ای عشقیمه گوزل پروانه اکبریم #اکبریه_فکری_اردبیلی

وداع حضرت علی اکبر (ع)
..
..
..
مرحوم فکری اردبیلی
..
..
..
ای عشقیمه گوزل پروانه اکبریم
گیتمه شتابیلن میدانه اکبریم
..
..
..
طعنه ویرار یوزون گلشنده گللره
آدون دوشر سنون دنیاده دیللره
سالما بو بی کسی هجرونده چوللره
رحم ایت اماندی بو نالانه اکبریم
..
..
..
خنجردی قاشلارون ای صید خوش سیر
صیادی بو گوزل گوزلر شکار ایدر
اوخ مثلی کپریگون بو سینمی سوکر
توش ایتمه قلبیمی مژگانه اکبریم
..
..
..
شرح مصیبتون دنیانی یاندیرار
جنّتده باغریقان زهرانی یاندیرار
طاها باخیش گوزون لیلانی یاندیرار
دردیم یتن دگول پایانه اکبریم
..
..
..
باشیمون اوستونه سایه سالوب بلا
بو بیکسه ندن ایتمورسن اعتنا
دنیاده نیلرم سنسیز من آی بالا
یاننام نجه یانار پروانه اکبریم
..
..
..
سولدی جفائیلن عالمده گلشنیم
دریا کیمین اولوب اشگیله دامنیم
سنسیز جوان اوغول جانیم چیخار منیم
احوالیمه یانار بیگانه اکبریم
..
..
..
صبر ایله بیر دایان ای تاج عزّتیم
ئوز جانوه قسم یوخ دیزیده طاقتیم
ابرولرون کیمین خم اولدی قامتیم
دردون گلیدی کاش بو جانه اکبریم
..
..
..
#اکبریه #فکری_اردبیلی #اکبریه_شهادت #ترکی #زبدةالاشعار