قتلگاه و تیر سه شعبه
.
✍️ #زبدةالاشعار ✍️
.
🆔: @nohe_torki
.
هدایتی تبریزی
.
ایستور قلمیم شرح ائلیه مختصر اوخدان
شاه شهدا قلبنه دوشدی شرر اوخدان
.
بیر مشک سو زحمتله گتیردی اله عبّاس
اولدی زحماتی ولی آخر هدر اوخدان
.
بیر گوز , ایکی ال وئردی سویا خاطر ابوالفضل
سو آخدی یئره قلبی اولوب منکسر اوخدان
.
شرم ایلورم عنوان ائلیم بو سوزو , والله
عباسه یئتشدی نچه نوعی خطر اوخدان
.
بیر اوخ گوزونون گورماقنی آلدی الیندن
بو سوزده گرک شیعه اولا دیده تر اوخدان
.
بیر اوخ دا خطا گئتدی دگیب جردی سو مشکین
سو گئتدی , ابوالفضله یئتشدی ضرر اوخدان
.
اللر یوخودور دفع ائله سین تیر بلانی
علّت اویودور جسمی دولوب سربه سر اوخدان
.
بیر اوخ دا دگوب سجده گهین ائتدی پریشان
قان آخدی یوزه قلبنه یئتدی کدر اوخدان
.
بیر ظلم اولونوب باشی عمودیله یارلدی
آتدان یخلئب جسمنه اولدی گذر اوخدان
.
اللر یوخودی اوخلارین اوسته یئره دوشدی
یاره درینه دوشدی اولوب خونجگر اوخدان
.
.
افسوس و صد افسوس قضانین روشندن
حلقی بچلیب قالموب امان سودامر اوخدان
.
شش ماهه بالانین بوغازی , تیر سه شعبه
بیر فکر ائله گور اصغره اولدی نه لر اوخدان
.
بچدی قولاقندان قولاقا حلقین او طفلین
پاره اولونوب حلق ظریفی کسر اوخدان
.
اصغر بوغازین , شه قولون اوخ ایلدی یاره
فریاد اوخ آتان حرمله دن , الحذر اوخدان
.
آتدی بوغازین قانی بویاندی یوزو قانه
استبرق سرخیله بوروندی گهر اوخدان
.
چون شأنی اوجیدی آتاسی اللری اوستن
پرواز ائله دی باغ جنانه سه پر اوخدان
.
اوجون دا دوتوب قانین امام آتدی هوایه
تا حشره کیمی قان قالا گوی ده اثر اوخدان
.
اصغر قوتارئب , آچدی قاناد جنّته اوچدی
اما آناسی اولدی اؤلونجه ملر اوخدان
.
بیچاره آنا بیلمه دی قربانگهه گئتسه
شش ماهه بالا قرمزی کوینک گئیر اوخدان
.
یاخشیدی هله گورمه دی میدان دا بالانین
حلقی بچلئب چانه نه نوعی اسر اوخدان
.
قان اولدو اؤرک آخدی گوزوم یاشی جماله
عمروم بویی قان آغلاسام آزدی اگر اوخدان
.
بیر اوخ کی حسین سینه سینی ایلیه ویران
عالم نجه اولماز بو غمه دیده تر اوخدان
.
اوخ سینه سنه دگدی چخئب پرلری دالدان
فکر ایله آقا گور نه اذیّت چکر اوخدان
.
هر نیلدی کی سینه سی اوستن اوخو چکسین
اوخ چخمادی هئچ , قلبی چکبدی نبر اوخدان (1)
.
چکدی دالیدان خارج اولوب تیر سه شعبه
اولدی کورگی , سینه سی الوان تبر اوخدان
.
پیراهننین دامنئن اوخ زخمنه باسدی
تعطیله یئتیب سرعت فتح و ظفر اوخدان
.
قان آخدی یئره تاب و تواناسی آزالدی
لنگر ائله دی جسمی , خم اولدو کمر اوخدان
.
زهرا بالاسی دوشدو یوزی اوسته ترابه
رحم ائتمه دیلر اوستونه یاغدی مطر اوخدان
.
نیزیله سنان نحر ائلدی حلق شریفین
نیزه یاراسی اولدو بوغازدا بتر اوخدان
.
داد حرمله ظلموندن ایا مهدی زهرا
قان پرده سی چکدی یوزه , قرص قمر اوخدان
.
یاندی اؤرگیم سنسئن حسینه اوخ آتان ال
نظم ایلوب ( هدایت ) توکر اشک بصر اوخدان
.
(1) نبر: بانگ بر زدن
.
.
#حسینیه_هدایت_تبریزی
#حسینیه_شهادت
#ایستور_قلمیم_شرح_ائلیه_مختصر_اوخدان
#ترکی
.
✍️ #زبدةالاشعار ✍️
.
🆔: @nohe_torki
نظر دهید