شهادت امام حسین (ع)
.
#زبدةالاشعار
.
: @nohe_torki
.
مرحوم محمود توتونچی ( بهار تبریزی )
.
او اوخ آتان که حسینی اوخا نشان ائلدی
اوخینی آتدی ، گلوب اوخ قلبینی مکان ائلدی
.
ورولدی ناحق او اوخ ، حق گلوب یئرین آلدی
صراط حقّه یول آچدی ، یولی روان ائلدی
.
بو اوخ او اوخدی ، که موسایه طورده دئیولوب
خدا اوزی بو اوخین شرحنی بیان ائلدی
.
بو بیر خدنگیدی اوچ شعبه لی ، اوزی مسموم
گورون هارانی نشانه بو اوخ آتان ائلدی؟
.
حسینی ئولدورن اول ، همین بو اوخ اولدی
دئماخ اولور که بو اوخ ، قتل ناگهان ائلدی
.
نئجه گلوب؟ نئجه دگدی؟ بو اوخ نئجه دلدی؟
اصابت ائتماخ همان، ناله قدسیان ائلدی
.
نه اوخ گوروندی دگن یئرده، نه اوخین نوکی
قضا الی بو اوخی گوئیا نهان ائلدی
.
تلاوت ایلدی ذبح آیه سین ، دگنده بو اوخ
اوخون یاراسینه جانیله امتنان ائلدی
.
حسینی سالدی ایاقدان داخی بو زهرلی اوخ
وجودینی ایله بی تاب و بی توان ائلدی
.
قاباخ طرفدن اوخی ایستدی ائده خارج
میسر اولمادی هر قدر امتحان ائلدی
.
تمام مقتله باخسان یازیلا شاه شهید
آت اوسته قدینی اگدی ، قدین کمان ائلدی
.
نه زحمتیله دالی سمتدن چخاتدی اوخی
مجال وئرمدی قان سیل ناودان ائلدی
.
یخلدی مصرعینه، اوپدی مصرعین اول
اوزینه تکیه گه ، الطاف مستعان ائلدی
.
نکات چوخدی بو اوخدا ، ولی دئماخ اولماز
الیمده کلک رقم ، شرح داستان ائلدی
.
باجیسی زینب کبری همین بو معنادن
گلنده قتلگهه شرحنی بیان ائلدی
.
حسینی بئله معلوم اولور ایتیرمشدی
ایتیردیقین تاپا بیر سمته چوخ گمان ائلدی
.
بو فکریله دولانوردی ولیک والهیدی
یورولدی دوردی ، دوباره دوان دوان ائلدی
.
یتشدی بیر یره گوردی توکوبله اوخ سنقی
او اوخ سنقلارینی بیر اویان بویان ائلدی
.
حسینی تاپدی اوزی قویلی بیر چوخور یرده
آناسی فاطمه نی یاد ایدوب فغان ائلدی
.
چویردی آرخاسی اوسته ازل او گل جسدی
دل آچدی شکره خانم ، رو به آسمان ائلدی
.
دئدی الهی حسینیم بو عهد و میثاقی
یتیردی باشه بو گون سندن استعان ائلدی
.
دم الستده یا رب رسول عالمیان
بو فدیه نی سنه بیر طرفه ارمغان ائلدی
.
قبول ایله بو قربانی آل عصمتدن
که حق یولوندا رضائیله ترک جان ائلدی
.
بو بیر قتیلیدی ، لب تشنه قاننه بویانوب
بو شامیان سو کیمی قاننی روان ائلدی
.
نه باشی وار نه الی ، نه الینده بارماقی وار
یارالی نعشنی مُثله بو کوفیان ائلدی
.
آنام عزیزی منیم سویگلی حسینیم دور
باجیسی زینبی بیر عمر باغریقان ائلدی
.
یارالی عضوینی تک تک ائدوب خانم تفتیش
اورکده سینه ده سانسیز یارانی سان ائلدی
.
گویون ستاره سیجه گوردی سینه ده یارا وار
باخوب یارالارینا گوز یاشین روان ائلدی
.
ایکی یارانی خانم آرزو ایدوب اوزینه
اورکده هر ایکی سی نقش جاودان ائلدی
.
بیری او یاره لرون نحر اولان بوغازیدی
که بو یارا یرینی بوسه اول زمان ائلدی
.
بیریسی قلبدی که اوخ سوکوب داغتمشدی
باخاندا بو یاریه زینب الامان ائلدی
.
گون ایسی سی قوری یرده گوروب جسمینی عور
پرند ائدوب ساچین ، اول نعشه سایبان ائلدی
.
حسینینی ایله سوز دلیله اوخشاردی
یانخلی سوزلرینه ناله هر باخان ائلدی
.
او حالنه خانمون یاندی قلب دشمن لر
تاسّف حالنه هر کس فغان کنان ائلدی
.
بدنده هر یارانی گوردی ، ئوپدی وئردی سلام
هر عضوینه بو سلامی یکان یکان ائلدی
.
سلام اولا باجی سندان بو نحر منحوره
بو ظلمی قارداشیما رحمسیز سَنان ائلدی
.
سلام اولا باجی سندان بو صدر مقصوره
که آتلارین ایاقی خورد استخوان ائلدی
.
سلام اولا باجی سندان ایکی کسلمیش اله
منیم حسینیمه بو ظلمی ساربان ائلدی
.
سلام اولا باجی سندان بو اوخ دگن قلبه
منیمده قلبیمی یاره بو اوخ وران ائلدی
.
اورک یانور دولوری آتشین مصیبتیله
حسینه غملرینی عرضه لسان ائلدی
.
صراحتاً ایله بیر اوز دوگلماقین دیمدی
ولی سویلماقینی شمّه ای بیان ائلدی
.
دئدی گوزوندن ایراق خیمه لر یانان ساعت
ال آچدی غارته ، غارت بو کوفیان ائلدی
.
گورن دئیردی بو غارت دگل، قیامتدی
زبسکه ظلمده طغیان بو دشمنان ائلدی
.
نه قدری خیمه ده منظوریدی اثاث البیت
توکولدی کوفه لیلر ظلمیله تالان ائلدی
.
آنا بالاسین ایتوردی ، بالادا اوز آناسین
گوروب بو حالی او دم ضجّه مادران ائلدی
.
صغیر اوشاق قیز عیالی آلوبدی دوره سین اود
کسیلدی چاره یولی ، ناله دختران ائلدی
.
داغیلدی چوللره یکسر کبوتران حرم
یانار اود ایچره دوشوب ترک آشیان ائلدی
.
دولاندی رشته غارتده سوز دایاندی «بهار»
کُمیت طبع اوزون مطلق العنان ائلدی
.
حسینه دردیوی دئ، هر نه ایسته سن ایسته
وارین یوخون بو حسین بذل مشفقان ائلدی
.
بو امتیاز بسوندور آناسی زهرانون
سنی حسینه بو عالمده نوحه خوان ائلدی
.
#حسینیه_بهار_تبریزی
#حسینیه_شهادت
#او_اوخ_آتان_که_حسینی_اوخا_نشان_ائلدی
#ترکی
.
#زبدةالاشعار
.
: @nohe_torki
نظر دهید