ایلدیم مدرسه لر ایچره مقر #حیدریه_سیدعظیم_شیروانی

ها عَلیٌّ بشرٌ کَیفَ بَشَر
.
.
سید عظیم شیروانی
.
.
ایلدیم مدرسه لر ایچره مقر
اهل تفسیره اولوب خدمتگر
.
غیر نحو ایله ائدیب عؤمرومو صرف
منطق و حکمته اولدوم مخبر
.
اوخودوم مختصر و فقه و اصول
ایلدیم درس مطوّل ازبر
.
درک ائدیب ماضی و مستقبل و حال
دل اولوب جامع اشکال صوَر
.
روز و شب جمع حضورومدا اولوب
جلد بو معشر مَن لا یَحضَر
.
منه کشف اولدو معانیّ سخن
علم قطبوندا کی اولدوم محور
.
بیر گئجه دیدۀ حق بینیم آچیب
ایلدیم جوملۀ آیاته نظر
.
تا کی گؤردوم بو سؤزون مضمونو
جُمله آیاتدا اولموش مضمر:
.
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
بیر گئجه میله وئریب قلبه صفا
ائتدیم آئینۀ اسرار خدا
.
گؤردوم اول آئینۀ لم یزلی
ما سوی اللّهی ائدیبدیر پیدا
.
قلم و کرسی و لوح محفوظ
مهر و ماه و فلک و قطب سُها
.
طوبی و کوثر و تسنیم بهشت
اولوب اول آینه دن جلوه نما
.
صف چکیب جملۀ حوران جهان
هره بیر نوع اولوب نغمه سرا
.
صوت تسبیحله افلاکه دوشوب
هر زمان غُلغُلۀ شور و نوا
.
من بو کیفیت ایله محو نگاه
جان و دئیرلر اولا بو حاله فدا
.
بو ایکی مصرع ایله گؤردوم ائدر
جبرئیل عالم بالاده ندا:
.
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
دون خراباتا گیریب مست و خراب
طلب ائتدیم قدح بادۀ ناب
.
پیر میخانه منی مست گؤروب
ائتدی پیمانه نی لبریز شراب
.
لب پئیمانه یه یئتدیکده لبیم
نظریمده چکیلیب جمله حجاب
.
پردۀ غیبده بار ازلی
جلوۀ حُسن اولوب برق نقاب
.
گؤردوم اول نور تجلاسین کیم
ائتمه دی جلوه سینه موسی تاب
.
غیرت عشق اولوب مانع غیر
اؤزلوگومدن اؤزومه ائتدی خطاب
.
چون فنا بولدو وجودوم اؤزومه
ائتدی هر عضووم انا الحَقّ خطاب
.
تا ائشیتدیم بو سؤزو کیم سؤیلر
شیشه ایچره غلیان می ناب:
.
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
دون گئجه وار ایدی باشیمدا خُمار
ایلدیم دِیر مغان ایچره گُذار
.
صف ریندانینی گؤردوم ییغیلیب
جمله پیمانه کش و باده گُسار
.
بیریسی رقصه گلیب الده قدح
بیریسی مست دوشوب باشدا خُمار
.
بیر طرف چنگ و دف و بربط و عود
بیر طرف تار و نی و موسیقار
.
ذکر مجلس نغمات غم دوست
شمع محفل لمعات رُخ یار
.
نالۀ عود بو کیم: یا معبود!
نغمۀ تار بو کیم: یا ستّار!
.
گر چه بیگانه ایدیم من لاکن
عشق اودو جانیما سالمیشدی شرار
.
ائشیدیب گؤردوم ائدر بو سؤزو ذکر
گاه نی نغمه ده، گه ناله ده تار:
.
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
بیر گئجه باشا چکیب بیر نئچه جام
ایلدیم مست کلیسادا مقام
.
توتدو اطرافیمی ترسا بچه لر
هر بیری حُسنده بیر ماه تمام
.
بیرینین زولفونه عنبر چاکر
بیرینین رویونا خورشید غلام
جمله سی کُفر لباسیندا ولی
حقّدن غیری یوخ اونلاردا مرام
.
چشم حق بین ایله باخدیم گؤردوم
کفرده جلوه گر اولموش اسلام
.
جمله توحیدی و تثلیث مقام
جمله تسلیمی و تکفیر نظام!
.
محو نظّاره ایدیم واله و مست
کی بو حالا نه دیر آیا انجام؟
.
ناگهان گؤردوم او اثناده ائدر
بو سؤزو جمله سی تسبیح اصنام:
.
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
اویقودان صوبح کی بیدار اولدوم
واقف عالم اسرار اولدوم
.
سیّد! آلدیم اله وحدت جامین
ایچمه میش جامینی سرشار اولدوم
.
یئتیریب باشیما می ذؤقو اثر
جمله اسرارا خبردار اولدوم
.
ایله ییب ترک علایق یکسر
جوهر پاک پُر انوار اولدوم
.
سیر ائدیب عالم لاهوت ایچره
نقطۀ وحدته پرگار اولدوم
.
ماسوادان کسیب اُلفت طرحین
محرم خلوت دلدار اولدوم
.
آیه نی سؤیلمه میش موسا تک
قابل دؤلت دیدار اولدوم
.
ذؤق دیدار ایله مست اولدوقدا
ائشیدیب بو سؤزو هوشیار اولدوم:
.
.
ها عَلیٌّ بشرٌ کَیفَ بَشَر
رَبُّه فیهِ تَجَلّى وَ ظَهَر
.
.
.
#حیدریه #سیدعظیم_شیروانی #حیدریه_مدح #ترکی #زبدةالاشعار