زبانحال مادر حضرت علی اصغر (ع)
..
..
مرحوم تائب تبریزی
..
..
نه دیدی اوخ سنه گوزدن آناوی آتدون اوغول
یوخلاموردون نه سبب اولدی بله یاتدون اوغول
..
..
ایتدی رفتار سنون مقصد پنهانویله
بویادی کوینگوی قرمزی آلقانویله
ویردی پیرایه سنه خلعت الوانویله
دلدہ کی گزلین اولان مقصدیوه چاتدون اوغول
..
..
تیر دلدوز ئولوم جامه سی بیچدیردی سنه
رمزیله شرط محبت نه دی سئچدیردی سنه
گوردی تشنه بوغازون قانینی ایچدیردی سنه
ایچدون ئوز قانوی سوفکرین اودور آتدون اوغول
..
..
آپاران وقتده میدانه سنی شاه زَمَن
فکریم اوردیدی منیم ای یوزی گل زلفی سَمَن
شه الینده ایله جلوه ایلدون دشمنه سن
سنگدل دشمنی ئوز حالیوه آغلاتدون اوغول
..
..
ایتدی سعد اوغلی ندا حرملۀ بدسیری
اوخلا خورشید الى اوستونده بو قرص قمری
آناوین اوندا قریلدی بالا بند جگری
اوندا بولدوم که سحر اولدوزی تک باتدون اوغول
..
..
تیر حسرتله بو اودلی دلیمی دلدون عجب
سو هواسیله گیدوب قانون ایچوب گلدون عجب
اوخلانوب ظلمیله یورقون بالا دینجلدون عجب
یوخلادون آغلار آنان بختینی یوخلاتدون اوغول
..
..
نه سبب اولدی که جاندان بله تز دؤیدون على
رخت وصلی بدنوندن نیه تیز سؤیدون على
سینه داغلی آناوی یاخشی ملر قویدون على
عالم وصلتی هجر عالمینه ساتدون اوغول
..
..
اولمادی سو ایچه سن گل تک اوزون سولدی بالا
سارالان رنگیوه باخدیم اورگیم دولدی بالا
یاندیم احوالیوه سینم سودی خشگ اولدی بالا
آغلادون اشگویله سینه می ایسلاتدون على
..
..
بو اوخی که وورولوب سن کیمی مه پاره سینه
آناوین کاش دَگیدی دل صد پاره سینه
اولا قربان بو آنان حلقوین اوخ یاره سینه
اوخلانوب ظلمیله ئوز قانیوه سن باتدون اوغول
..
..
نجه بی شرم و ستم پروریمیش بو اوخ آتان
سودامر وقتی سنون قانیوه ناحقّ باتان
هم سنی اوخلادی بیر تیریله هم یالقیز آتان
باباوین قانینه ئوز قانوی سن قاتدون اوغول
..
..
دلدن عالمده سنون غم لریوی آتماز آنان
آیری نسگل لره نسگل لریوی قاتماز آنان
داخی سنسیز گجه لر صبحه کیمی یاتماز آنان
بله حالیله که سن قانه باتوب یاتدون اوغول
..
..
احمدی بیرده غلام آدلی حسین نوحه گری
خواستار اولدیلا تائب یازا بو نوحه لری
نه گوزل سوزدی آناسی دیدی وار چوخ اثری
نه دیدی اوخ سنه گوزدن آناوی آتدون اوغول
..
..
#اصغریه #تائب_تبریزی #اصغریه_شهادت #ترکی #زبدةالاشعار
نظر دهید