مدح حضرت زینب (س)
#گریز به #مجلس_ابن_زیاد
..
..
..
..
سیفی اردبیلی
..
..
..
..
اسوۂ عصمت و حیا زینب
اوج سرمستی و وفا زینب
..
آدیوه دل انیس اولان گوندن
دیمیشم عشقیوه بلی زینب
..
اوخیوب داستان ایثارون
اولمشام حقه آشنا زینب
..
زر و سیم و مقام و شهرت ایچون
منده یوخ ذرّه اشتها زینب
..
دوگمیبوب دست حاجتیم هرگز
آیری بیر درگه عطا زینب
..
من سنون درگهونده خرسندم
اولموشام چاکر و گدا زینب
..
گوزل آدون دیلیمده ازبردور
دیرم هر مکاندا یازینب
..
من قوجالدوقجا مرتبم اوجالور
از ثرا تا به نُه سما زینب
..
چاتمیشام هر نه شأن و منزلته
دولتوندندی جابجا زینب
..
کامیابی گوزل آدونداندی
منیچون ای کرم نما زینب
..
قلمیم گول اکور وفا باغینا
پاک و معطور و پرجلا زینب
..
اهل دل بزمینه ئوزومده گولم
مستند دور بو ادعا زینب
..
واردی بو مدعایه برهانیم
ایلرم خلقه برملا زینب
..
خاک پایون دل اهلنه گولدی
شبهه یوخ سوزده مطلقا زینب
..
گر سنه منده خاکپای اولسام
پس گولم دوزدی مدعا زینب
..
لیک خارم بیر عدّه نون گوزینه
چشم ناداندا وار خطا زینب
..
حق گورن گوز گولی تیکان گورمز
دُرّه ویرمز اوجوز بها زینب
..
مغز جاهل ایدر کج اندیشی
دل حاسدده دور ریا زینب
..
هورسه مین کلب ره دالیمجا منیم
ایتمرم ذرّه اعتنا زینب
..
گیجه گوندوز یازاندا پاک آدوی
دل بو نوعی ایدر دعا زینب
..
..
..
سیفی ام شعریمه حلاوت ویر
مدحوى یازماقا لیاقت ویر
..
..
..
سن وفا قامتینده جوهر سن
سن حیا معدنینده گوهرسن
..
پایۀ صبریده بتوله مثل
استقامتلی سن هنرورسن
..
ذوالفقارون زبان نطقوندور
مرتضی رتبه ده سخنورسن
..
کفریدن انتقام آلان بانو
جانیان زمانه کیفر سن
..
عشق و جانبازی و شجاعتده
همچنان آفتاب اظهر سن
..
یانماقا کوی عشق جاناندا
گاه پروانه گه سمندرسن
..
فخر ایدر آدیوه ابوالایتام
زینت و دودمان حیدر سن
..
الی ایل درده مبتلا اولدون
دفتر للولایه زیور سن
..
آلتی قارداش غمینده تا دم مرگ
دیده گریان و قاره معجر سن
..
ثبت اولوب تلّ عشق پاک آدوا
گور نه والامقام و اشهرسن
..
..
..
قتلگهده زمان بحراندا
سپر سینۀ برادرسن
..
خنجر شمری موم نرم کیمی
غیرتیندن سخان دلاورسن
..
کوفه شهرینده قوللاری باغلی
باشلادون انقلاب دیگر سن
..
ایتدون آل امیه نی رسوا
از زمان تا به یوم محشر سن
..
دهن یاوه گونی سندردون
مشت منطقله ای همافر سن
..
دیدون ابن زیاد ملعونه
یابن مرجانه سن نه خودسر سن
..
مسلمینه اولوبسان استاندار
باورون یوخدی دینه، کافرسن
..
ایلرم من بو ادعانى ثبوت
قاتل زادۀ پیمبر سن
..
ظاهراً حق پرست و باطنده
دست ابلیسه یار و یاورسن
..
کیمدی گور نابکار جدّ و ابون
صورا ور تخت داده لنگر سن
..
..
..
قوم اعرابه ننگیدور آدون
نجس اندر نجسدی اجدادون
..
..
..
زینبم فاطمه نشانی منم
عشق و ایثار جاودانی منم
..
امّیشم شیر پاک زهرانی
ملک تقوانون حکمرانی منم
..
خون هفتاد و دو شهیده وکیل
کفریدن قانه قان آلانی منم
..
لشگر فاتح اسیرانون
شامه قاره علم ورانی منم
..
کوکبم کهکشان عصمتده
بوروین نوری کهکشانی منم
..
..
پرچمیم قانلی ساچلاریمدی منیم
رایت عشق پاسبانی منم
..
قارداشیم قان ویروب قیام اوسته
او قیام و او قان نشانی منم
..
نی کیمی نای دیلده نالم وار
یاندران آهی ماسوانی منم
..
باخما قدّیم خمیده دور غمدن
همّتی مات ایدن زمانی منم
..
منه زینب دیلله یاخچی تانی
کوی ایثار قهرمانی منم
..
داغلی سینم سپردی قرآنه
عترتون سایۀ امانی منم
..
مکتب عشق و ابتلاده اولان
هامیدان مشکل امتحانی منم
..
شهپری زخمدار سیمرغم
چکیلن ناره آشیانی منم
..
قانلی مقتلده نوح مذبوحون
اللرى قانلی نوحه خوانی منم
..
کوینگی دورد مین اوخلی یوسفیمون
باشینون اوسته آغلیانی منم
..
سند افتخار ایدن ئوزینه
آغاران ساچلاریندا قانی منم
..
گون قباقینده چتر زلفی اولان
سینۀ عشق سایه بانی منم
..
توش اولان تیر ظلم صیاده
برّه آهوی بی زبانی منم
..
بال و پرسیز هما کیمی یخلان
نهرون اوستونده پهلوانی منم
..
نیزه ده داشلانان کسوک باشون
قوللاری باغلی باش یارانی منم
..
..
..
دیرم هر گلنده گفتاره
لعنت ابن زیاده میخواره
..
..
..
..
زینبون بازتاب گفتاری
قهره گتدی امیر بی عاری
..
دیمرم نیلدی او قانلی باشا
نه جنایت یاراتدی تکراری
..
ایلدیم پرده ده اشاره غمه
گولیلن بوسه لشدروب خاری
..
بوسۀ خار یاردی گول دوداقین
قانی شبنم کیمی اولوب جاری
..
غملی بلبللرون اوجالدی سسی
رقّته گتدی قلب حضّاری
..
زینب امّا ایتیرمدی ئوزینی
شیر قورخماز شغالیدن آری
..
ظلمه دامن وروب زیاد اوغلی
گوردی زینبده صبر سرشاری
..
ایتدی جلّادی مجلسه احضار
الده شمشیر تیز و خونباری
..
امر ایدوب کس باشین على قیزینون
سال نفسدن بو دخت کراری
..
گوردی جلّادی قهرمان زینب
یاد ایدوبدور خدای قهاری
..
اصغرون قانینه توسّل ایدوب
تاپدی قدرت دل فداکاری
..
پنجه سی باغلی شیرتک ناگه
قصد ایدوب قاتلیله پیکاری
..
اسرا گوردی زینبی تنها
هاموسی سسلدی علمداری
..
بیلدی زینب که قورخوشور بالالار
دل آچوب فوری ویردی دلداری
..
دیدی ای اختران برج شرف
چالشون صبح ایدون شب تاری
..
منده ئولسم باجیم کفیلوزدی
سیزه کلثوم ایدر پرستاری
..
دوگونن قلبوزه بیبوز قربان
صبر ایدون محنته سیزی تاری
..
جان سیزون جان سه ساله بلبلومون
ناز ایدون عندلیب گلزاری
..
من خوشام جان ویرم ولی دیریله
ابن ثاراللهون آخان ثاری
..
ئولسه ده زینبون آدی باتماز
زنده دور تا قیامت آثاری
..
..
..
سیفی ام خامه دستیاریمدور
زینبون عشقی اعتباریمدور
..
..
..
#زینبیه #سیفی_اردبیلی #مجلس_ابن_زیاد_مجلس_ابن_زیاد_سیفی_اردبیلی #ترکی #زبدةالاشعار #زینبیه_مدح
نظر دهید