عرض اردات به پیشگاه حضرت علی ابن موسی الرضا(ع) و شِکوه از اوضاع دین
.
✍️ #زبدةالاشعار ✍️
.
🆔: @nohe_torki
.
مرحوم ذهنی زاده
.
ای شهید زهر مأمون یا علی موسی الرضا
طوسده غربتده مدفون یا علی موسی الرضا
.
.
ای غریب طوس ای شاهنشه عالم رضا
روضه وه خادم سلیمان نوح و شیث آدم رضا
درگهون دربانی عیسی زادۀ مریم رضا
هم کلیم و هود و ذالنّون یا علی موسی الرضا
.
.
ای هامی شاهان عالم آستانوندا گدا
خاک دربارون سلیمانلار گوزینده طوطیا
افسرون لولاک ملکون ملک کل ماسوا
امر فرمان همایون یا علی موسی الرضا
.
.
گلشن عدلونده یوخ تأثیر ظلم باد دی
ملک عدلونده شها ایلر رعایا عمر طی
ذرّه دور خورشید ملکوندن بو مرز و بوم کی
کشور جمّ و فریدون یا علی موسی الرضا
.
.
طوس شرقندن چخارگون گونده ای شمس الشموس
بو امیدیله که ایتسون آستانون خاکبوس
مغرب و مشرقدی چشم آفتاب ملک طوس
دور ایدر هر قدر گردون یا علی موسی الرضا
.
.
فیض بوسه آستانون خاک کویوندن شها
خاک آلانماز چشمه خورشید دن فیض ضیا
فیض کویون ویرمسه گون آلماسا سطح سرا
خاک اولار تیز غیر مسکون یا على موسی الرضا
.
.
ای امام هشتم ای تاج شرفله تاجدار
کشور پهناور جان و خرد ده شهریار
هر غریبه یار اوزون غربتده بی غمخوار و یار
دین غمون هر غمدن افزون یا علی موسی الرضا
.
.
بوگونیکه ماتمه مخصوصیدور شاها سنه
اهل دین حیراندی ماتم دینه دوتسون یا سنه
دینه اولاتردی ماتم لر دوتولسون تا سنه
ای هامی آلامه کانون یا علی موسی الرضا
.
.
ای هامی بیچاره و بیدادیلر دادرسی
ای هامی بی کسکرین دنیا و عقباده کسی
اوج ایدوب دینون گوگه هل ناصر ینصر سسی
نصرت ایستور دین بیچون یا علی موسی الرضا
.
.
سن نجه که امّت بی شرم الینده خاریدون
عین حالیکه ولیّ عهدیدون بی یاریدون
ظلم یاد و آشنایه غیریدن ناچاریدون
گوزیاشون دامنده جیحون یا علی موسی الرضا
.
.
دین اولوبدور سن کیمی مظلومه یاد و آشنا
دینه ظلم ایلر دیانت ایلینلر ادّعا
پیکر دینه ورولّار هی یارا اوستن یارا
آغلوری هر یارهسی خون یا علی موسی الرضا
.
.
دین بنزور محتضر بیر زخمداره بستری
حسرت درمانیله جاری یوزه اشک تری
نقد جانه اولمین درمان دینه مشتری
اولدی هر سوداده مغبون یا علی موسی الرضا
.
.
ای هامی عمرین گونون ترویج دینه وقف ایدن
نصرت اسلامه خاطر ایلین ترک وطن
روز و شب دین محنتیله همدم درد و محن
طیّ ایدن صحرا و هامون یا علی موسی الرضا
.
.
.
ای گیجه گوندوزده درد دینیله دل دردمند
مجمر یاریّ اسلامه یانان مثل سپند
قویما بوندان چوخ یتیشسون دینه آسیب و گزند
کانَ ما کُنتُم تُریدون یا على موسی الرضا
.
.
اهل کفر و جهل علم و دینی عنوان ایلدی
دین ایوین بیدین امت یخدی ویران ایلدی
دینه کافر ایتمین ظلمی مسلمان ایلدی
کو جفای ابن میسون یا علی موسی الرضا
.
.
گلشن دایم بهار دین که گور مزدی خزان
اولدی پا مال جفای دشمنیّ دوستان
پردۀ غیبتده قان آغلار بوغمده باغبان
گلشنین گوردوقچا پوزقون یا علی موسی الرضا
.
.
حیف او گلزاریکه جدّون قانی سیراب ایلدی
حیف او غنچه گل که اصغر قانی شاداب ایلدی
حیف او سرویکه قانین عباس اونا آب ایلدی
حیف او رشک سرو موزون یا علی موسی الرضا
.
.
حیف او اللر که کسیلدی دین حق اوستنده ناحق
حیف سو اوسته سنان دریای خونه غرقه زورق
حیف او دینون رونقی وارونه اوخلی قانلی بیرق
حیف او بیدق دار وارون یا علی موسی الرضا
.
.
.
حیف او زحمتلر که اسلام اهلی چکدی صدریده
حیف او قانلار دینین اهلندن توکلدی بدریده
حیف او حمزه حیف او پهلو قالدى دست غدریده
حیف او قان اکباده بیرون یا علی موسی الرضا
.
.
حیف او درباریکه یاندی آتش اشراریله
حیف او محسن سقط اولوب رنج در و دیواریله
حیف اوسینه یاره لندی ضربت مسماریله
حیف او پهلو حیف او خاتون یا علی موسی الرضا
.
.
حیف او عنوان فدکده جدّه ن ایتمیش احتجاج
احتجاجیکه او ظلمات ایچره گون تک بیر سراج
بوسراجه جده وین نیلی وجودی دی زجاج
حیف او عنوان حیف او مضمون یا علی موسی الرضا
.
.
ای دریغا چکدی بیر ایله اذیت مصطفی
ووردولار قانه بویاندى جسم ختم الأنبیاء
حاصل بیر عمر رنجین اولدی بیر دین خدا
تا بشر آسوده اولسون یا علی موسی الرضا
.
.
دین یعنی ضامن آسایش نوع بشر
دین یعنی خیره امر ناهی هر اهل شر
لاجرم دین مبتدای خلقته اصلی خبر
زندگانی دینه مرهون یا علی موسی الرضا
.
.
وحدت منظوریدن هر قدر دور اولسا بشر
وار او قدر آسایش اوسته اختلافات نظر
وحدت منظور تأمینین ایدوب توحید ایدر
ماضی و مستقبل اکنون یا علی موسی الرضا
.
.
مرده دل امت بوله گر قدر روح وحدتی
سهل سایماز کشتی طوفان نوح وحدتی
نوش ایدر فلک نجات ایچره صبوح وحدتی
امن توحیدیله مأمون یا علی بن موسی الرضا
.
.
غرقه گرداب دریای نفاق امت اگر
اولسا دل بسته نجاته ایلسه همت اگر
وورسا ال حبل المتینه بولسه جان قیمت اگر
کشف اولار اسرار مکنون یا علی موسی الرضا
.
.
صدق دلدن ایلسه توحید اهلی اتحاد
آشنایه دونماقا ناچار اور دنیاده یاد
هر اوامر ایلسه هر ملت ایل انفساد
محو ایدر فرعونی هارون یا علی موسی الرضا
.
.
ترک ایدن زهرایه ارثیه جهاندان بیر فدک
امته بیر گنج بی مانند قویدی ماترک
قیمت هر گوهرینده مات صراف فلک
دین یا بیر گنج مخزون یا علی موسی الرضا
.
.
کنز مخزونی که هر لعلی برابر گنجیله
ضبط اولونموش مثلی اولماز قانلاریله رنجیله
بذل جان و مال و ناموس و سر آرنجیله
هر بیری مین رنجه مقرون یا علی موسی الرضا
.
.
بیر ایله قانلار که بعضا خون بهاسی ذات حق
بیر ایله جانلار که هرجان چشمه آیات حق
بیر ایله باشلار که بعضا عارضی مرات حق
قان شفقده گوییا گون یا علی موسی الرضا
.
.
بیر ایله مخزون که مثلى عالم خلقتده یوخ
ماسوالله قیمتاً بیر لعلیجه قیمتده یوخ
قدر سعیه بسته سهم ارث فرق امتده یوخ
هر کس اوز سعیینجه مأذون یا علی موسی الرضا
.
.
حیف او کنزه اف اولا بوامت رزله شها
روز و شب هر کوی و برزنده ساتولار بی بها
بعضیسی وزر و وبال آز مال دنیا منتها
بلکه خشکه لفظ ممنون یا علی موسی الرضا
.
.
گوهر جان قیمت دینی ساتالار رایگان
آلدیلار خسران دارینین متاعین بی گمان
آه اگر جلب حساب اولسون او خسران دیدگان
ورشکسته خوار و مدیون یا علی موسی الرضا
.
.
قبر رشک روضۀ رضوانیده آز یات رضا
گوشه چشم رئوفین سمت دینه آت رضا
آغلا دین احوالینه عالملری آغلات رضا
هر گوزی ایت قانلا مشحون یا علی موسی الرضا
.
.
کور اولا هر گوز غم اسلامه گریان أولمیه
خشک اولا هر چشمه چشمی که عمّان اولمیه
قان اولا هر دل که دینه یانمیه قان اولمیه
خواه عاقل خواه مجنون یا علی موسی الرضا
.
.
بارگاه کبریا اولسیدی گرجای الم
عرض ایدردیم قبّه سینده وور نشان غم الم
کاش خط غم ووریدی لوح محفوظ قلم
غملنیدی دینه مادون یا علی موسی الرضا
.
.
آغلاسون عرض ایله حال دینه جدّون مصطفی
دین یولوندا مبتلای هر بلا کان وفا
ایلین بین صفا و مروه مین سعی و صفا
گل یوزی قانیله گلگون یا علی موسی الرضا
.
.
بیرده عرض ایله نجف ده یاتما ای یعثوب دین
یا علی سن یوسفین گور بیر آنان یعقوب دین
مات ایدوب ایوبی باللهی غم ایوب دین
صبر اوزی مغموم و محزون یا علی موسی الرضا
.
.
ای کلام الله ناطق معنی دین مبین
قول و فعلى خلقه حجت دامنی حبل المتین
ویرمز آیات کلام اللهه قیمت اهل دین
خلق اولوب دنیایه مفتون یا علی موسی الرضا
.
.
ای زکوة حامل اوغلی کو زکوة اغنیا
گورمیوب بو امت آیات زکاتی گوئیا
جان بلب بدبخت اهل فقر صبری کیمیا
اغنیا مصداق قارون یا علی موسی الرضا
.
.
غرقۀ گرداب بحر فقر جمعی بینوا
ناظری بی اعتنا سرگرم عشرت اغنیا
هاردادور انصاف و انسانیت و رحم ای خدا
بس ندور بو درده معجون یا علی موسی الرضا
.
.
رحم ایدن یوخ سائله اشکین ولو قان ایلسه
اشک سیلابیله یا دامانین عمّان ایلسه
عالمی ویران ایدر بوسیل طغیان ایلسه
قطره سی بیر رود آمون یا علی موسى الرضا
.
.
اهل فقرین کشتی صبری سینوب باتدی گله
هر غنیدن تخم نفرت هر فقیر أکدى دله
آه اگر بو تخم بد سبز اولسا دولسا سنبله
وای خرمن کوب اولان گون یا علی موسی الرضا
.
.
لیک اگر آب حیاتله اولا بیر آبیار
طبع تخمی دوندرر بو آبیدن قلب شیار
خرمن مهر و وفانی خوش ایدر تخم نقار
کاش اولا بوخرمن ایدون یا علی موسی الرضا
.
.
باغلیوب بیع و شری بازارینی اهل #ریا
فُذَّنوا حَربَ مِن اللهِ بولوب چوخلار هبا
لطع نسل ایتسون ربا اهلین گوروم درد وبا
محو ایده ای کاش طاعون یا علی موسی الرضا
.
.
خانمانلار قویدی ویران دار دنیاده #ربا
دودمانلار یاندوروب ویردی کولین باده ربا
بیکران سرمایه لر نقشین یودی ساده ربا
نه بیر اون یوزمین نه میلیون یا على موسی الرضا
.
.
نصّدور قانون پیغمبرده بیر درهم ربا
جرماً آرتوخدورکه بیت اللهیده ایتمیش زنا
بیر زناکی مرتکب اولسون اوز اوغلیله آنا
معصیت کسب اولدی مظنون یا علی موسی الرضا
.
.
شرم ایدر خامه غم ناموس عصمتدن یازا
ایستمز راه نزاکتدن چیخا ناچار آزا
لاجرم ایلور قناعت چوخ سوزوندان بو آزا
عصمت ناموس موهون یا علی موسی الرضا
.
.
جان فدا ناموس حق باشه سالان چادر شبه
وصله سی هر اهل ناموسی سالور تاب و تبه
کاش بیر معجرده شام أهلی ویریدی زینبه
وصله دن طرحی دگرگون یا علی موسی الرضا
.
.
کاش حکم شرعیله ویرسون زکوة اهل #زکات
کاش که محجوبه اولسون مسلمین و مسلمات
کاش اجرا اولسون احکام قصاصیله دیات
کاش اولا قانون او قانون یا علی موسی الرضا
.
.
«ذهنیا» وور چنگ دامان رضایه عرض ایله
کای کرم کانی علی المرتضایه عرض ایله
کای قضا فرما خداوند قضایه عرض ایله
قیلسون عنوانیله معنون یا علی موسی الرضا
.
.
.
#رضویه_مدح #پندیات
#ای_شهید_زهر_مأمون_یا_علی_موسی_الرضا
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید