اول حمیده سِیَر
یزید قلب رسول کرامه سالدی شرر
.
او گونکه شامیِ بیچاره نی شهید ائتدی
داغلدی مجلسین اهلی هامی دوروب گئتدی
.
گتوردی حضرت زهرانی خلدده داده
ائدوب غلاملره ام اوُل زنازاده
.
ائدوب علی قزینون سوزلری منه چوخ اثر
گرکدی حبسده قالسونلا بو مخدّره لر
.
سالون وورا وورا زندانه آل اطهاری
قویون ولیک قالا مجلسیمده بیماری
.
همینکه حکم ایلدی اُول دنی عتابیله
غلام لر توکولوب مجلسه شتابیله
.
سالوبلا زلزله ارکان دین و ایمانه
اپاردیلار اسرانی تمام زندانه
.
نه حبسخانه گوگل ایلین زمان اونی یاد
چکر معاویه نون اوغلنون الیندن داد
.
دیم خانملار اولوبلار نه نحویله محبوس
بو قدر وار او که اولوبلار حیاتیدن مأیوس
.
یزید گوردی که وقت نمازه آز قالدی
گوتوردی سیّد سجادی یانینه سالدی
.
✔️ آمدن یزید به مسجد
.
دل پیمبری تیر جفائیله دلدی
عدوّ دین خداوند ، مسجده گلدی
.
خطیبه امر ائدوب اول بی حیای شوم و دنی
چخوبدی منبره مدح ایلیوبدی معاویه نی
.
بنی امیه نی ائتدی او بی حیا تعریف
یتوردی شرع منیر محمّده تحریف
.
او منبری که ائدوب تیغ مرتضی برپا
حقارتیله آپاردی آدین او تخم زنا
.
رسول اکرمی جنتده دلفکارایلدی
حسین و شیر خدانون آدینی خوار ایلدی
.
خلاف شرعی دولاندوردی مستحب ایلدی
سوزی صریح دیوم ، مرتضانی سبّ ایلدی
.
امام عصر دوتوب یوز خطیبه ووردی نهیب
اؤزین ایتوردی سوزین کسدی منبر اوسته خطیب
.
خطاب ائتدی خطیبه امام کون و مکان
بولار نه سوزدی ، خطا دیده قیل سکوت دایان
.
رضای حضرت پروردگاری آتدون سن
رضای خلقی دوتوب دینی مفت ساتدون سن
.
یزیدی ائتدون اوزوندن بو باره ده دلشاد
ولیک خانۀ ایمانی ایلدون برباد
.
او منبر اوسته که السّاعه دوتموسان مأوا
ائدوب او منبری تیغیله مرتضی برپا
.
گر اولماسیدی علینون الینده تیغ دوسر
ننوع پایه لنوردی بو مسجد و منبر
.
دولاندروبدی یزیده یوزین دوباره امام
بویوردی ای قویان آدین خلیفۀ اسلام
.
بیر آز زمان منِ بیماره وئرگیلن رخصت
چخوم بو تخته لر اوستونده ایلیوم صحبت
.
دیوم او سوزلری کیم اوندا وار رضای خدا
ائدوم او سوزلریله دین احمدی احیا
.
یزید وئرمدی رخصت امام بیماره
بُلوردی وئرسه اجازه او شاه ابراره
.
چخار او منبره اَنمز سلیل شیر خدا
مگر ائدر هامی آل امیّه نی رسوا
.
اودور که وئرمدی رخصت یزید بدفرجام
اولوبلا واسطه بو باره ده اکابر شام
.
یزیده ائتدیله اشیاخ شام چوخ اصرار
که ای امیر بو بیر طفلدور اوزی بیمار
.
اجازه وئرسن اگر چخسا منبره بو جوان
سوزینی ایلیه بُلمز بو کثرتیله بیان
.
دوشر اشاقه یقیناً اوزی خجالت اولار
بیزه او حالی اونون مایۀ بشارت اولار
.
یزیدی ائتدیله مجبور شامیان رذیل
اجازه وئردی چخوب منبره امام علیل
.
✔️ خطبه سجادیه در مسجد شام
.
اوتوردی منبرین اوستونده حجّت دادار
امام حقّیله حق مرکزینده دوتدی قرار
.
امام باشلادی بیر خطبه چوخ فصیح و بلیغ
گلوب تکلمه حق سوزلرین ائده تبلیغ
.
باباسی حیدر کرّار تک او افصح ناس
ازل خدای جلیله ائدوبدی حمد و سپاس
.
درود گوندروب اوز جدّینه او فخر هدات
علی فضایلینه ذکر ائدوب نچه آیات
.
قزشدی شیر خدا شیری مثل شیر دلیر
اوزینه منتسب آیاتی ایلدی تفسیر
.
او آیه لر که مدلَّلدی آل طاهایه
اولاردان ایلدی تفسیر بیر نچه آیه
.
بویوردی حجت مطلق ایا گروه ظُلم
او کسلریکه تانوللار منی بُلوله کیمم
.
منی تانوموری اونلار که شرح ایدوم سوزومی
دیوم کیمم اولارا تا تانوتدوروم اوزیمی
.
منم که حجّت برحقّ کردگارم من
منم که عالم ایجاده افتخارم من
.
خدای عالم و آدم او فرد بی همتا
بیز اهلبیته ایدوب آلتی خصلتی اعطا
.
«علوم»و«صبر»و«جوانمردی»و«فصاحتدور»
«شجاعتیله» گوگللرده کی «محبّتدور»
.
علاوه بیزلره لطفیله کردگار جلیل
ویروبدی خلق آرا یدی خصالیله تفضیل
.
او یدّی زاد بودی بیزدندی احمد مختار
فضیلتیم بودی بیزدندی حیدر کرّار
.
اولوبدی بیزلره منسوب حمزه شیر خدا
بلون بو مطلبی بیزدندی جعفر طیار
.
ویروب خدا اونا بیرجفت پر ملائکیله
بهشتده طیران ایلور ایمدی لیل و نهار
.
دیوم صریح که بیزدندی سبطی الرّحمه
بیزاهلبیتی سچوب جمله خلقدن دادار
.
خدای خلق بیزه نازل ایلیوب قرآن
بیزوق معادن وحی و شفیع روز شمار
.
اوزیمی ایمدی تانیتدورام ای جماعت شام
سیزه حسب نسبیمدن من ایلرم اظهار
.
منم او کیمسه نون اوغلی که قطب اعظمدور
او نقطه دور هامی عالم ولی اونا پرگار
.
منم او کیمسه نون اوغلی که عقل اَوَّلدور
اودور خلائقه مرسول قادر غفّار
.
منم او کیمسه نون اوغلی که ایلدی معراج
مقام قربده حقّیله باشلادی گفتار
.
منم او کیمسه نون اوغلی که قابَ قوسینه
یتشدی – اولدی همان یرده کاشف اسرار
.
منم او کیمسه نون اوغلی ردا ایچنده زکات
بغشلدی فقرایه او سیّد الابرار
.
منم او کیمسه نون اوغلی گویون ملک لرینه
امام اولدی – اونا ایتدی اقتدا احرار
.
منم او کیمسه نون اوغلی که انبیا ایچره
سچوب خدا اونی ای شامیان پست تبار
.
منم او کیمسه نون اوغلی که ذوالفقاریله
او قدر جنگ ایدوب اسلامه گلدیلر کفّار
.
منم او کیمسه نون اوغلی بقدر طرف بصر
شریک ویرمیوب اللهه اول حمیده شعار
.
منم او کیمسه نون اوغلی که یر یوزینده ازل
خلوص قلبیله توحیده ایلیوب اقرار
.
امام اوز حَسَبین بو دلیله آندوردی
یتوردی تا بو یره مطلبی دولاندوردی
.
منم بویوردی شهنشاه انبیا اوغلی
منم ولیّ خدا شاه لافتی اوغلی
.
شهنشه حرمینم سلیل آلعبا
آتامدی مکّه و زمزم اودور منا و صفا
.
منیم بابامدی که گوگلرده آدی احمد دور
نبیّ رحمت و یرده آدی محمد دور
.
منیم آتامدی ایکی قبلیه نماز قیلان
صمد پرست و صنم لردن احتراز قیلان
.
منم او کیمسه نون اوغلی اودور شه حرمین
بنای کفری یخان شهسوار بدر و حنین
.
بابام رسول امم دور آتام ولی خدا
آنامدی فاطمه گویلرده شهرتی زهرا
.
منم او کیمسه نون اوغلی که سو کنارینده
شهید اولدی سوسوز کربلا دیارینده
.
منم او کیمسه نون اوغلی که غسلی قان اولدی
یارالاروندان آخوب قانی مصرعی دولدی
.
منم او کیمسه نون اوغلی جفائیله دونان
اون ایکی ضربتیله کسدیلر باشون دالیدان
.
منم او کیمسه نون اوغلی جهانه اود سالدی
جنازه سی قوری یرلرده بیکفن قالدی
.
منم او کیمسه نون اوغلی که گون قباقنده
یارالی نعشی قالوب آتلارون ایاقنده
.
منم او کیمسه نون اوغلی که فرقۀ عدوان
سویوب لباسلرین پیکرین قویوب عریان
.
منم او کیمسه نون اوغلی که خیمه سی یاندی
عیالی قولقولا ای اهل شام باغلاندی
.
منم او کیمسه نون اوغلی که ئولدی قارداشی
دولاندی شهرلری نوک نیزه ده باشی
.
منم او کیمسه نون اوغلی تمام انصاری
یتوب شهادته قولسوز دوشوب علمداری
.
منم او کیمسه نون اوغلی که وار بویوک حَسَبی
آدی حسیندی باباسی محمّد عربی
.
منم او کیمسه نون اوغلی که دینینی داندوز
عیالنی باش آچوخ شامده دولاندوردوز
.
بیزوخ که معدن وحی خدای لم یزلوق
بیزوخ که کلمۀ توحیده مظهر و مَثَلوق
.
منم او کیمسه که الدن قراریمی آلدوز
گُله گُله منه باخدوز تمام کف چالدوز
.
منم او کس که منه شمر دستگیری دیدوز
گیرنده شامه منه خارجی اسیری دیدوز
.
منم که قامتیمی بار ظلمیله بوکدوز
بو شهرده باشما گاه کول گه اود توکدوز
.
.
✔️ غوغای مسجد شام و ادامه خطبه سجادیه
.
اوقدر اوز حسبیندن امام ایلدی یاد
که مسجد اهلی گلوب شوره باشلادی فریاد
.
یزید گوردی بویوک انقلاب اولدی عیان
دیدی مؤذّنه کس انقلابی باشلا اذان
.
دوروب ایاقه مؤذّن ازل دئدی تکبیر
امام ایلدی تمجید – خالقه تقدیر
.
دِیَنده اشهد ان لا اله الا الله
دئدی امام که ویرّم بو لفظه منده گواه
.
اَتیم قانیم سوموگوم تک به تک شهادت ائدر
که یوخدی غیر خداوند کردگار دگر
.
اوچومجی فصلین اذانون مؤذّن ایتدی بیان
محمّد آدین ائشیتدی امام کون و مکان
.
دونوب یزیده بویوردی امیر ملک حجاز
دئ بیر گوروم منه ای قاتل اذان و نماز
.
اذانیده او محمّد که ذکر اولور آدی
منم اونون نوه سی یا که سنسن اولادی؟
.
سنون باباندی محمّد و یا منیم جدّیم؟
دئسن منیمدی واریمدی جوابوه ردّیم
.
منیم بابامدی دیسن کذبدور بو سوز ظاهر
یالان دئمز مگر عالَمده فاسق و فاجر
.
منیم بابامدی اگر بو محمّد عربی
اسیر ایلموسن عترتین ندور سببی؟
.
ویروبسن آل رسوله بیر ایله یرده سکون
نه ایسّیدن نه سویوقدان اولوللار اوردا مصون
.
.
✔️ نادم شدن یزید
.
یزید گوردی که ایشدن اولوندی پاره حجاب
دگوبدی بیر بیرینه مسجد اهلی شیخیله شاب
.
دوشوبدی وحشت و خوفه نمازه ائتدی قیام
صلواته خاتمه وئردی او مرتد ایّام
.
گوتوردی سید سجادی گلدی درباره
خیال ائدوب ائده بلکه اوز امرینه چاره
.
گوروب که سلطنته صدمه آز قالور یتسون
اوز ائتدیقی عمله ایستدی علاج ائتسون
.
دئدی دگلدیم ازلدن رضا بو اجباره
زیادین اوغلنون اولسون گوروم یوزی قاره
.
نه اینکه دلدن اولوبدور انابته عازم
صلاح سلطنته گوردی بو ایشی لازم
.
دئدی گرک گئچن اعمالیمه قصاص ایلیم
مخدّرات بنی هاشمی خلاص ایلیم
.
بلوب که ساخلیا بلمز او شوم بی ایمان
علی عیالینی خوار و اسیر و ناله کنان
.
✔️ اعلان عزای یزید
.
اوز اهل بیتینه امر ائتدی او شقیّ دغا
اولون عزایه مصمم گیون لباس قرا
.
فغان و ندبه و فریاد و نوحه ساز ایلیون
گلنده آل علی سیزده پیشواز ایلیون
.
ائدوب خانملاری احضار او شوم کینه شِیَم
گلوبله مجلسه یکسر مخدرات حرم
.
یزیدین اولدی حرمخانه سینده بیر محشر
که گورمیوب ایله محشر بو گنبد اخضر
.
عزا لباسی ائدوبلر خانملارا تعیین
سیاه پوش اولوب عترت رسول امین
.
چکوبله مجلش آراسیندا بیر قرا پرده
مخدّرات نشیمن قیلوب همان یرده
.
امامه تختنون اوستونده یر وئروبدی یزید
آچوبدی معذرته دل او کین شعار پلید
.
ائدوبدی عرض امامه ای بی حیای دنی
گئچن گئچوب اولان اولدی علی بغشله منی
.
او بی حیاده باخون حیله ایله تلبیسه
امام محضرینه پول قویوبدی بیر کیسه
.
دئدی گئچن گئچوب اوخشاتما گوز یاشون سیله
بونی ئولنلریوه خونبها قبول ایله
.
ولیک بُلمدی وئرسه تمام دنیانی
آناسی لیلیه باغلانماز اکبرین قانی
.
ائدردی پرده دالیندان او حاله لیلی نظر
اؤرکلنوب دئدی ایوای اوغول علی اکبر
.
نجه اوغولسوز آنان تاب ائدر بو سودایه
اوغول گوزوندن ایراق پول وئرولَّه لیلایه
.
✔️ خطاب حضرت کلثوم به یزید
.
مخدّرات بنی هاشم اولدیلار مغموم
دیانا بُلمدی عباس باجیسی کلثوم
.
دل آچدی دخت علی ایلدی یزیده خطاب
عتابیله دئدی ای بی حیای خانه خراب
.
اوتانموسان بُلوسن هئچ نه خطّ ده یروسن
حسینی ئولدوروسن لیک خونبها وئروسن
.
زریله دولسا اگر سربسر بو تحت سماء
محالدور اولا عباس اللرینه بها
.
عروسه وئرسه له دنیاجه زینت و زیور
اونون گوزینده اولار قاسمین بهاسی مگر؟
.
حسیندن صورا زینب جهانی نیلیه جاق
سرشکی قانه دونوب خونبهانی نیلیه جاق
.
ربابه وئرسه له مالین تمام دنیانین
مگر حلال ائدر اوز اوغلی اصغرین قانین
.
دئمه که یرده او قانلار که توکموسن قالاجاق
جزا گونونده آتام سندن انتقام آلاجاق
.
✔️ مکالمۀ امام سجاد با یزید
.
بو سوزدن اولدی خجالت یزید بد فطرت
امام ساجده یوز دوتدی باشلادی صحبت
.
دئدی نه حاجتون اولسا دئ من روا ائدرم
روای حاجتیله قلبیوی رضا ائدرم
.
امام نطقه گلوب سویلدی همان ساعت
سنه واریمدی بو گون یا یزید اوچ حاجت
.
ازل بودور آتامین باشینی زیارت ائدم
همان زیارتی سرمایۀ سعادت ائدم
.
ایکیمجیسی منی ئولدورماق اولسا میلون اگر
معیّن ائت حرمه بیر نفر امین سفر
.
علی عیالینه اولسون مواظب و همراه
جوار احمد مختاره گئتسون آل الله
.
اوچومجی کرب وبلاده سپاه بد فطرت
آتام ئولن گون ائدوبلر حرملری غارت
.
گرک بیزه اولونا ردّ اول غنیمت لر
نچونکه واردی اولاردا زنانه زینت لر
.
یزید سویلوب ازل که سوزوندی امر محال
بیر اوزگه شهره آتان باشین ائتمیشم ارسال
.
گورنمسن او باشی ای سلالۀ اطهار
قوتار بو صحبتی قیلما بو مطلبه اصرار
.
ولیک دلده سنون قتلیوه یوخومدای نظر
سنیله یثربه گئتسون گرک مُخَدَّره لر
.
بویوردی سید سجاد کای ستم پیشه
ندور خیالون ائدورسن منه نه اندیشه
.
بئله گمان ائدورم بُلمورم منِ مغموم
که هاردا دور سرِ خونین سیدِ مظلوم
.
همان او یر که او یردِیدی رأس پاک امام
یوزین او منزله دوتدی امام وئردی سلام
.
سلام اولا سنه ای مکه و منا اوغلی
سلام اولا سنه ای ختم انبیا اوغلی
.
هوایه قالخوب او دمده سر منیر امام
آتا باشی اوغولا ایلیوبدی ردّ سلام
.
سلام اولا سنه ای دستگیر اهل جفا
سلام اولا سنه یابن الخدیجه الکبری
.
یزید گوردی بو اعجازی اولدی شرمنده
دئدی امامه که ای ماسوا سنه بنده
.
تصادفات زمانیله اولما پژمرده
سنون که اولدی ایکی حاجتون برآورده
.
اوچومجی حاجتی تکرار ایلمه اصلا
سیزون خیاموز اولوب کربلاده چون یغما
.
سپاه کوفه و شام ایلیبودیلر غارت
هره بیرین آپاروب اهل شامیدن قسمت
.
نقدر اولسا سنه سیم و زر غرض وئرّم
تمام غارت اولان مالوزه عوش وئرّم
.
جواب وئردی یزده شهنشه بطحا
دگل منیم غرضیم مال دنیوی اصلا
.
دیار کرب و بلاده اولار که قم لجاج
بیز اهل بیتدن ایلوبله ظلمیله تاراج
.
اولاردا بیر نچه زاد وار بیزه امانت دور
گرکدی ردّ اولا مختصّ آل عصمت دور
.
شریعت نبوی ده دگل بو امر روا
زنانه زینتی نامحرمین الینده قالا
.
مخدرات حرم زیورینه نامحرم
تصاحب ایلسه تاب ایلمزلر آلعبا
.
آتام یانیندا علی قارداشیم چکر خجلت
سپاه شامیده گر قالسا معجر لیلا
.
اوزاقدی غیرت عباسیدن که کلثومین
اولا لباسینه صاحب سنان و شمر دغا
.
او کوینگی که آنام فاطمه ایپین اَییروب
آتام او کوینگی گیمیشدی روز عاشورا
.
وئریلمسه منه اول پاره پاره پیراهن
بیر آه سردیله قیلّام هامی جهانی فنا
.
مدینه یوسفی گرگان شام الینده ئولوب
آتاسنا آپاروم کوینگین گرک ایما
.
او معجری که بی بیم زینبون باشیندیدی
او معجری توخوموشدی اوزی آنام زهرا
.
گرک او مقنعه هر یاندادور بو گون تاپولا
بتول قبرینه زینب گئنده باشه سالا
.
ائوینده ساخلیا خولی آنام بویون باقین
اولار خجل آتاسیندان ، آتام ولیّ خدا
.
✔️ ردّ اثاث غارت :
.
یزید گوردی که یوخ چاره امر ائدوب گتورون
اولار که کرب و بلاده ائدوبدولر یغما
.
گلوبدی مجلسه بیر ظالم الده گردنبند
بیر آیریسی گتوروب بیر قانا بلشمیش عبا
.
بیری گلوب گتوروب زینبین لباسلرین
اوجالدی پرده دالندان فغان واویلا
.
بیری گلوب گتوروب پاره پاره بیر کوینک
باخوب او کوینگه داد ائتدی زینب کبری
.
نه کوینک اوخلار ائدوب مثل خانۀ زنبور
سنان و تیغ مُشَبَّک ائدوبدی سرتاپا
.
آخوبدی صاحبنون بسکه قانی قان قوریوب
ائدوب مُضرّج او ثوب عتیقی لخته دماء
.
ایکی الیله ووروب باشینه خانم زینب
دئدی حسین سنه بو بخت قاره جانی فدا
.
بو کوینگوندی وجودونده نه قدر یارا وار؟
شل اولسون اللری کیم بیر بیله ووروبدی یارا
.
او دمده مجلسه بیر شور رستخیز دوشوب
قیامت عالمی اول بزمده اولوب برپا
.
بیری گلوب گتوروب مشکینی اباالفضلین
بیر آیریسی گتوروب الده بیرجه قانلو لوا
.
قارشدی بیر بیرینه فاطمیّه لر یکسر
اوجاتدی اهل حرم بانگ وا ابوالفضلا
.
گتوردولر گلینون قانلو گوشواره لرین
شکسته دلدن ائدوب نی کیمی عروس نوا
.
یارالی دللرین آرتوردی سوزشین بو الم
او قدر اغلادی دویدی مخدّرات حرم
.
.
.
✔️ مکالمه یزد با امام سجاد
.
یزید حضرت سجاده ایلدی اخطار
سنی بو گون ائدورم من ایکی ایشه مختار
.
بو شهرده ائده سوز گر اقامت وسکنی
وئروم عمارت عالی و بیر گوزل مأوا
.
مدینیه گئدوسوز میلیله رضایتیله
یولا سالوم سیزی چوخ عزتو جلالتیله
.
دئدی امام قالام من بو شهرده هیهات
دیوبله بوردا منه خارجی آدی کرّات
.
مخیّر ائتسون اگر شهر شامی ترک ائدرم
حرملری گوتوروب من مدینیه گئدرم
.
خوشام مکانیم اولا یثربین دیارینده
قالام مدینه ده اوز جدّیمون جوارینده
.
ولی ئولنلریمه که سوسوز اولوب مقتول
دویونجا آغلامیوب اونلارا بنات بتول
.
گرک قاباقجا دوتاخ بیز بو شهرده ماتم
عزا ئولنلرینه ساخلیا حریم حرم
.
دویونجا اکبرینه آغلیا آنام لیلا
آتام حسینه ائده ناله زینب کبری
.
یزید وئردی اجازه قورولدی تازه اساس
حسینه شامیده برپا اولوندی مجلس یاس
.
✔️ عزا گرفتن آل الله در شام
.
دیار شامده برپا اولوب عزاخانه
دئمه عمارت عالی همان او ویرانه
.
خرابه نی دوشویوبلر اساس غم توکولوب
خرابه نون در و دیوارینه قرا چکلوب
.
بو فکریله که گئچن گونلره قصاص اولونا
دویونجا باش آچیلا شیونیله ساچ یولونا
.
دیریلره ویریلوب رسم ماتمیله اساس
گیوبله باشدان ایاقه تمام قاره لباس
.
مباد نسگل اولا قبرده گله درده
رقیه نون چکلوب قبرینه قرا پرده
.
بنا قویوبلار او گوندن که کون و امکانه
گورونمیوب ایله مجلس ایله عزاخانه
.
اوتوردی صدرده زینب دلنده ناله و داد
خرابه نین قاپوسین کسدی سیّد سجّاد
.
گلوبدی عالم معناده حضرت طه
یانیجا الده عمامه علی ولیّ خدا
.
همان حسن که جفائیله اودلانوب جگری
عزا دوتوبلا جوان اوغلونا اولوب خبری
.
یارالی قلبنی تیر جفائیله دلدی
اوغول دیه دیه بیر باش خرابیه گلدی
.
هامی بولر بو سوزی چونکه رسم عالمدور
تصور اولسا آیوق قلبه چوخ بُیوک غمدور
.
دیوم که یانمیان اشخاص قلبدن یانالار
علاقمند اولار عالمده قیزلارا آنالار
.
الی قابرقالاریندا دیلینده واویلا
گلوبدی زینبه سس ویرماقا خانم زهرا
.
زبانحالیله گویا دیردی آغلا قیزیم
یانوندا قمچی وُران یوخدی سینه داغلا قیزیم
.
سنوب قابرقام اگرچه بالا سسیم گلمور
ولیک ناله دن آشفته قلب دینجلمور
.
حزین سسیله نشان نالۀ جرس ویرّم
دِیَن زماندا حسین وای سسووه سس ویرّم
.
او مجلس عکسی سماواته منعکس اولدی
حسین سسیله حجابات و نه فلک دولدی
.
چکردی گویده ملک لر فغان و ناله و آه
ووراردی باشلارینا یرده اولیاءالله
.
بهشتده چکلوب جار کشف اولوب مطلب
حسینه شامده ماتم دوتوب خانم زینب
.
آچوبلا غرفه لری دوردولار تماشایه
اولاردا شور عزا سالدی خلد اعلایه
.
نجه عزا که مجسّم اولان زمان نظره
همان او مجلسین اوضاعی اود وُرار جگره
.
عزاده رسمیدی بیر روضه خوان اولار امّا
او مجلسین هاموسی روضه خواندی سرتاپا
.
توکوبله مجلسه شور و نشور اساسلرین
ئولنلرین سویولان اوخلانان لباسلرین
.
نجه لباس زبس اوخ ووروبلا قوم شرور
اولوب تمام مُشَبَّک چو خانۀ زنبور
.
اولوب مقدمۀ داده کاشف مطلب
اسیرلر شرفی فاطمه قیزی زینب
.
یارالی قارداشنون کوینکین آرایه قویوب
دِیَر شل اولسون او اللر که بو لباسی سویوب
.
بو قدر کیم وُرولوبدور بو کوینگه پیکان
دگوب وجودووه یکسر آخوب یریندن قان
.
آدینی غارت پیراهن اهل کین قویدی
بُلنمورم نجه دل سختمیش نجه سویدی
.
بیر آیری سمتده کلثوم ایدر روان اشکین
قویوب برابره عبّاسین اوخلانان مشکین
.
آلوب الینه خانم بیر قانا بلشمیش علم
دیور باجون سنه قربان منه گراندی بوغم
.
باخان بو پرچمه ای صاحب هنر قارداش
بُلَر وجودون اولوب اوخلارا سپر قارداش
.
سالوب او مجلسه اوضاع شورش محشر
کلید باب غم عمامۀ علی اکبر
.
سالوب برابره هر بیر اسیر بیر جامه
یتشدی لیلی مجنون نمایه عمّامه
.
باسوب او دوغرانان عمّامه نی ئورک باشنا
ویروبدی چشمۀ چشمینده اذن گوز یاشنا
.
.
ایدور عوالمی مجنون عوالمین پیدا
مقام عشقده مجنوندی شهرتی لیلا
.
بهار ابری کیمی گاه گوزلری دولوری
سووُموری ئوره گی قانلو ساچلارین یولوری
.
گهی باشندا الی گه دیلینده وا وَلَدا
اوغوشدورور ئورگین مجلسه سالور غوغا
.
باخور اویان بویانا گه توکور سرشک بصر
دیور فغانیله ایوای اوغول علی اکبر
.
جهاندا بیر سنیدون نخل عمریمه حاصل
تمام زحمتیمی ایلدی فلک باطل
.
یارالارون گوزیمه هر نفسده جلوه لنور
بلی اوغولسوز آنالار باشینا کول اَلَنور
.
سالوب او بزمده هر بلبل ئوز گولون یاده
سریّه شیون ائدردی بالاسی داماده
.
باسوبدی سینه سینه طوی گونی گین کفنین
قلجلاریله اولان پاره پاره پیرهنین
.
ووراردی باشه دیردی اوغول عزاسیدی بو
کفن اولوب بالاما گر چه طوی لباسیدی بو
.
بو بس دگلدی آتادان یتیمیدی اوغلوم
یتیم لیق غمی ائتمیشدی قلبیمی مهموم
.
شکفته وقتی خزان یتدی اول گل یاسه
مراده یتمدی دوندردیلر طویون یاسه
.
ائدنده قاسم آناسی بو دللریله نوا
ئورکلنردی یاناردی عروس بخت قرا
.
اولوردی عفتی مانع اوجادان آغلاماقا
شرار شعلۀ آهیله سینه داغلاماقا
.
گلوردی شیونه گزلنجه سینه داغلاردی
باخاردی گوشۀ چشمیله دلدن آغلاردی
.
یاواش یاواش ائدوب افغان اولوردی نوحه سرای
دیردی وای طوئی یاس اولان عم اوغلوم وای
.
خانیملار آغلادی از بسکه زلفینی یولدی
خرابه سهلیدی شامات شوریله دولدی
.
هامی ائشیتدی که وار شامده بساط عزا
دوتوب ئولنلره ماتم خلاص اولوب اُسَرا
.
اولار که شامده اوّل گلوردی سرزنشه
سالوبلار ئوزلرینی شکل تعزیت منشه
.
دیردیلر بولاری خارجی بُلوردوخ بیز
گلنده شامه ازل طعن ایدوب گُلوردوخ بیز
.
گلون گئداخ بولارین ماتمینده تسلیته
ویراخ تسلّی آچاخ دل تمام معذرته
.
حنا یاخانلار اله باشه سالدیلار قاره
گلوبله تعزیۀ اهلبیت اطهاره
.
اناث شام گلوب دسته دسته فوج به فوج
خرابه دن ایدوب افلاکه واحسین سسی اوج
.
ائله ملردیله آهو کیمی مخدّره لر
که سس وئروب اولارا آغلاشوردی دشمن لر
.
ائدوبله یدّی گون اولاد مصطفی ناله
هلاکت ئوز وئره آز قالدی خردا اطفاله
.
دئمه بو یدّی گونی بیر نفر ییوب یاتدی
او قدر ایلدیلر ناله سسلری باتدی
.
امام گوردی که بیر گونده طول چکسه عزا
اولار هلاک خواتین یثرب و بطحا
.
دوتوبدی رأیی علاقه عزا تمام اولسون
آز آغلاسون بالالار ساچلارینی آز یولسون
.
اگر چه شامیده یتسه تمامه بو ماتم
تمام اولان دگی تا واردی صفحۀ عالم
.
بتول نائبه سی زینبه یتوب بو خبر
دوباره جوشه گلوب گوزلرینده خونِ جگر
.
دئدی هنوز منیم دویمیوب گوزوم یاشدان
گرکدی قارداشیمون ماتمین دوتام باشدان
.
کسوک باشیله ئوزی گلمه سه او شاه زمن
محالدور که یغام قارداشیم عزاسینی من
.
ائدوم نه نوعیله کلثومه بو سوزی اظهار
رشید قارداشیم عبّاس ماتمین قورتار
.
بو بزمه گلمسه اکبر او مظهر طاها
نجه اولور دوتا آرام ناله دن لیلا
.
خبر وئریلدی یزیده که باشلاری گوندر
سرشک چشم خواتینی قانه آز دوندر
.
✔️ آوردن سرهای شهدا به عزاخانه :
.
او وقت اولوب که بلا تیری دللری دلدی
عزانی یغماقا صاحب عزا ئوزی گلدی
.
او حالیده که آخاردی عذاره قان یاشلار
منوّر ائتدی عزاخانه نی کسوک باشلار
.
قاباقدا بیر یارالی باش که چوخ منوّر دور
یارالی باش دئمه توحیده عمده مظهر دور
.
محاسنی بلشوب قانه وجهی گرد آلود
ولیک آینۀ وجه ذات داور دور
.
سالوبدی خطّ باشیندا خطوط منکسره
جبینه باشدا اولان خطّ لر برابر دور
.
آغیزدا اوخ یاراسی سجده گهده داش یاراسی
بوغازدا نیزه یری لالۀ محمّر دور
.
هنوز وار لب لعلینده خیزران اثری
قزل گول اوسته هویدا بنفشۀ تردور
.
عقیق لبلر اولوب ظلمیله زبرجد رنگ
نشان چوب جفای یزید کافر دور
.
دالنجا ارخه لنور چوخ هنرلی بیر باشه
یقین بو باشه او باش صاحبی برادر دور
.
او باشدا جلوه لنور چوخ شجاعت آثاری
باخان بُلر که بو شاهه امیر لشگر دور
.
اولوبدی قانیله سرشار چشم مرتضوی
سر منیر ابوالفضل پور صفدر دور
.
نه باش که کاسۀ سرده شکست لیق گورونور
عمود نوفله حاکی جراحت سر دور
.
ووربلا زهرلی اوخ سجده گاه انورینه
کشیده قاشی کماندور مژه چو خنجر دور
.
دولوبدی گوزلری چون مشک قانلو اشکیله
گمان گئدور که بو سقای چوخ هنرور دور
.
یوموبدی گوزلرینی گوئیا خجالتی وار
سکینه دن سو خصوصنده چوخ مکدّر دور
.
گوزون آچانموری باخسون خانملارین یوزونه
عجب رشید دلاور وفالی سرور دور
.
اونون دالنجا گلور بیر گوزل جوان باشی
معاینه دیه سن صورت پیمبردور
.
بشرده یوخدی وجاهتده مثل و مانندی
ملکدی صورت انسانیله مصوّردور
.
باشندا وار عربی زلفی خم بخم پر چین
شمیمی رونق بازار عنبر تردور
.
نه زلف عنبر چین و ختایه طعنه وورار
سبب او زلفیدی مشک ختن معطردور
.
دوشوبدی گوشۀ ابروده هاشمی بیر خال
نه خال دانه و دام قلوب مضطردور
.
ائدوبله باشینی تیغ جنائیله منشق
قلجلانوب باشی گویا باباسی حیدردور
.
باتوبدی خال و خطی زلفی تل به تل قانه
او حسن او خال او خط بیر اسفلی منظردور
.
اناث شام او باشی گورنده سویلدیلر
بولاردا کیم گوره سن بو جوانه مادردور؟
.
او قیز که ساچلارینی یولدی بو باشی گورجک
بو بخت قاره یقیناً بو باشه خواهردور
.
اوجالدی ناگه اوغول وای صداسی لیلانون
دئدی بیر عمردور آدون دیلیمده ازبردور
.
اونون دلالنجا بیر آی پارچاسی طلوع ائتدی
نه آی یوزی دیه سن آفتاب خاوردور
.
ئوزی جواندی قولاقنده قانلو حیدری وار
قاشی، گوزی، یوزی، صنع خدای اکبردور
.
دیوللر آدینه قاسم حسن نشانه سیدور
سریّه آدلو اسیره وفالی دلبردور
.
گلوب او مجلسه اون یدّی یاش بو نحویله
نه مجلس ، اوردا مجسّم بساط محشردور
.
او بزمدن فلکه وامحمّدا اوجالوب
یولوندی ساچ دیه سن بار مشک ازفردور
.
بو حشری محشر عظمائیله ائدن تطبیق
گورر نقدر بو اوندان بلند برتردور
.
جزا شفیعه لری ساچلارین یولاردی تمام
آچان او بزمده باشین بتول اطهردور
.
نه گوردیلر او زمان ئوزگه محشر ائتدی قیام
سبب او محشر کبرایه رأس اصغردور
.
طبقده گتدیله بیر سود امر اوشاق باشی
او آیلارین یانوجا بیر ایشیقلی اختردور
.
امام عصری او باش آغلادور ائدونجه ظهور
گئجه گونوز او باشا انتظار کیفردور
.
« #حسینی» حضرت حجت بو قانی بیر گون آلار
امام منتقم و منتظر مظفّردور
.
نقدر وار نفسون خدمتونده ائتمه قصور
نجات حشرده بو خامه و بو دفتردور
.
.
.
#مجلس_یزید
#سجادیه_خطبه
#خطبه_سجادیه_در_شام
#خرابه_شام
#کوچ_شام
#سعدی_زمان
#آه_یا_صاحب_زمان_از_دست_کفار_عنید
#او_بزمده_که_منیله_نگار_همدمیدی
#کنزالحسینی۲ ص ۲۸۱
#ترکی
#زبدةالاشعار
نظر دهید