بسته شدن راه فرات
زبانحال حضرت امام حسین (ع) به جناب زینب (س)
..
..
مرحوم صافی تبریزی
..
..
آب فراتی باغلادی شمر ستمگر ای باجی
قالدی بو گوندن تشنه لب آل پیمبر ای باجی
صبر ایت دایان قیلما فغان اولما مکدّر ای باجی
..
..
آرتار داخی بوندان صورا هر دم ملال و محنتون
الان گیدر آخر باجی شأن و جلال و شوکتون
ایله تحمل ذلّته اولسا مبدل عزّتون
یوخ چاره تقدیره اولوب بیله مقدّر ای باجی
صبر ایت دایان قیلما فغان اولما مکدّر ای باجی
..
..
مِن بعد قویمازلار سنون اهل جفا گولسون یوزون
دست ستمله اود دوتار قلبون یانار آغلار گوزون
ایله حقارتله باخار کیمسه ایشیتمز حق سوزون
بی شرمدور از بسکه بو قوم ستمگر ای باجی
صبر ایت دایان قیلما فغان اولما مکدّر ای باجی
..
..
بو گون دوباره کوفه دن سعد اوغلونا فرمان گلوب
ئولسون سوسوزدان بو چوله هر کس باجی مهمان گلوب
یوللارینی کسدی سویون شمر الده بو عنوان گلوب
بولمز قوناق حقّینده کی تکلیفی لشگر ای باجی
صبر ایت دایان قیلما فغان اولما مکدّر ای باجی
..
..
هر چند سندن سلب اولوب صبر و ثبات و حوصله
گلمز داخی بیر جرعه سو بو خیمه لر ایچره اله
بیر بیر هامی قربانلاریم تشنه گیدلّه مقتله
عبّاس و عون و قاسمیم شهزاده اکبر ای باجی
صبر ایت دایان قیلما فغان اولما مکدّر ای باجی
..
..
سو اوسته عبّاسون قولون دشمنلرایله لّه قلم
ترک مواسات ایلمز کان وفا صاحب علم
ایلر شهادت سرّینی قانیله یر اوسته رقم
سقّادور اما جان ویرور تشنه او سرور ای باجی
صبر ایت دایان قیلما فغان اولما مکدّر ای باجی
..
..
افلاکه یتسه وار یری آخر ربابون شیونی
اصغر کباب ایلر باجی هم اوز آناسین هم منی
سو یوخ سود اولماز نه بیلور دلسیز اوشاق بونکته نی
ایلر بالق تک اضطراب آغلار سو ایستر ای باجی
صبر ایت دایان قیلما فغان اولما مکدّر ای باجی
..
..
بو سهلدر یکسر قالور اولاد حیدر تشنه لب
آل رسول و عترت ساقی کوثر تشنه لب
عین الحیوتی ئولدورر شمر ستمگر تشنه لب
ویرمز سو یاندیم سویلرم گر چه مکرّر ای باجی
صبر ایت دایان قیلما فغان اولما مکدّر ای باجی
..
..
#فرات #صافی_تبریزی #ترکی #زبدةالاشعار
نظر دهید